Qdenga Dengue Vaccine: 2027లో భారత్‌లో విడుదల కానున్న డెంగ్యూ వ్యాక్సిన్‌ క్విడెంగా
ఈ వార్తాకథనం ఏంటి
వర్షాకాలం వచ్చిందంటే చాలు.. దోమల బెడదతో పాటు డెంగ్యూ భయం కూడా మొదలవుతుంది. ఏటా దేశవ్యాప్తంగా లక్షలాది మంది ఈ వైరల్‌ జ్వర బారిన పడుతున్నారు. కొందరిలో సాధారణ లక్షణాలతో తగ్గిపోయినా, మరికొందరికి తీవ్ర అనారోగ్యం కలిగించి ఆసుపత్రి పాలయ్యే పరిస్థితి వస్తోంది. ఇలాంటి సమయంలో డెంగ్యూను ముందుగానే అడ్డుకునేందుకు భారత్‌లో తొలి వ్యాక్సిన్‌ అందుబాటులోకి రానుంది. జపాన్‌కు చెందిన టకెడా ఫార్మా అభివృద్ధి చేసిన 'క్విడెంగా' టీకాను 2027 ప్రథమార్ధంలో ప్రైవేట్‌ మార్కెట్లో ప్రవేశపెట్టేందుకు ఏర్పాట్లు జరుగుతున్నాయి. ఇందుకోసం డాక్టర్‌ రెడ్డీస్‌ ల్యాబొరేటరీస్‌తో టకెడా భాగస్వామ్యం కుదుర్చుకుంది.
Details
నాలుగు రకాల డెంగ్యూ వైరస్‌లకు రక్షణ
డెంగ్యూ వైరస్‌లో నాలుగు ప్రధాన రకాలు (సెరోటైప్‌లు) ఉంటాయి. వీటన్నింటి నుంచి రక్షణ కల్పించేలా క్విడెంగా వ్యాక్సిన్‌ను రూపొందించారు.
ఇది టెట్రావాలెంట్‌ లైవ్‌ అటెన్యూయేటెడ్‌ వ్యాక్సిన్‌ రకం. అంటే బలహీనపరిచిన వైరస్‌ రూపాలను ఉపయోగించి శరీరంలో రోగనిరోధక శక్తిని ప్రేరేపిస్తుంది. 4 నుంచి 60 ఏళ్ల వయసున్న వారికి ఈ టీకా ఇవ్వవచ్చు.
మొత్తం రెండు డోసులు తీసుకోవాలి. మొదటి డోసు తీసుకున్న మూడు నెలల తర్వాత రెండో డోసు వేస్తారు. గతంలో డెంగ్యూ వచ్చిందా లేదా అనే విషయంతో సంబంధం లేకుండా టీకా తీసుకునే అవకాశం ఉంది.
Details
టీకా సమర్థత ఎంతవరకు?
క్లినికల్‌ ట్రయల్స్‌లో లభించిన ఫలితాలు ఈ వ్యాక్సిన్‌పై ఆశలు పెంచుతున్నాయి. రెండో డోసు తీసుకున్న ఏడాది తర్వాత డెంగ్యూ నుంచి సుమారు 80 శాతం రక్షణ కల్పించినట్లు టకెడా వెల్లడించింది.
4.5 ఏళ్ల దీర్ఘకాలిక పరిశీలనలో డెంగ్యూ కేసులను నివారించడంలో 61 శాతం సమర్థత, ఆసుపత్రిలో చేరాల్సిన పరిస్థితిని అడ్డుకోవడంలో 84 శాతం సమర్థత నమోదైనట్లు తెలిపింది.
అయితే, గతంలో డెంగ్యూ సోకినవారు, సోకనివారు అనే తేడాతో పాటు వైరస్‌ సెరోటైప్‌ను బట్టి ఈ ఫలితాలు మారవచ్చు.
Details
భారతీయ పరిస్థితులపై మరింత అధ్యయనం అవసరం
వ్యాక్సిన్‌కు అనుమతి లభించినంత మాత్రాన అన్ని సందేహాలు తొలగిపోయినట్లు కాదు.
భారతదేశంలోని వాతావరణం, ప్రాంతాలవారీగా వ్యాపించే వైరస్‌ రకాలు, ప్రజల ఆరోగ్య పరిస్థితులను దృష్టిలో ఉంచుకుని మరిన్ని అధ్యయనాలు అవసరమని వైద్య నిపుణులు అభిప్రాయపడుతున్నారు.
ముఖ్యంగా టీకా ఇచ్చే రక్షణ ఎంతకాలం కొనసాగుతుంది? దేశంలోని వివిధ ప్రాంతాల్లో కనిపించే డెంగ్యూ సెరోటైప్‌లపై ఇది ఒకే స్థాయిలో పనిచేస్తుందా? అనే అంశాలపై స్పష్టత రావాలి.
Details
తొలుత దిగుమతి.. ఆ తర్వాత భారత్‌లోనే ఉత్పత్తి
క్విడెంగా వ్యాక్సిన్‌కు సెంట్రల్‌ డ్రగ్స్‌ స్టాండర్డ్స్‌ కంట్రోల్‌ ఆర్గనైజేషన్‌ (CDSCO) 2026 జులైలో మార్కెటింగ్‌ అనుమతి ఇచ్చింది.
తొలిదశలో జర్మనీలోని టకెడా తయారీ కేంద్రం నుంచి టీకా డోసులను భారత్‌కు దిగుమతి చేయనున్నారు. తర్వాత దేశంలోనే ఉత్పత్తి సామర్థ్యాన్ని పెంచే ప్రణాళికలు ఉన్నాయి.
అయితే, వ్యాక్సిన్‌ ధర ఎంత ఉంటుంది? ప్రభుత్వ టీకా కార్యక్రమాల్లో దీనికి చోటు దక్కుతుందా? అనే విషయాలు ఇంకా తేలాల్సి ఉంది.
టీకా అందుబాటులోకి వచ్చినా దోమల నివారణ, పరిసరాల పరిశుభ్రత, నీరు నిల్వ ఉండకుండా చూసుకోవడం వంటి జాగ్రత్తలు తప్పనిసరి.
ఎందుకంటే వ్యాక్సిన్‌ డెంగ్యూపై పోరాటానికి అదనపు రక్షణ మాత్రమే.. దోమల నియంత్రణకు ప్రత్యామ్నాయం కాదు.