French: ఫ్రాన్స్‌లో అల్లర్లు.. పలు ప్రాంతాల్లో పాక్షిక కర్ఫ్యూలకు ప్రధాని ఆదేశాలు
ఈ వార్తాకథనం ఏంటి
ఫ్రాన్స్‌లో వారాంతంలో జరిగిన అల్లర్లు, హింసాత్మక నిరసనల నేపథ్యంలో ప్రభుత్వం అప్రమత్తమైంది. పరిస్థితులను అదుపులోకి తెచ్చేందుకు సోమవారం సాయంత్రం నుంచి కొన్ని ప్రాంతాల్లో పాక్షిక కర్ఫ్యూలు విధించాలని స్థానిక అధికారులను ఆదేశించినట్లు ఫ్రాన్స్‌ ప్రధానమంత్రి సెబాస్టియన్‌ లెకోర్నూ తెలిపారు. ప్రజా శాంతిభద్రతలను పునరుద్ధరించేందుకు తమ ప్రభుత్వం కట్టుబడి ఉందని ఆయన స్పష్టం చేశారు. అవసరమైతే అత్యవసర పరిస్థితిని ప్రకటించేందుకు కూడా సిద్ధంగా ఉన్నామని, అయితే ప్రస్తుత పరిస్థితుల్లో పాక్షిక కర్ఫ్యూలే సరైన చర్యగా భావిస్తున్నామని చెప్పారు. ఏయే నగరాల్లో కర్ఫ్యూలు విధిస్తారు? వాటి నిబంధనలు ఎలా ఉంటాయి? అనే వివరాలను మాత్రం ఆయన వెల్లడించలేదు. అయితే పారిస్‌ నగరం మొత్తంలో కర్ఫ్యూ విధించే ఆలోచన లేదని స్పష్టం చేశారు.
వివరాలు
భద్రతా వైఫల్యంపై మేయర్ల ప్రశ్నలు
స్థానిక పరిస్థితులను బట్టి కొన్ని ప్రాంతాలకే కర్ఫ్యూలను పరిమితం చేస్తామని తెలిపారు.
అనంతరం,ఫ్రాన్స్‌ అంతర్గత వ్యవహారాల శాఖ మంత్రి లారెంట్‌ నునెజ్‌ మాట్లాడుతూ.. మంగళవారం సాయంత్రం జరగాల్సిన పారిస్‌ సెయింట్‌ జర్మైన్‌ (పీఎస్‌జీ), బార్సిలోనా ఫుట్‌బాల్‌ మ్యాచ్‌ను రద్దు చేసే ఆలోచన లేదని వెల్లడించారు.
మరోవైపు, వారాంతంలో జరిగిన అల్లర్లు, దోపిడీలను అరికట్టడంలో భద్రతా దళాలు తగిన ముందస్తు చర్యలు తీసుకోలేదని ఆరోపిస్తూ ఫ్రాన్స్‌లోని అతిపెద్ద నగరాల మేయర్లు సోమవారం ప్రభుత్వాన్ని వివరణ కోరారు.
వివరాలు
ఎన్నికల వేళ ప్రభుత్వానికి సవాల్
పరిస్థితిని ఎదుర్కోవడంలో అధికారుల సన్నద్ధతపై ప్రశ్నలు లేవనెత్తారు.
గత కొన్ని వారాలుగా విద్యార్థులు నిర్వహిస్తున్న నిరసనలే తాజా ఆందోళనలకు నేపథ్యంగా నిలిచాయి.
ఈ ప్రదర్శనల్లో అప్పుడప్పుడు హింసాత్మక ఘటనలు చోటుచేసుకుంటున్నాయి.
మరో ఆరు నెలల్లో అధ్యక్ష ఎన్నికలు జరగనున్న నేపథ్యంలో ఈ పరిణామాలు ఫ్రాన్స్‌ ప్రభుత్వానికి సవాలుగా మారాయి.
బలహీనపడుతున్న ఆర్థిక వ్యవస్థ, పెరుగుతున్న ప్రభుత్వ రుణభారం వంటి సమస్యలతో ఇప్పటికే ఒత్తిడిని ఎదుర్కొంటున్న దేశంలో తాజా అల్లర్లు మరింత ఆందోళన కలిగిస్తున్నాయి.