Microsoft: మైక్రోసాఫ్ట్ రూ.2.5 బిలియన్ AI ప్రణాళిక.. ఖాతాదారుల వద్దకే ఇంజినీర్లు
ఈ వార్తాకథనం ఏంటి
ప్రపంచ టెక్ దిగ్గజం మైక్రోసాఫ్ట్ 2.5 బిలియన్ డాలర్ల పెట్టుబడితో 'ది మైక్రోసాఫ్ట్ ఫ్రంటియర్ కంపెనీ' పేరుతో కొత్త కార్యక్రమాన్ని ప్రారంభిస్తున్నట్లు ప్రకటించింది. వ్యాపార సంస్థల్లో కృత్రిమ మేధస్సు (AI) వినియోగాన్ని మరింత వేగంగా విస్తరించడమే దీని ప్రధాన లక్ష్యమని సంస్థ వెల్లడించింది. ఇందులో భాగంగా తమ AI ఇంజినీర్లను నేరుగా ఖాతాదారుల సంస్థల్లోనే పనిచేసేలా ఏర్పాటు చేయనుంది.
వివరాలు
కార్యక్రమానికి రోడ్రిగో కెడే లిమా నేతృత్వం
ఈ కొత్త కార్యక్రమానికి మైక్రోసాఫ్ట్ సీనియర్ అధికారి రోడ్రిగో కెడే లిమా నాయకత్వం వహించనున్నారు. ఆయన ఇటీవల వరకు మైక్రోసాఫ్ట్ ఆసియా అధ్యక్షుడిగా బాధ్యతలు నిర్వహించారు. ఈ కార్యక్రమంలో పరిశ్రమ, ఇంజినీరింగ్, AI రంగాలకు చెందిన 6,000 మందికి పైగా నిపుణులు కలిసి పనిచేయనున్నారు. వీరిలో ఎక్కువ మంది ఇప్పటికే మైక్రోసాఫ్ట్లో పనిచేస్తున్న ఇంజినీరింగ్, ఫార్వర్డ్-డిప్లాయ్డ్ బృందాల నుంచే ఎంపిక కానున్నారు.
వివరాలు
పెట్టుబడిపై పూర్తి వివరాలు వెల్లడించని మైక్రోసాఫ్ట్
కొత్త సంస్థలో అంతర్గత ఉద్యోగులతో పాటు కొత్త నియామకాలు కూడా చేపట్టనున్నట్లు మైక్రోసాఫ్ట్ తెలిపింది. ఇంజినీరింగ్, AI, పరిశ్రమల విభాగాల్లో కొత్త నిపుణులను నియమించనుంది. అయితే ప్రకటించిన 2.5 బిలియన్ డాలర్ల పెట్టుబడి పూర్తిగా కొత్త ఖర్చా? లేక ఇప్పటికే ఉన్న బడ్జెట్ను మళ్లించిందా? అనే విషయాన్ని కంపెనీ స్పష్టం చేయలేదు. అలాగే ప్రస్తుతం ఉన్న కన్సల్టింగ్, సేవల విభాగాలపై ఈ కొత్త సంస్థ ప్రభావం ఎలా ఉంటుందో కూడా వెల్లడించలేదు.
వివరాలు
ఖాతాదారుల సంస్థల్లోనే AI వ్యవస్థల అభివృద్ధి
ఇటీవల AI సేవలను అందిస్తున్న సంస్థలు తమ ఇంజినీర్లను నేరుగా ఖాతాదారుల సంస్థల్లో పనిచేయించే విధానాన్ని ఎక్కువగా అనుసరిస్తున్నాయి. దీనిని ఫార్వర్డ్-డిప్లాయ్డ్ ఇంజినీరింగ్ అని పిలుస్తారు. ఇందులో సాంకేతిక నిపుణులు సంస్థల్లోనే ఉండి, AI ఎక్కడ ఉపయోగపడుతుందో గుర్తించి, అవసరమైన వ్యవస్థలను రూపకల్పన చేయడం, అమలు చేయడం, నిర్వహించడం వంటి బాధ్యతలు చేపడతారు. ఈ ధోరణిపై గోల్డ్మన్ శాక్స్ ఆస్తుల, సంపద నిర్వహణ విభాగం గ్లోబల్ హెడ్ మార్క్ నాచ్మన్ మాట్లాడుతూ, "కేవలం AI మోడల్ ఉండటం వల్ల సంస్థ పనితీరు లేదా పని విధానాలు మారిపోవు. వాటిని సంస్థ కార్యకలాపాల్లో సమర్థంగా అనుసంధానం చేయడం కూడా అంతే ముఖ్యం" అని CNBCకి ఇచ్చిన ఇంటర్వ్యూలో వ్యాఖ్యానించారు.
వివరాలు
గోప్యత, నమ్మకానికే మైక్రోసాఫ్ట్ ప్రాధాన్యం
ఈ కొత్త కార్యక్రమంలో గోప్యత, నమ్మకాన్ని ప్రధాన బలంగా మైక్రోసాఫ్ట్ ప్రచారం చేస్తోంది. ఖాతాదారుల డేటా, వారు సంవత్సరాలుగా సొంతం చేసుకున్న వ్యాపార పరిజ్ఞానం పూర్తిగా వారి ఆధీనంలోనే ఉంటుందని హామీ ఇచ్చింది. అలాగే వినియోగదారులకు పూర్తి స్వేచ్ఛ ఉంటుందని తెలిపింది. అవసరాన్ని బట్టి OpenAI, Anthropic, మైక్రోసాఫ్ట్ లేదా ఓపెన్ సోర్స్ AI మోడళ్లలో ఏదైనా ఎంపిక చేసుకునే అవకాశం కల్పిస్తామని పేర్కొంది. దీంతో ఒకే AI మోడల్కే పరిమితం కావాల్సిన అవసరం ఉండదని వివరించింది.