ISRO: మార్చి 2026కి ముందు 7 అంతరిక్ష మిషన్‌లకు ఐస్రో సిద్ధం
ఈ వార్తాకథనం ఏంటి
భారత అంతరిక్ష పరిశోధనా సంస్థ (ఇస్రో) వచ్చే ఏడాది మార్చి 2026కి ముందే మొత్తం ఏడు మిషన్‌లను ప్ర‌యోగించేందుకు ప్రణాళికలు రూపొందిస్తోంది. ఇందులో భాగంగా గగనయాన్‌ ప్రాజెక్ట్‌లో తొలి మానవరహిత (Uncrewed) ఫ్లైట్‌ కూడా ఉండనుందని ఐస్రో చైర్మన్‌ వి. నారాయణన్‌ ఆదివారం వెల్లడించారు. ఈ ప్రాజెక్ట్‌లో భాగంగా మొత్తం మూడు మానవరహిత ప్రయోగాల అనంతరం మానవ యాత్ర (Crewed Mission) జరగనుందని తెలిపారు.
మిషన్ అప్డేట్
హార్డ్‌వేర్‌ సమీకరణ పనులు వేగంగా సాగుతున్నాయి
నారాయణన్‌ మాట్లాడుతూ గగనయాన్‌ ప్రాజెక్ట్‌ చివరి దశల్లో ఉందని, అన్ని హార్డ్‌వేర్‌ భాగాలు ఇప్పటికే శ్రీహరికోటకు చేరుకున్నాయని చెప్పారు. ప్రస్తుతం వాటి సమీకరణ (Integration) పనులు జరుగుతున్నాయని, ఈ ఆర్థిక సంవత్సరంలోనే తొలి మానవరహిత మిషన్ 'G1 మిషన్'ని పూర్తి చేస్తామని వెల్లడించారు.
లంచ్ స్ట్రాటజీ
5 ఏళ్లలో 50 రాకెట్‌ లాంచ్‌లు లక్ష్యం
అంతరిక్ష శాఖ కార్యదర్శిగా కూడా ఉన్న నారాయణన్‌ మాట్లాడుతూ, ఐస్రో వచ్చే ఐదు సంవత్సరాల్లో మొత్తం 50 రాకెట్‌ లాంచ్‌లను చేపట్టే లక్ష్యంతో ఉన్నట్లు తెలిపారు. ఇది ప్రధాన మంత్రి నరేంద్ర మోదీ స్పేస్‌ విజన్‌లో భాగమని అన్నారు. ఆదివారం జరిగిన LVM3-M05 ప్రయోగం తర్వాత, మరో కమర్షియల్‌ కమ్యూనికేషన్‌ శాటిలైట్‌ను తీసుకెళ్లే LVM3 రాకెట్‌ ప్రయోగం ఉండనుందని చెప్పారు.
రాబోయే ప్రాజెక్ట్‌లు
తదుపరి మిషన్‌లు సిద్ధం
కమర్షియల్‌ శాటిలైట్‌ ప్రయోగం తర్వాత, ఐస్రో మూడు PSLV మిషన్‌లను ప్రణాళికలో ఉంచింది. వీటిలో ఒకటి న్యూ స్పేస్‌ ఇండియా లిమిటెడ్‌ (NSIL) కస్టమర్‌ శాటిలైట్‌ కోసం ఉంటుంది. అదనంగా, PSLV-N1 పేరుతో ఒక టెక్నాలజీ అభివృద్ధి మిషన్ కూడా ఈ ఆర్థిక సంవత్సరంలోనే జరగనుంది. మరో GSLV-F17 రాకెట్‌ ప్రయోగం కూడా మార్చి 2026లోపు జరగనుందని అధికారులు తెలిపారు.