Storage Management In WhatsApp: వాట్సప్‌ చాట్ విండోలోనే ఇక స్టోరేజ్ మేనేజ్మెంట్
ఈ వార్తాకథనం ఏంటి
మెటా ఆధీనంలోని ప్రముఖ మెసేజింగ్ యాప్ అయిన వాట్సాప్, యూజర్లకు స్టోరేజ్ నిర్వహణను మరింత సులభతరం చేయనుంది. కొత్త ఫీచర్ ద్వారా యూజర్లు యాప్ సెట్టింగ్స్‌లోకి వెళ్లాల్సిన అవసరం లేకుండా, నేరుగా చాట్ విండో నుండి తమ డివైజ్‌లోని స్టోరేజ్ స్థితిని తనిఖీ చేసుకోవచ్చు. అవసరమైతే, ఫైళ్ళను క్లియర్‌ చేయడం కూడా సులభం అవుతుంది. దీని ద్వారా వాట్సప్‌లో ఎక్కువ స్థలాన్ని ఆక్రమిస్తున్న ఫైళ్ళను సులభంగా గుర్తించి తొలగించుకునే అవకాశం లభిస్తుంది. ఈ ఫీచర్ ప్రస్తుతం టెస్టింగ్ దశలో ఉందని, త్వరలో అందరికీ అందుబాటులోకి రానుందని వాబీటా తన బ్లాగ్ పోస్ట్‌లో పేర్కొంది.
వివరాలు
బల్క్ డిలీషన్ సపోర్ట్
కొత్త ఫీచర్ ద్వారా యూజర్లు వివిధ చాట్లలో షేర్ చేసిన ఫైళ్ళ జాబితాను వాటి సైజ్ ఆధారంగా (పెద్దవి నుండి చిన్నవి వరకు) చూడవచ్చు. అవసరం లేని ఫైళ్ళను డిలీట్ చేయడం ద్వారా స్టోరేజ్ ఖాళీ చేసుకోవచ్చు. బల్క్ డిలీషన్ సపోర్ట్ కూడా అందిస్తుంది, అంటే ఒకేసారి అనేక అనవసర ఫైళ్ళను ఎంచుకుని తొలగించుకోవచ్చు. అవసరమైన ఫైళ్ళకు స్టార్ మార్క్ ఇవ్వడం ద్వారా అవి పొరపాటున తొలగించబడకుండా కాపాడుకోవచ్చు. అదేవిధంగా, ముఖ్యమైన ఫైళ్ళను పిన్ చేయడం ద్వారా స్టోరేజ్ స్క్రీన్ టాప్‌లో ఉంచుకోవచ్చు. ప్రస్తుతం ఈ షార్ట్‌కట్ డెవలప్‌మెంట్ దశలో ఉందని, గూగుల్ ప్లే బీటా ప్రోగ్రామ్‌లో రిజిస్టర్ అయిన యూజర్లకే ఇది ప్రస్తుతానికి అందుబాటులో ఉందని వాబీటా వెల్లడించింది.