Mohammed Shami: షమీ మళ్లీ జట్టులోకి వచ్చే అవకాశముంది: ఆకాశ్ చోప్రా
ఈ వార్తాకథనం ఏంటి
మహ్మద్‌ షమీ (Mohammed Shami) కొంతకాలంగా జాతీయ జట్టుకు సెలెక్ట్‌ కావడం లేదు. త్వరలో స్వదేశంలో జరగబోతున్న దక్షిణాఫ్రికా సిరీస్‌కు ప్రకటించిన జట్టులో కూడా అతనికి చోటు లభించలేదు. అయితే దేశవాళీ క్రికెట్‌లో మాత్రం షమీ తన అద్భుత ఫామ్‌ను కొనసాగిస్తున్నాడు. ఫిట్‌నెస్‌ సంబంధంగా వస్తున్న విమర్శలకు కూడా తన ప్రదర్శనతో సమాధానం ఇస్తున్నాడు. తాను మళ్లీ నీలి జెర్సీ ధరించే రోజులు దగ్గరలోనే ఉన్నాయని షమీ విశ్వాసం వ్యక్తం చేశాడు. అయినప్పటికీ, అజిత్ అగార్కర్‌ ఆధ్వర్యంలోని సెలక్షన్‌ కమిటీ ఇప్పటివరకు అతనికి అవకాశం ఇవ్వకుండా ఉంది.
వివరాలు
షమికి మళ్లీ జాతీయ జట్టులో స్థానం దక్కడం ఖాయం
ఈ పరిస్థితుల్లో షమీ అంతర్జాతీయ ప్రయాణం ముగిసినట్టేనా? అనే అనుమానాలు సోషల్‌ మీడియాలో పెద్ద ఎత్తున వినిపిస్తున్నాయి. స్వదేశంలో జరగబోయే దక్షిణాఫ్రికా సిరీస్‌కూ అతను ఎంపిక కాకపోవడంతో ఆ ఊహాగానాలు మరింత బలపడుతున్నాయి. అయితే, షమికి మళ్లీ జాతీయ జట్టులో స్థానం దక్కడం ఖాయం అనే అభిప్రాయాన్ని టీమిండియా మాజీ క్రికెటర్‌ ఆకాశ్ చోప్రా వ్యక్తం చేశాడు. ఆకాశ్ చోప్రా మాట్లాడుతూ.. "షమీ ఇకపై జట్టులోకి రాడని కొన్ని వర్గాలు ప్రచారం చేస్తున్నాయి. అయితే సెలెక్షన్‌ కమిటీ అటువంటి నిర్ణయం ఎప్పుడూ వెల్లడించలేదు. అతడు దేశవాళీ మ్యాచ్‌ల్లో ఇలా వికెట్లు పడగొడుతూ ఉంటే తిరిగి భారత్‌ తరఫున ఆడటం ఖాయం. ఈ వార్తలన్నీ ఆధారంలేనివే" అని స్పష్టం చేశాడు.
వివరాలు
షమీ ఎంపిక గురించి ఆందోళన అవసరంలేదు
"టీమ్‌ ఇండియాకు ఫాస్ట్‌ బౌలర్ల అవసరం ఎప్పుడూ ఉంటుంది. గాయాలు, వర్క్‌లోడ్ మేనేజ్‌మెంట్‌ వంటి అంశాల కారణంగా రాబోయే రోజుల్లో మరిన్ని అవకాశాలు వస్తాయి. కాబట్టి షమీ ఎంపిక గురించి ఆందోళన అవసరంలేదు. అతడు తప్పకుండా తిరిగి జట్టులో కనిపిస్తాడు" అని చోప్రా విశ్లేషించాడు.