ISS Power Supply: అంతరిక్ష కేంద్రానికి 30 శాతం అదనపు విద్యుత్.. సౌర ఫలకాల ఏర్పాటు పూర్తి
ఈ వార్తాకథనం ఏంటి
అంతర్జాతీయ అంతరిక్ష కేంద్రం (ISS) విద్యుత్ సరఫరాను పెంచేందుకు చేపట్టిన సౌర విద్యుత్ వ్యవస్థ ఆధునికీకరణ పనులు పూర్తయ్యాయి. నాసా (NASA)కు చెందిన ఎక్స్‌పెడిషన్‌ 75ఫ్లైట్‌ ఇంజినీర్‌ అనిల్‌ మీనన్‌,కెనడియన్‌ స్పేస్‌ ఏజెన్సీకి చెందిన జాషువా కుట్రిక్‌ కలిసి చివరి రోల్‌ అవుట్‌ సోలార్‌ అరే (IROSA)ను విజయవంతంగా అమర్చారు. ఐదేళ్లుగా కొనసాగుతున్నఈ ఆధునికీకరణ ప్రాజెక్టులో భాగంగా ఈ పనులు చేపట్టారు. 2030 వరకు అంతర్జాతీయ అంతరిక్ష కేంద్రం కార్యకలాపాలు కొనసాగించేందుకు ఈ ఏర్పాటు ఉపయోగపడనుంది. గురువారం అమెరికా కాలమానం ప్రకారం మధ్యాహ్నం 3.05గంటలకు(భారత కాలమానం ప్రకారం శుక్రవారం తెల్లవారుజామున 1.35గంటలకు) చివరి సౌర ఫలకాన్ని విస్తరించారు. అయితే అమరిక సమయంలో అనూహ్యంగా విద్యుత్ సమస్య తలెత్తడంతో కొంతసేపు పనులకు ఆటంకం ఏర్పడింది.
వివరాలు
అంతరిక్ష కేంద్రం చివరి భాగంలో సౌర ఫలకం ఏర్పాటు
అంతరిక్ష కేంద్రంలోని ప్రధాన ట్రస్‌ నిర్మాణానికి కుడివైపు చివరి భాగంలో ఈ సౌర ఫలకాన్ని అమర్చారు.
అయితే ఈ ప్రక్రియలో చిన్న సమస్య ఎదురైంది. కొత్తగా అమర్చిన సౌర ఫలకం నుంచి రావాల్సిన దానికంటే తక్కువ విద్యుత్ ప్రవాహం ఉన్నట్లు హ్యూస్టన్‌లోని ఫ్లైట్‌ కంట్రోలర్లు గుర్తించారు.
దీంతో ఫలకం విస్తరణ ప్రక్రియను తాత్కాలికంగా నిలిపివేసి, మరోసారి అంతరిక్ష కేంద్రం భూమి చుట్టూ తిరిగే వరకు వేచి చూశారు.
ఈ సమయంలో జాషువా కుట్రిక్‌ అంతరిక్షంలో చీకటి ఉన్నప్పుడు విద్యుత్ కనెక్టర్‌ను పరిశీలించారు.
అది సరిగ్గా అమర్చినట్లు నిర్ధారించుకున్న తర్వాత పనులను తిరిగి ప్రారంభించారు. ఆ తర్వాత విద్యుత్ ప్రవాహం సాధారణ స్థాయిలో ఉన్నట్లు గుర్తించారు.
వివరాలు
అంతరిక్ష కేంద్రానికి 30 శాతం వరకు అదనపు విద్యుత్
మొత్తం ఎనిమిది IROSA సౌర ఫలకాలు అందుబాటులోకి రావడంతో అంతరిక్ష కేంద్రానికి విద్యుత్ సరఫరా 30 శాతం వరకు పెరగనుందని నాసా వెల్లడించింది.
అంతరిక్ష కేంద్రం చివరి సంవత్సరాల్లోనూ కార్యకలాపాలు కొనసాగించేందుకు ఈ అదనపు విద్యుత్ ఉపయోగపడుతుంది.
2030 తర్వాత అంతరిక్ష కేంద్రాన్ని సురక్షితంగా, నియంత్రిత పద్ధతిలో కక్ష్య నుంచి తొలగించే ప్రక్రియకు కూడా ఇది తోడ్పడనుంది.
ఈ మిషన్‌ కోసం వ్యోమగాములు అమెరికా కాలమానం ప్రకారం ఉదయం 8.36 గంటలకు తమ స్పేస్‌ సూట్లను బ్యాటరీ విద్యుత్‌కు మార్చుకున్నారు.
సాయంత్రం 3.35 గంటలకు క్వెస్ట్‌ ఎయిర్‌లాక్‌లోకి తిరిగి గాలి నింపే ప్రక్రియ ప్రారంభమైంది. దీంతో దాదాపు ఏడు గంటల పాటు కొనసాగిన స్పేస్వాక్ అధికారికంగా ముగిసింది.
వివరాలు
2026లో తొమ్మిదో స్పేస్వాక్
2026లో ఇది తొమ్మిదో స్పేస్వాక్ కాగా, ఎక్స్‌పెడిషన్‌ 75 బృంద సభ్యులు చేపట్టిన ఆరో స్పేస్వాక్.
అనిల్‌ మీనన్‌కు ఇది ఐదో స్పేస్వాక్. దీంతో అంతరిక్ష కేంద్రం వెలుపల ఆయన గడిపిన సమయం 33 గంటలు దాటింది.
జాషువా కుట్రిక్‌కు ఇది రెండో స్పేస్వాక్. రెండు IROSA సౌర ఫలకాల ఏర్పాటు మిషన్లలో కలిపి ఆయన 14 గంటలకు పైగా అంతరిక్ష కేంద్రం వెలుపల గడిపారు.
ఈ విద్యుత్ వ్యవస్థ ఆధునికీకరణ పనులు పూర్తయిన తర్వాత నాసా తదుపరి అమెరికా స్పేస్‌వాక్‌లను 2027 జనవరి ప్రారంభంలో చేపట్టనుంది.
అంతరిక్ష కేంద్రం ట్రస్‌పై అమర్చిన ఆల్ఫా మాగ్నెటిక్‌ స్పెక్ట్రోమీటర్‌ (AMS) కాస్మిక్‌ రే డిటెక్టర్‌ను ఆధునికీకరించడం ఈ మిషన్‌ ప్రధాన లక్ష్యం.