Zimbabwe Test Cricket Record: జింబాబ్వే సరికొత్త చరిత్ర.. ఒకే మ్యాచ్‌లో రెండు ఇన్నింగ్స్‌ల్లోనూ 500 ప్లస్ స్కోర్లు!
ఈ వార్తాకథనం ఏంటి
టెస్టు క్రికెట్‌లో జింబాబ్వే జట్టు సరికొత్త చరిత్ర సృష్టించింది. ఒకే టెస్టు మ్యాచ్‌లో రెండు ఇన్నింగ్స్‌ల్లోనూ 500కు పైగా పరుగులు చేసిన తొలి జట్టుగా ప్రపంచ రికార్డు నెలకొల్పింది. టెస్టు క్రికెట్ చరిత్రలో ఇప్పటివరకు ఏ జట్టూ ఈ ఘనత సాధించలేదు. షార్జా వేదికగా ఆఫ్ఘనిస్తాన్‌తో జరిగిన తొలి టెస్టులో జింబాబ్వే ఈ అరుదైన రికార్డును అందుకుంది. ఐదు రోజుల పాటు ఉత్కంఠగా సాగిన ఈ మ్యాచ్ చివరకు డ్రాగా ముగిసింది.
వివరాలు
రెండు ఇన్నింగ్స్‌ల్లోనూ 500కు పైగా పరుగులు
ఈ టెస్టులో తొలుత బ్యాటింగ్ చేసిన జింబాబ్వే తొలి ఇన్నింగ్స్‌లో 504 పరుగులు చేసింది. అనంతరం బ్యాటింగ్‌కు దిగిన ఆఫ్ఘనిస్తాన్ 514 పరుగులు సాధించింది.
దీంతో ఆ జట్టుకు 10 పరుగుల స్వల్ప ఆధిక్యం లభించింది. రెండో ఇన్నింగ్స్‌లోనూ జింబాబ్వే బ్యాటర్లు అద్భుతంగా రాణించారు.
ఏకంగా 523/5 పరుగులు చేసి ఇన్నింగ్స్‌ను డిక్లేర్ చేశారు. దీంతో ఒకే టెస్టు మ్యాచ్‌లో రెండు ఇన్నింగ్స్‌ల్లోనూ 500కు పైగా పరుగులు చేసిన తొలి జట్టుగా జింబాబ్వే ప్రపంచ రికార్డు సృష్టించింది.
వివరాలు
ఎర్విన్ డబుల్ సెంచరీ.. మదెవెరె తొలి టెస్టు శతకం
జింబాబ్వే రెండో ఇన్నింగ్స్‌లో ఆ జట్టు కెప్టెన్ క్రెయిగ్ ఎర్విన్ అద్భుతంగా బ్యాటింగ్ చేశాడు. 279 బంతులు ఎదుర్కొని 206 పరుగులతో అజేయంగా నిలిచాడు.
మరోవైపు వెస్లీ మదెవెరె కూడా 100 పరుగులతో నాటౌట్‌గా నిలిచి తన కెరీర్‌లో తొలి టెస్టు సెంచరీని నమోదు చేశాడు.
41 ఏళ్ల 82 రోజుల వయసులో డబుల్ సెంచరీ సాధించిన క్రెయిగ్ ఎర్విన్.. టెస్టు క్రికెట్ చరిత్రలో ఈ ఘనత సాధించిన మూడో పెద్ద వయస్కుడైన ఆటగాడిగా నిలిచాడు.
వివరాలు
భారీ స్కోర్లతో ముగిసిన మ్యాచ్ డ్రా
రెండు జట్ల బ్యాటర్లు భారీ స్కోర్లు సాధించడంతో ఈ మ్యాచ్ చివరకు డ్రాగా ముగిసింది.
జింబాబ్వే తొలి ఇన్నింగ్స్‌లో బ్రెండన్ టేలర్ 131 పరుగులు చేయగా, బ్రియాన్ బెన్నెట్ 128 పరుగులతో రాణించాడు. ఆఫ్ఘనిస్తాన్ తరఫున రహ్మత్ షా 173 పరుగులతో ఆకట్టుకున్నాడు.
సెదిఖుల్లా అటల్, రహ్మానుల్లా జద్రాన్ కూడా సెంచరీలు సాధించారు. కాగా, ఆఫ్ఘనిస్తాన్, జింబాబ్వే జట్లు షార్జా వేదికగా రెండు టెస్టుల సిరీస్‌లో తలపడుతున్నాయి.
ఈ సిరీస్‌లో రెండో టెస్టు నవంబర్ 13 నుంచి 17 వరకు షార్జాలోనే జరగనుంది.