Elon musk: ఆపిల్-గూగుల్ మధ్య బిగ్ AI డీల్.. మస్క్ ఆందోళన
ఈ వార్తాకథనం ఏంటి
ఆర్టిఫిషియల్ ఇంటెలిజెన్స్ రంగంలో రెండు దిగ్గజ టెక్ కంపెనీలు గూగుల్, ఆపిల్ మధ్య కీలక ఒప్పందం కుదిరింది. ఆపిల్ అభివృద్ధి చేస్తున్న 'ఫౌండేషన్ మోడల్స్'కు చెందిన ఆపిల్ ఇంటెలిజెన్స్ ఇకపై గూగుల్ జెమినై ఏఐ మోడళ్లతో కలిసి పనిచేయనుంది. ఇందుకోసం గూగుల్ క్లౌడ్ టెక్నాలజీని ఆపిల్ వినియోగించుకోనుంది. ఈ అంశంపై ఇరు సంస్థలు దీర్ఘకాలిక భాగస్వామ్య ఒప్పందాన్ని అధికారికంగా ప్రకటించాయి. అయితే ఈ ఒప్పందంపై టెస్లా, స్పేస్-X అధినేత ఎలాన్ మస్క్ తీవ్ర ఆందోళన వ్యక్తం చేశారు. ఈ ఒప్పందం ద్వారా టెక్నాలజీ రంగంలో గూగుల్కు గుత్తాధిపత్యం మరింత బలపడుతోందని ఎక్స్ వేదికగా వ్యాఖ్యానించారు.
వివరాలు
మరింత పెరగనున్నయాపిల్ ఆర్టిఫిషియల్ ఇంటెలిజెన్స్ సామర్థ్యాలు
ఏఐ రేసులో వెనుకబడ్డాయన్న విమర్శలు ఎదుర్కొంటున్న సమయంలో గూగుల్, యాపిల్ మధ్య ఈ ఒప్పందం కుదరడం ప్రాధాన్యత సంతరించుకుంది. ఒప్పందం ప్రకారం యాపిల్ ఏఐ మోడళ్లు గూగుల్ జెమినై మోడళ్లు, క్లౌడ్ మౌలిక సదుపాయాల ఆధారంగా పనిచేయనున్నాయి. దీని ఫలితంగా యాపిల్ ఆర్టిఫిషియల్ ఇంటెలిజెన్స్ సామర్థ్యాలు మరింత పెరగనున్నాయి. ముఖ్యంగా సిరి పనితీరు గణనీయంగా మెరుగుపడనుందని యాపిల్ వర్గాలు వెల్లడించాయి. అంటే రానున్న రోజుల్లో సిరి మరింత శక్తివంతమైన డిజిటల్ అసిస్టెంట్గా మారనుంది. ఈ భాగస్వామ్యం మల్టీ ఇయర్ ఒప్పందంగా కొనసాగుతుందని స్పష్టం చేశారు.
వివరాలు
వినియోగదారుల డేటాను గూగుల్కు అందించబోమని స్పష్టం
అయితే ఈ ఒప్పందం ఉన్నప్పటికీ యాపిల్ గోప్యతా విధానాల్లో ఎలాంటి మార్పు ఉండదని సంస్థ తేల్చి చెప్పింది. వినియోగదారుల డేటాను గూగుల్కు అందించబోమని స్పష్టం చేసింది. మొత్తం ప్రాసెసింగ్ యాపిల్ డివైజులు, యాపిల్కు చెందిన ప్రైవేట్ క్లౌడ్ వ్యవస్థల్లోనే జరుగుతుందని యాపిల్ ప్రకటించింది. ఇదే సమయంలో ఈ డీల్పై xAI (గ్రోక్) సంస్థ అధినేత ఎలాన్ మస్క్ మరోసారి స్పందించారు. గూగుల్ ఇప్పటికే ఆండ్రాయిడ్, క్రోమ్ వంటి ఉత్పత్తుల ద్వారా టెక్నాలజీ రంగంపై ఆధిపత్యం చెలాయిస్తోందని ఆయన విమర్శించారు. తాజా ఒప్పందం ద్వారా ఆ ఆధిపత్యం మరింత పెరిగే ప్రమాదం ఉందన్నారు. ఈ పరిణామం ఎలాన్ మస్క్కు చెందిన గ్రోక్ ఏఐకు కూడా ప్రతికూలంగా మారవచ్చని టెక్ విశ్లేషకులు అభిప్రాయపడుతున్నారు.
వివరాలు
ఐచ్చిక ఫీచర్గా సిరి సహా యాపిల్ ఇంటెలిజెన్స్ టూల్స్లో చాట్జీపీటీ
ఇదే తరహాలో గతంలో యాపిల్ సంస్థ ఓపెన్ఏఐతో భాగస్వామ్యం కుదుర్చుకున్నప్పుడు కూడా ఎలాన్ మస్క్ ఇదే విధమైన ఆందోళన వ్యక్తం చేశారు. సిరి సహా యాపిల్ ఇంటెలిజెన్స్ టూల్స్లో చాట్జీపీటీని ఐచ్చిక ఫీచర్గా అందించడాన్ని ఆయన తీవ్రంగా వ్యతిరేకించారు. యాపిల్ విధానాలు పోటీ సంస్థల ఎదుగుదలకు అడ్డంకిగా మారుతున్నాయని ఆరోపిస్తూ ఆందోళన వ్యక్తం చేసిన ఆయన, ఈ అంశంపై న్యాయపరమైన చర్యలకు కూడా దిగిన విషయం తెలిసిందే.