Signal messaging app: సిగ్నల్ మెసేజింగ్ యాప్ ఏమిటి?.. అది ఎంత సురక్షితం?
ఈ వార్తాకథనం ఏంటి
వాట్సాప్ తరహాలోనే, అమెరికాలో 'సిగ్నల్' (Signal) అనే మెసేజింగ్ యాప్‌ను చాటింగ్ కోసం విస్తృతంగా ఉపయోగిస్తున్నారు. అయితే, తాజాగా ఈ యాప్ ద్వారా యెమెన్ వైమానిక దాడులకు సంబంధించిన వ్యూహాలు బయటకు లీక్ అవడం కలకలం రేపింది. ఈ నేపథ్యంలో ఈ యాప్‌పై ఆసక్తి పెరుగుతోంది. ఇంతకీ ఈ యాప్ ఏమిటి?, దీనిని ఎవరు ప్రారంభించారు?.. ఈ యాప్ ప్రత్యేకత ఏమిటి? వైట్‌హౌస్ సిబ్బంది దీన్ని ఎందుకు ఉపయోగిస్తున్నారు? వివరాల్లోకి వెళ్తే...
వివరాలు
సిగ్నల్ యాప్ ఏమిటి?
సిగ్నల్ అనేది ఒక గూఢమెసేజింగ్ యాప్, దీన్ని 'మోక్సీ మార్లిన్‌స్పైక్' (Moxie Marlinspike) అభివృద్ధి చేశారు. ఈ యాప్ ద్వారా టెక్స్ట్ మెసేజెస్, ఫోటోలు, వాయిస్ రికార్డింగ్‌లు మొదలైనవి భాగస్వామ్యం చేసుకోవచ్చు. వాట్సాప్ మాదిరిగానే, సందేశాలను పంపినవారు,స్వీకరించినవారు మాత్రమే చదవగలరు. అంతేకాకుండా, నిర్దిష్ట సమయం తరువాత మెసేజెస్ ఆటోమేటిక్‌గా మాయమయ్యే 'డిస్‌అపేరింగ్ మెసేజ్' ఫీచర్ ఇందులో అందుబాటులో ఉంది.
వివరాలు
సిగ్నల్ ప్రత్యేకత ఏమిటి?
సిగ్నల్ యాప్ అత్యంత సురక్షితమైనదిగా పేరుపొందింది. గణాంకాల ప్రకారం, ప్రపంచవ్యాప్తంగా దాదాపు 7 కోట్లమందికిపైగా దీనిని డౌన్‌లోడ్ చేసుకున్నారు. దీనిని ఉపయోగించడానికి గల ప్రధాన కారణం - ఇది ఇతర మెసేజింగ్ యాప్‌లకన్నా మెరుగైన గుప్తీకరణను (Encryption) అందించడం. ఇదే కారణంగా అమెరికా ఫెడరల్ అధికారులు, వైట్‌హౌస్ సిబ్బంది వంటి సమూహాలు దీనిని అధికంగా ఉపయోగిస్తున్నారు.
వివరాలు
సిగ్నల్ ద్వారా జరిగిన లీక్!
యెమెన్‌లోని హౌతీ తిరుగుబాటుదారులపై జరగనున్న వైమానిక దాడుల వ్యూహంపై ఒక గోప్య చర్చ 'సిగ్నల్' గ్రూప్ చాట్‌లో జరిగింది. అయితే, ఈ చర్చలో భాగంగా 'జెఫ్రీ గోల్డ్‌బర్గ్' అనే ప్రముఖ పాత్రికేయుడిని ఆ గ్రూప్‌లో చేర్చడంతో కీలక సమాచారం లీక్ అయ్యింది. ఈ ఘటన పెద్ద ఎత్తున చర్చనీయాంశంగా మారింది.