IND vs AFG: ఆఫ్ఘనిస్తాన్ సిరీస్కు భారత జట్టు ఎంపిక.. యువ ఆటగాళ్లకు అవకాశం!
ఈ వార్తాకథనం ఏంటి
ఐపీఎల్ 2026 ముగిసిన వెంటనే భారత క్రికెట్ జట్టు మరో ఆసక్తికరమైన సిరీస్కు సిద్ధమవుతోంది. స్వదేశంలో ఆఫ్ఘనిస్తాన్తో జరిగే ఒక టెస్టు మ్యాచ్తో పాటు మూడు వన్డేల సిరీస్ కోసం జట్టు ఎంపిక వచ్చే వారం జరగనుంది. ఈ సిరీస్లో కొంతమంది సీనియర్ ఆటగాళ్లకు విశ్రాంతి ఇచ్చి, యువ ఆటగాళ్లకు అవకాశాలు కల్పించే అవకాశం ఉన్నట్లు తెలుస్తోంది.
వివరాలు
వచ్చే వారంలో టీమిండియా ఎంపిక ...
అజిత్ అగార్కర్ నేతృత్వంలోని బీసీసీఐ సెలక్షన్ కమిటీ మే 19న ఆఫ్ఘనిస్తాన్తో సిరీస్ కోసం భారత జట్టును ప్రకటించనుంది. తాజా సమాచారం ప్రకారం, కొత్త చండీగఢ్లోని ముల్లాన్పూర్ స్టేడియంలో జరిగే ఏకైక టెస్టుతో ఈ పర్యటన ప్రారంభమవుతుంది. అనంతరం జూన్ 14, 17, 20 తేదీల్లో మూడు వన్డే మ్యాచ్లు జరుగనున్నాయి. ఈ సిరీస్ టెస్ట్ ఛాంపియన్షిప్లో భాగం కాకపోయినా, భారత్ దీనిని ఎంతో ప్రాధాన్యంగా తీసుకుంటోంది. పనిభారం నిర్వహణలో భాగంగా స్టార్ పేసర్ జస్ప్రీత్ బుమ్రాకు ఈ సిరీస్ నుంచి విశ్రాంతి ఇవ్వవచ్చని సమాచారం. ఆయన స్థానంలో గుర్నూర్ బ్రార్, ఆకిబ్ నబీ వంటి యువ బౌలర్లకు తొలిసారి జాతీయ జట్టులో చోటు దక్కే అవకాశం ఉంది.
వివరాలు
రిషబ్ పంత్కు షాక్.. ఇషాన్ కిషన్కు అవకాశం?
బ్యాటింగ్ విభాగంలో కెప్టెన్ శుభ్మన్ గిల్, యశస్వి జైస్వాల్, కేఎల్ రాహుల్ వంటి కీలక ఆటగాళ్లు తమ స్థానాలను కొనసాగించే అవకాశం కనిపిస్తోంది. వన్డే జట్టు ఎంపికలో కీలక మార్పులు జరిగే సూచనలు ఉన్నాయి. ఐపీఎల్ 2026లో లక్నో సూపర్జెయింట్స్ తరఫున ఆశించిన స్థాయిలో ప్రదర్శన ఇవ్వని రిషబ్ పంత్ను వన్డే జట్టు నుంచి తప్పించే అవకాశం ఉన్నట్లు వార్తలు వినిపిస్తున్నాయి. పంత్ గత 11 ఇన్నింగ్స్ల్లో కేవలం 251 పరుగులు మాత్రమే సాధించాడు. మరోవైపు సన్రైజర్స్ హైదరాబాద్ తరఫున అద్భుత ఫామ్లో ఉన్న ఇషాన్ కిషన్ 185 స్ట్రైక్ రేట్తో 420 పరుగులు చేసి అందరి దృష్టిని ఆకర్షించాడు.
వివరాలు
వెన్ను నొప్పితో హార్దిక్ పాండ్యా..
దేశవాళీ టోర్నీల్లోనూ మంచి ప్రదర్శన చేసిన కిషన్, రిజర్వ్ వికెట్ కీపర్గా జట్టులోకి రావడం దాదాపు ఖాయంగా కనిపిస్తోంది. స్పిన్ ఆల్రౌండర్ స్థానానికి రవీంద్ర జడేజా, అక్షర్ పటేల్ మధ్య గట్టి పోటీ నెలకొంది. వన్డేల్లో లోయర్ ఆర్డర్లో జడేజా బ్యాటింగ్ తీరు పట్ల సెలక్టర్లు అసంతృప్తిగా ఉన్నారని సమాచారం. ముఖ్యంగా చివరి ఓవర్లలో వేగంగా పరుగులు రాబట్టడంలో ఆయన ఇబ్బంది పడటం అక్షర్ పటేల్కు అనుకూలంగా మారవచ్చు. వెన్నునొప్పితో బాధపడుతున్న హార్దిక్ పాండ్యా లభ్యతపై ఇంకా స్పష్టత రాలేదు. 2027 ప్రపంచకప్కు సన్నాహకంగా ఈ సిరీస్ భారత జట్టుకు చాలా కీలకంగా మారనుంది.