Japan: అంగారకుడి చందమామ దిశగా జపాన్‌ వ్యోమనౌక.. 10 గ్రాముల నమూనాలే లక్ష్యం!
ఈ వార్తాకథనం ఏంటి
జపాన్‌ చేపట్టిన మార్స్‌ మూన్స్‌ ఎక్స్‌ప్లోరేషన్‌ (MMX) మిషన్‌ యాత్ర నిన్న అర్ధరాత్రి ప్రారంభమైంది. జపాన్‌ ఏరోస్పేస్‌ ఎక్స్‌ప్లోరేషన్‌ ఏజెన్సీ (జాక్సా) రూపొందించిన ఈ అంతరిక్ష యాత్ర 2027 ఆగస్టు నాటికి అంగారకుడి సమీపానికి చేరుకోనుంది. అనంతరం అంగారకుడి ఉపగ్రహమైన ఫోబోస్‌పై పరిశోధనలు చేపట్టి, అక్కడి నుంచి నమూనాలను సేకరించనుంది. ఫోబోస్‌ నుంచి 10 గ్రాముల నమూనాలను భూమికి తీసుకురావడం ఈ మిషన్‌ ప్రధాన లక్ష్యం. అంగారకుడి ఉపగ్రహం నుంచి నమూనాలను సేకరించి తీసుకురావడానికి చేపడుతున్న తొలి ప్రయత్నం ఇదే. గ్రహశకలాల నుంచి నమూనాలను సేకరించడం జపాన్‌కు కొత్తేమీ కాదు. గతంలో ఆ దేశం ఇలాంటి రెండు మిషన్లను విజయవంతంగా నిర్వహించింది. ఇప్పుడు అదే అనుభవంతో అంగారకుడి ఉపగ్రహంపై పరిశోధనలకు సిద్ధమైంది.
వివరాలు
అంగారకుడి ఉపగ్రహాలపై పెరుగుతున్న ఆసక్తి
1960 నుంచి ఇప్పటివరకు ప్రపంచంలోని పలు దేశాలు అంగారకుడి వద్దకు పదుల సంఖ్యలో వ్యోమనౌకలను పంపించాయి.
అయితే అంగారకుడి ఉపగ్రహాలైన ఫోబోస్‌, డీమోస్‌లపై మాత్రం పెద్దగా దృష్టి సారించలేదు. గతంలో రష్యా ఫోబోస్‌పై పరిశోధనలు చేపట్టేందుకు ప్రయత్నించినప్పటికీ, అక్కడ ల్యాండింగ్‌ సాధ్యం కాలేదు.
ఇప్పుడు జపాన్‌ ఈ సవాలును స్వీకరించి, ఫోబోస్‌ నుంచి నమూనాలను సేకరించేందుకు ప్రయత్నిస్తోంది.
మరోవైపు జర్మనీ, ఫ్రాన్స్‌ కూడా ఫోబోస్‌పై పరిశోధనలకు ప్రణాళికలు సిద్ధం చేస్తున్నాయి. 2029లో అక్కడికి ఓ రోబోను పంపేందుకు ఆ రెండు దేశాలు ప్రయత్నాలు ప్రారంభించాయి.
వివరాలు
ఫోబోస్‌ పరిమాణం ఎంతంటే..
అంగారకుడి ఉపగ్రహమైన ఫోబోస్‌ ఆ గ్రహానికి సుమారు 6,000 కిలోమీటర్ల దూరంలో ఉంది.
దీని వ్యాసం 20 నుంచి 30 కిలోమీటర్ల మధ్య ఉంటుందని అంచనా వేస్తున్నారు.
ఇంత చిన్న ఉపగ్రహంపైకి చేరుకుని, అక్కడి నుంచి నమూనాలను సేకరించి భూమికి తీసుకురావడం శాస్త్రవేత్తలకు కీలకమైన సవాలుగా నిలవనుంది.