Google Gemini: గూగుల్ జెమినీ 3 ఆవిష్కరణ.. రీజనింగ్,కోడింగ్ సామర్థ్యంలో భారీ పురోగతి
ఈ వార్తాకథనం ఏంటి
ఓపెన్‌ఏఐ, ఆంత్రోపిక్ వంటి పోటీదారులు తమ ఏఐ మోడళ్లను వరుసగా అప్‌డేట్ చేస్తూ ముందుకు దూసుకెళ్తున్న నేపథ్యంలో, గూగుల్ యాజమాన్యంలోని ఆల్ఫాబెట్ సంస్థ కూడా ఏఐ రంగంలో తన ఆధిపత్యాన్ని మళ్లీ చాటుకునేందుకు వేగం పెంచింది. ఈ క్రమంలో, కొత్తగా అభివృద్ధి చేసిన 'జెమినీ 3' మోడల్‌ను విడుదల చేసింది. తర్కం, కోడింగ్ వంటి ముఖ్య రంగాల్లో ఈ వెర్షన్ పెద్ద ఎత్తున మెరుగుదల సాధించిందని కంపెనీ అధికారులు తెలిపారు. కొత్త మోడల్ సెర్చ్‌తో సహా గూగుల్ ప్రధాన సేవలన్నిటిలో తక్షణమే ఉపయోగించుకునేలా అందుబాటులోకి వచ్చింది. ఇది ప్రశ్నలకు సమాధానాలు ఇవ్వడమే కాకుండా వాటిని ఇంటరాక్టివ్ విజువల్స్ రూపంలో కూడా చూపిస్తుంది.
వివరాలు
జెమినీ 3 మెరుగైన సామర్థ్యాలు
పూర్వపు వెర్షన్‌ల మాదిరిగానే జెమినీ 3 కూడా టెక్స్ట్, చిత్రాలు, ఇతర మల్టీమీడియా కంటెంట్‌ను ప్రాసెస్ చేయగలదు. ఇంకా క్లిష్టమైన గణితం, సైన్స్ సమస్యలను కూడా అర్థం చేసుకుని పరిష్కరించగలదు. మోడల్ తార్కిక విశ్లేషణ, సందర్భాన్ని గుర్తించే (reading the room) సామర్థ్యాలను గణనీయంగా పెంచుకున్నదని సీఈఓ సుందర్ పిచాయ్ వెల్లడించారు. గత రెండు సంవత్సరాల్లో ఏఐ సామర్థ్యాల్లో వచ్చిన ఈ మార్పు విశేషమని ఆయన పేర్కొన్నారు. అమెరికాలోని కాలేజీ విద్యార్థులు ఒక సంవత్సరం పాటు జెమినీ ప్రోను ఉచితంగా ఉపయోగించుకునే అవకాశం కూడా గూగుల్ ప్రకటించింది.
వివరాలు
పోటీలో ముందుండటానికి కొత్త వ్యూహం
జెనరేటివ్ ఏఐ పోటీ బాగా వేగంగా మారుతున్నప్పుడు, గూగుల్ తిరిగి నాయకత్వ స్థానాన్ని బలపరచాలని లక్ష్యంగా పెట్టుకుంది. జెమినీ 3ని గూగుల్ ఉత్పత్తులు, డెవలపర్ టూల్స్‌లో ఒకేసారి ప్రవేశపెట్టడం ద్వారా, గత ఏళ్లుగా చేసిన పెట్టుబడులకు త్వరిత ఫలితాలు వస్తాయని కంపెనీ భావిస్తోంది. "ఇది ఇప్పటివరకు మేము రూపొందించిన అత్యుత్తమ మోడల్. వినియోగదారుల ఏ ఆలోచననైనా అమలు చేసుకునేలా ఇది తోడ్పడుతుంది" అని డీప్‌మైండ్ సీటీవో కొరే కవుక్చుయోగ్లు వివరించారు. జెమినీ 3 సమాచారం రూపాలను మార్చగలగడం, ఒకే ప్రాంప్ట్ నుంచి విజువల్స్, యాప్‌లు తయారు చేయగలగడం దీని ప్రత్యేకతలని కూడా అధికారులు తెలిపారు.
వివరాలు
పోటీలో ముందుండటానికి కొత్త వ్యూహం
ఉదాహరణకు ట్రిప్ ప్లాన్ అడిగితే, క్లిక్ చేయగలిగే ఇంటరాక్టివ్ ఎలిమెంట్స్‌తో కూడిన విజువల్ లేఅవుట్‌ని రూపొందించగలదు. "జెమినీ 3 ఇన్‌పుట్‌ను ఎలా అర్థం చేసుకుంటుంది అన్నదే కాదు, సమాధానాన్ని కొత్త రీతుల్లో ఎలాంటి అనుభవంతో అందిస్తుందో కూడా ముఖ్యమే" అని జెమినీ బృంద నేత జోష్ వుడ్‌వార్డ్ అన్నారు. సెర్చ్‌లో అత్యంత క్లిష్టమైన ప్రశ్నలకు ఈ మోడల్ ఉపయోగించబడుతుంది. సాధారణ ప్రశ్నలకు మాత్రం ఇతర జెమినీ వెర్షన్‌లే పనిచేస్తాయి.
వివరాలు
కోడింగ్ కోసం 'యాంటీగ్రావిటీ'
ఏఐ ఆధారిత కోడింగ్ ఏజెంట్లను రూపొందించడానికి ఉపయోగపడే కొత్త ప్లాట్ఫారమ్ 'యాంటీగ్రావిటీ'ను కూడా గూగుల్ పరిచయం చేసింది. దీని ప్రివ్యూ వెర్షన్ ఇప్పటికే అందుబాటులో ఉంది. ఈ ప్లాట్ఫారమ్ ద్వారా డెవలపర్లు ఎడిటర్, టెర్మినల్, బ్రౌజర్ వంటి వాతావరణాల్లో కోడ్ రాయడం, పరీక్షించడం, ధృవీకరించడం వంటి పనులను తెలివైన ఏజెంట్‌లతో చేయించవచ్చు. ఉదాహరణకు ఒక ఫ్లైట్-ట్రాకింగ్ యాప్‌ను నిర్మించాలని టాస్క్ ఇవ్వగానే, ఏజెంట్ స్వయంగా అవసరమైన దశలను పూర్తి చేయగలదు.
వివరాలు
అత్యంత క్లిష్టమైన సమస్యల కోసం 'డీప్ థింక్'
జెమినీ 3లో మరో ప్రత్యేక మోడ్ 'డీప్ థింక్'. ఇది కఠిన సమస్యలపై సమాంతరంగా అనేక సిద్ధాంతాలను పరిశీలించి, వాటిలో ఉత్తమమైనదాన్ని ఎంచుకుని సమాధానం ఇస్తుంది. కోడింగ్, సైంటిఫిక్ రీసెర్చ్, బహుళ దశల గల ప్రణాళికలు వంటి క్లిష్ట పనుల్లో ఇది బాగా సహాయపడుతుంది. మొదటగా ఇది నెలకు $249.99 చెల్లించే గూగుల్ ఏఐ అల్ట్రా వినియోగదారులకు అందుతుంది. సురక్షితత పరంగా కూడా ఈ వెర్షన్‌లో గూగుల్ బలమైన రక్షణలు ఏర్పాటు చేసింది. ప్రాంప్ట్ ఇంజెక్షన్ దాడులు వంటి మోసపూరిత ప్రయత్నాలను తట్టుకునే విధంగా దీనికి శిక్షణ ఇచ్చినట్టు తెలిపారు.
వివరాలు
ఏఐ ఆదాయంలో వృద్ధి
గూగుల్ గత కొన్నేళ్లుగా ఏఐలో భారీగా పెట్టుబడులు పెడుతోంది. జెమినీని క్రోమ్‌తో సహా వివిధ ఉత్పత్తుల్లో చేర్చి విస్తృత వినియోగాన్ని లక్ష్యంగా పెట్టుకుంది. గత త్రైమాసిక ఫలితాల్లో ఈ వ్యూహం ఫలించడం మొదలైందని తెలుస్తోంది. గూగుల్ క్లౌడ్ ఆదాయం 34% పెరిగి $15.2 బిలియన్లకు చేరింది..ఇది అంచనా కన్నా ఎక్కువ. క్లౌడ్ వినియోగదారుల్లో సుమారు 70% మంది గూగుల్ ఏఐ సేవలను ఉపయోగిస్తున్నారని సుందర్ పిచాయ్ తెలిపారు.