'Pralay' Missile: భారత్ అమ్ములపొదిలో మరో అస్త్రం.. ప్రళయ్ క్షిపణి పరీక్ష విజయవంతం
ఈ వార్తాకథనం ఏంటి
భారత రక్షణ పరిశోధన,అభివృద్ధి సంస్థ (డీఆర్‌డీవో) మరో కీలక ప్రయోగాన్ని విజయవంతంగా నిర్వహించింది. స్వదేశీ సాంకేతిక పరిజ్ఞానంతో రూపొందించిన ఉపరితలం నుంచి ఉపరితలానికి ప్రయోగించే 'ప్రళయ్' క్షిపణిని విజయవంతంగా పరీక్షించింది. ఒడిశా తీరంలో గురువారం ఉదయం 11:10 గంటలకు ఈ పరీక్ష చేపట్టారు. ఈ విషయాన్ని రక్షణ మంత్రి రాజ్‌నాథ్ సింగ్ అధికారికంగా వెల్లడించారు. ఈ ప్రయోగంపై రాజ్‌నాథ్ సింగ్ 'ఎక్స్' వేదికగా స్పందించారు. వినియోగదారుల మూల్యాంకన పరీక్షల్లో భాగంగా ప్రళయ్ క్షిపణిని ప్రయోగించినట్లు తెలిపారు. నిర్దేశించిన అన్ని లక్ష్యాలను క్షిపణి విజయవంతంగా చేరుకుందని పేర్కొన్నారు. వివిధ రేంజ్ సాధనాల ద్వారా సేకరించిన సమాచారం కూడా ఈ విషయాన్ని నిర్ధారించిందని వెల్లడించారు.
వివరాలు
21 కిలోమీటర్ల ఎత్తులో హెచ్ఏపీఎస్ ప్రయోగం
దేశీయ రక్షణ సామర్థ్యాలను మరింత బలోపేతం చేసే దిశగా ఈ విజయం మరో ముఖ్యమైన మైలురాయి అని ఆయన అభిప్రాయపడ్డారు.
డీఆర్‌డీవో గత నెలలోనూ మరో కీలక విజయాన్ని సాధించింది. స్వదేశీ పరిజ్ఞానంతో అభివృద్ధి చేసిన హై ఆల్టిట్యూడ్ ప్లాట్‌ఫామ్ సిస్టమ్ (హెచ్ఏపీఎస్) విమాన ప్రయోగాన్ని విజయవంతంగా నిర్వహించింది.
ఈ ప్రయోగంలో భాగంగా హెచ్ఏపీఎస్ విమానం సముద్ర మట్టానికి 21 కిలోమీటర్ల ఎత్తుకు చేరుకుంది.
అనంతరం స్ట్రాటోస్ఫియర్‌లో ఎక్కువ సమయం పాటు ప్రయాణించే సామర్థ్యాన్ని ప్రదర్శించింది.
వివరాలు
స్ట్రాటోస్ఫియర్ అనుకూలమైన ప్రాంతం
రక్షణ మంత్రిత్వ శాఖ వెల్లడించిన వివరాల ప్రకారం.. ఈ ప్రయోగాత్మక విమానం 21 కిలోమీటర్ల ఎత్తుకు చేరుకున్న తర్వాత సుమారు 20 కిలోమీటర్ల ఎత్తులో 30 నిమిషాలకు పైగా స్థిరంగా ప్రయాణించింది.
నిరంతర నిఘా, సమాచార ప్రసారం, పర్యవేక్షణ వంటి కార్యకలాపాలకు స్ట్రాటోస్ఫియర్ అనుకూలమైన ప్రాంతం.
ఈ ఎత్తులో సమర్థంగా పనిచేయగల సామర్థ్యం తమ వ్యవస్థకు ఉందని హెచ్ఏపీఎస్ ప్రయోగం ద్వారా నిరూపితమైంది.
ప్రయోగ సమయంలో విమానంలోని ఎయిర్‌బోర్న్ ప్లాట్‌ఫామ్ నుంచి భూమిపై ఉన్న గ్రౌండ్ కంట్రోల్ స్టేషన్‌కు ఎప్పటికప్పుడు వీడియో దృశ్యాలు, విమానం పనితీరుకు సంబంధించిన సమాచారం చేరవేశారు.
ప్రయోగం పూర్తయ్యే వరకు ఈ సమాచార ప్రసారం నిరంతరాయంగా కొనసాగింది.
వివరాలు
అనేక కీలక పరికరాలతో హెచ్ఏపీఎస్
ఈ వ్యవస్థలో ఇనర్షియల్ మెజర్‌మెంట్ యూనిట్ (ఐఎంయూ), జీపీఎస్ రిసీవర్, ఆన్‌బోర్డ్ కెమెరాలు, విమానం ఎత్తును నియంత్రించే పరికరాలు సహా పలు సాంకేతిక ఉపవ్యవస్థలను ఏర్పాటు చేశారు.
ప్రయోగం ప్రారంభం నుంచి ముగింపు వరకు ఇవన్నీ సక్రమంగా పనిచేశాయని అధికారులు వెల్లడించారు.
భారత వైమానిక దళం, సెంటర్ ఫర్ మిలిటరీ ఎయిర్‌వర్తీనెస్ అండ్ సర్టిఫికేషన్ (సీఎంఏసీ), డైరెక్టరేట్ జనరల్ ఆఫ్ సివిల్ ఏవియేషన్ (డీజీసీఏ), ఎయిర్‌పోర్ట్స్ అథారిటీ ఆఫ్ ఇండియా (ఏఏఐ) సహా పలు సంస్థలు సమన్వయంతో ఈ ప్రయోగాన్ని నిర్వహించాయి.