Grok 3: గ్రోక్ 3 సేవల్ని అందుబాటులోకి తీసుకొచ్చిన 'ఎక్స్‌ఏఐ..
ఈ వార్తాకథనం ఏంటి
స్పేస్-X అధినేత, బిలియనీర్ ఎలాన్ మస్క్ మరోసారి ప్రపంచ దృష్టిని ఆకర్షించారు. కృత్రిమ మేధ (AI) రంగంలో ఆయనకు చెందిన 'ఎక్స్‌ఏఐ (xAI)' సంస్థ తాజాగా గ్రోక్ 3 (Grok 3) సేవలను ప్రారంభించింది. భూమిపైన అత్యంత తెలివైన ఏఐ సాధనంగా మస్క్ దీనిని పేర్కొన్నారు. ఇప్పటికే ఉన్న అన్ని ఏఐ మోడళ్ల కంటే గ్రోక్ 3 అధిక సామర్థ్యంతో ఉందని విడుదల సందర్భంగా మస్క్ వెల్లడించారు.
వివరాలు
చాట్‌బాట్‌ల కంటే 10 రెట్లు అధిక సామర్ధ్యం
చాట్‌బాట్‌లో ఉన్న అధునాతన ప్రత్యేకతలను వివరించిన మస్క్, గణితం, సైన్స్, కోడింగ్ అంశాల్లో గ్రోక్ 3, గూగుల్ జెమిని, డీప్‌మైండ్‌ బీ3, ఆంత్రోపిక్‌ క్లాడ్, ఓపెన్‌ఏఐ జీపీటీ-4లను మించిపోయిందని తెలిపారు. ఇప్పటి వరకు ఉన్న చాట్‌బాట్‌ల కంటే 10 రెట్లు అధిక సామర్థ్యాన్ని ప్రదర్శిస్తుందని చెప్పారు. ఎక్స్‌ఏఐలోని ముగ్గురు ఇంజినీర్లతో కలిసి ఈ కొత్త మోడల్ విశేషాలను పంచుకున్నారు. అంతేకాక, గ్రోక్ 3 రోజువారీ మెరుగుదల పొందుతుందని, మరో వారం రోజుల్లో వాయిస్ ఇంటరాక్షన్ ఫీచర్ జోడించనున్నట్లు ప్రకటించారు.
వివరాలు
గ్రోక్ 3 సేవలు అందుబాటులోకి..
ఈరోజు నుంచి 'ఎక్స్‌'లో ప్రీమియం+ సబ్‌స్క్రైబర్లకు గ్రోక్ 3 సేవలు అందుబాటులోకి రానున్నాయని ఎలాన్ మస్క్ తెలిపారు. ఈ సేవలను ముందుగా యాక్సెస్ చేయాలంటే ప్రీమియం ప్లస్ సబ్‌స్క్రిప్షన్ తీసుకోవాల్సి ఉంటుంది, దీని ధర ప్రస్తుతం భారత్‌లో నెలకు ₹1750గా ఉంది. అదనంగా, అధునాతన ఫీచర్లను కోరుకునే వినియోగదారుల కోసం 'సూపర్‌ గ్రోక్' పేరిట కొత్త సబ్‌స్క్రిప్షన్ ప్లాన్‌ను కూడా కంపెనీ తీసుకొచ్చింది. గ్రోక్ మొబైల్ యాప్, గ్రోక్.కామ్ వెబ్‌సైట్ ద్వారా వినియోగదారులు ఈ ప్లాన్లను పొందవచ్చు. అయితే, 'ఎక్స్‌' వినియోగదారులందరికీ ఈ సేవలు ఉచితంగా అందుబాటులోకి వస్తాయా లేదా అన్న విషయంపై స్పష్టత రాలేదు.