Youtube trending: యూట్యూబ్‌లో అదృశ్యం కానున్న'ట్రెండింగ్'.. కారణమిదే!
ఈ వార్తాకథనం ఏంటి
యూట్యూబ్‌ను ఉపయోగించే ప్రతి ఒక్కరికీ 'ట్రెండింగ్' ట్యాబ్‌ సుపరిచితమే. ఈ ట్యాబ్‌ ద్వారా యూట్యూబ్‌లో ప్రస్తుతానికి ఏ వీడియోలు ఎక్కువగా పాపులర్‌ అవుతున్నాయో తెలుసుకోవచ్చు. కొంతమంది వినియోగదారులు ప్రత్యేకంగా ట్రెండింగ్‌లో మాత్రమే వీడియోలు వీక్షించే అలవాటుతో ఉంటారు. అలాగే, కంటెంట్‌ క్రియేటర్లు తమ వీడియోలు ఎంత ప్రాచుర్యం పొందాయో అంచనా వేయడానికి ఈ ట్రెండింగ్ సెక్షన్‌ను ఒక ప్రమాణంగా ఉపయోగించుకుంటారు. అయితే త్వరలో ఈ ట్యాబ్‌ యూట్యూబ్‌లో కనిపించకపోవచ్చు. మరో కొన్ని వారాల్లో దీనిని పూర్తిగా తొలగించనున్నట్లు యూట్యూబ్‌ అధికారికంగా ప్రకటించింది. అయితే, ఈ నిర్ణయం వెనుక ఉన్న కారణాన్ని కంపెనీ స్పష్టంగా వెల్లడించలేదు.
వివరాలు
వినియోగదారుల ప్రవర్తనలో స్పష్టమైన మార్పులు
సాధారణంగా ట్రెండింగ్ ట్యాబ్‌లో వైరల్‌ అయిన వీడియోలు, వార్తా ముఖ్యాంశాలు, ప్రాచుర్యం పొందిన మ్యూజిక్‌ ఆల్బమ్స్‌ వంటివి దర్శనమిస్తూ ఉండేవి. కానీ ఇటీవలి కాలంలో వినియోగదారుల ప్రవర్తనలో స్పష్టమైన మార్పులు చోటు చేసుకున్నాయి. యూజర్లకు వ్యక్తిగత అభిరుచులకు అనుగుణంగా రికమెండేషన్లు చూపించే విధానం (పర్సనలైజ్డ్‌ కంటెంట్‌ సూచనలు) ఎక్కువైంది. వీక్షకులు ఎక్కువగా ఏ రకమైన వీడియోలు చూస్తున్నారో వాటినే యూట్యూబ్‌ హోమ్‌పేజీలో ప్రాధాన్యతగా చూపిస్తోంది. పైగా ట్రెండింగ్‌లో ఉన్న వీడియోలు కూడా వారి హోమ్‌పేజీల్లోనే ప్రత్యక్షమవుతున్నాయి. ఈ నేపథ్యంలో ప్రత్యేకమైన ట్రెండింగ్ ట్యాబ్‌ అవసరం లేదని యూట్యూబ్‌ భావిస్తోంది. అంతేకాకుండా, ఈ మార్పుతో యూజర్లకు నావిగేషన్‌ను మరింత సులభతరం చేయాలని యూట్యూబ్‌ ఉద్దేశిస్తోంది.
వివరాలు
వినియోగదారుల సంఖ్యలో క్రమంగా తగ్గుదల
2015లో తొలిసారి యూట్యూబ్‌ ఈ ట్రెండింగ్ ట్యాబ్‌ను ప్రవేశపెట్టింది. అయితే గత ఐదేళ్లలో ఈ సెక్షన్‌కు వచ్చే వినియోగదారుల సంఖ్యలో క్రమంగా తగ్గుదల చోటు చేసుకోవడం గమనించిన యూట్యూబ్‌ ఈ నిర్ణయం తీసుకున్నట్లు తెలుస్తోంది.