Samsung: AI చిప్లకు పెరుగుతున్న డిమాండ్.. HBM4 ఉత్పత్తిని రెట్టింపు చేయనున్న శాంసంగ్
ఈ వార్తాకథనం ఏంటి
శాంసంగ్ ఎలక్ట్రానిక్స్ వచ్చే ఏడాది HBM4 సిరీస్ హై బ్యాండ్విడ్త్ మెమరీ (HBM) చిప్ల ఉత్పత్తిని రెండింతలకు పైగా పెంచాలని నిర్ణయించింది. కృత్రిమ మేధ (AI) చిప్లకు పెరుగుతున్న డిమాండ్ను అందుకోవడంతో పాటు ఆరో తరం HBM4, ఏడో తరం HBM4E మోడళ్ల ఉత్పత్తిని పెంచేందుకు ఈ నిర్ణయం తీసుకున్నట్లు దక్షిణ కొరియా వార్తా సంస్థ 'సియోల్ ఎకనామిక్ డైలీ' వెల్లడించింది. ఈ క్రమంలో గ్లాస్ క్యారియర్ల అవసరం కూడా ఈ ఏడాదితో పోలిస్తే 2.5 రెట్లు పెరగనుంది.
వివరాలు
గ్లాస్ క్యారియర్ల క్లీనింగ్ పెంపు
HBM తయారీలో కీలకంగా ఉపయోగించే గ్లాస్ క్యారియర్ల క్లీనింగ్ పనులను శామ్సంగ్ మరింత పెంచనుంది.
ప్రస్తుతం నెలకు 20 వేల షీట్లను క్లీనింగ్ చేయిస్తుండగా.. వచ్చే ఏడాది ఈ సంఖ్యను 50 వేలకు పెంచాలని కంపెనీ లక్ష్యంగా పెట్టుకుంది.
గత ఏడాది నెలకు 10 వేల షీట్లు మాత్రమే అవసరం కాగా.. ఈ ఏడాది ఆ సంఖ్య 20 వేలకు చేరింది.
వచ్చే ఏడాది 50 వేలకు పెంచడం ద్వారా గ్లాస్ క్యారియర్ల వినియోగం గణనీయంగా పెరగనుంది.
వివరాలు
HBM తయారీలో గ్లాస్ క్యారియర్ల ప్రాధాన్యం
HBM DRAM వాఫర్ వెనుక భాగంలో తాత్కాలికంగా అమర్చే సపోర్ట్నే గ్లాస్ క్యారియర్ అంటారు.
వాఫర్ను చాలా పలుచగా చేసే సమయంలో, అందులో రంధ్రాలు వేస్తున్నప్పుడు అది వంగిపోకుండా లేదా పగిలిపోకుండా ఈ గ్లాస్ క్యారియర్ రక్షణగా పనిచేస్తుంది.
పరిమిత మందంలోనే అనేక DRAM డైలను ఒకదానిపై మరొకటి పేర్చాల్సి ఉండటంతో.. HBMలో వాఫర్ను పలుచగా చేయడం, దాని వంకరను నియంత్రించడం మరింత కీలకంగా మారుతోంది.
ముఖ్యంగా డైల పొరల సంఖ్య పెరుగుతున్న కొద్దీ ఈ సాంకేతికత ప్రాధాన్యం పెరుగుతుంది.
వివరాలు
HBM ఉత్పత్తి పెంపుపై అంచనాలు
శామ్సంగ్ పెంచాలని చూస్తున్న HBM4, HBM4E చిప్లు 12 లేయర్లకు పైగా ఉండే స్టాకింగ్ టెక్నాలజీపై ఆధారపడి ఉంటాయి.
గ్లాస్ క్యారియర్లను క్లీనింగ్ చేసిన తర్వాత మళ్లీ ఉపయోగించవచ్చు.
అయినప్పటికీ వాటి సంబంధిత క్లీనింగ్ వాల్యూమ్ 2.5 రెట్లు పెరగడం వల్ల HBM4, HBM4E ఉత్పత్తి ఈ ఏడాదితో పోలిస్తే కనీసం రెండింతలు పెరిగే అవకాశం ఉందని పరిశ్రమ వర్గాలు భావిస్తున్నాయి.
ఈ ఏడాది ఫిబ్రవరిలోనే శామ్సంగ్ 10 నానోమీటర్ క్లాస్ ఆరో తరం (1c) DRAM, 4 నానోమీటర్ ప్రాసెస్తో రూపొందించిన బేస్ డైతో HBM4ను భారీ స్థాయిలో ఉత్పత్తి చేసి సరఫరా చేయడం ప్రారంభించింది.
వివరాలు
వచ్చే ఏడాది 2.5 లక్షల వాఫర్లకు చేరే అవకాశం
శామ్సంగ్ HBM ఉత్పత్తి వచ్చే ఏడాది దాదాపు 40 శాతం పెరుగుతుందని పరిశ్రమ అంచనా వేస్తోంది.
ఈ ఏడాది సుమారు 1.8 లక్షల వాఫర్ల నుంచి వచ్చే ఏడాది దాదాపు 2.5 లక్షల వాఫర్లకు ఉత్పత్తి చేరొచ్చని భావిస్తోంది.
ఉత్పత్తుల వారీగా చూస్తే.. HBM4 సిరీస్ వాటా ఈ ఏడాది సుమారు 40 శాతం ఉండగా, వచ్చే ఏడాది HBM4E భారీ ఉత్పత్తి ప్రారంభమవడంతో దాదాపు 80 శాతానికి చేరొచ్చని అంచనా.
"శామ్సంగ్ HBM ఉత్పత్తిని విస్తరిస్తున్న కొద్దీ.. అధిక విలువ కలిగిన HBM4ను కేంద్రంగా చేసుకుంటున్నట్లు కనిపిస్తోంది" అని ఓ పరిశ్రమ అధికారి 'సియోల్ ఎకనామిక్ డైలీ'కి తెలిపారు.