Spadex Mission: ఇస్రో చేపట్టిన పీఎస్‌ఎల్వీ-సీ60 ప్రయోగం విజయవంతం
ఈ వార్తాకథనం ఏంటి
భారత అంతరిక్ష పరిశోధన సంస్థ (ఇస్రో) విజయవంతంగా నిర్వహించిన పీఎస్‌ఎల్వీ-సీ60 ప్రయోగం శ్రీహరికోటలోని సతీశ్ ధవన్ స్పేస్ సెంటర్ నుండి నింగిలోకి దూసుకెళ్లింది.
ఈ ప్రయోగంలో టార్గెట్, ఛేజర్ ఉపగ్రహాలను నిర్ణీత కక్ష్యలో ప్రవేశపెట్టారు.
సోమవారం రాత్రి 10:00:15 గంటలకు నిప్పులు చిమ్ముతూ ప్రయోగం ప్రారంభమైంది.
స్పేస్ డాకింగ్ ఎక్స్‌పెరిమెంట్ (స్పేడెక్స్) పేరుతో భూ కక్ష్యలో రెండు ఉపగ్రహాలను అనుసంధానం చేయడానికి ఈ ప్రయత్నం జరిగింది.
అంతరిక్షంలో వ్యోమనౌకలను డాకింగ్, అన్‌ డాకింగ్ చేయగల సాంకేతికతను అభివృద్ధి చేయడం ఈ ప్రయోగ ప్రధాన లక్ష్యం.
వివరాలు
డాకింగ్,అన్‌ డాకింగ్ సాంకేతికత చాలా అవసరం
భూ ఉపరితలం నుండి 470 కిలోమీటర్ల ఎత్తులో వృత్తాకార కక్ష్యలో రెండు వ్యోమనౌకలను ఏకకాలంలో డాకింగ్ అయ్యే విధంగా ప్రణాళిక రూపొందించారు.
చంద్రుడిపై వ్యోమగామిని దించడం, జాబిల్లి నుంచి మట్టిని తీసుకురావడం, సొంత అంతరిక్ష కేంద్రం నిర్మించడం వంటి లక్ష్యాలను సాధించేందుకు డాకింగ్, అన్‌ డాకింగ్ సాంకేతికత చాలా అవసరమని ఇస్రో తెలిపింది.
ఈ ప్రక్రియ విజయవంతమైతే, ఈ సాంకేతికతను కలిగిన నాలుగో దేశంగా భారత్ నిలవనుంది.
ప్రస్తుతం అమెరికా, రష్యా, చైనా మాత్రమే ఈ సాంకేతికతను కలిగి ఉన్నట్లు ఇస్రో పేర్కొంది.
వివరాలు
జనవరి 7న డాకింగ్ జరిగే అవకాశం: సోమనాథ్‌
పీఎస్‌ఎల్వీ-సీ60 ప్రయోగం విజయవంతంగా పూర్తవడంపై ఆయన సంతోషం వ్యక్తం చేస్తూ, ఈ మిషన్‌లో భాగస్వాములైన శాస్త్రవేత్తలను అభినందించారు.
వాహక నౌక రెండు ఉపగ్రహాలను నిర్ణీత కక్ష్యలోకి విజయవంతంగా ప్రవేశపెట్టిందని చెప్పారు.
స్పేడెక్స్ శాటిలైట్లను కక్ష్యలో ప్రవేశపెట్టడం ఈ మిషన్‌లో తొలి భాగమని ఆయన వివరించారు.
డాకింగ్ ప్రక్రియ పూర్తికావడానికి మరో వారం సమయం పడుతుందని, జనవరి 7న డాకింగ్ జరుగుతుందని ఆశాభావం వ్యక్తం చేశారు.