Mission Drishti: బెంగళూరు స్టార్టప్ గెలాక్సీఐ స్పేస్ 'మిషన్ దృష్టి' శాటిలైట్ విజయవంతం
ఈ వార్తాకథనం ఏంటి
భారత ప్రైవేట్ అంతరిక్ష రంగంలో ఒక అపూర్వమైన ఘట్టం నమోదైంది. బెంగళూరును కేంద్రంగా చేసుకుని కార్యకలాపాలు నిర్వహిస్తున్న 'గెలాక్సీఐ స్పేస్' సంస్థ రూపొందించిన 'మిషన్ దృష్టి' ఉపగ్రహాన్ని ఆదివారం విజయవంతంగా అంతరిక్షంలో ప్రవేశపెట్టారు. విదేశీ ప్రయోగ వేదిక ద్వారా శక్తివంతమైన రాకెట్ సహాయంతో ఈ ఉపగ్రహాన్ని నింగిలోకి పంపించడం జరిగింది. దేశీయ ప్రైవేట్ అంతరిక్ష వ్యవస్థ అభివృద్ధిలో ఇది ఒక కీలక ముందడుగుగా నిపుణులు అభిప్రాయపడుతున్నారు. దాదాపు 190 కిలోల బరువుతో రూపొందిన 'మిషన్ దృష్టి' ఉపగ్రహం, ఇప్పటివరకు ఒక భారతీయ ప్రైవేట్ సంస్థ నిర్మించిన అతిపెద్ద ఉపగ్రహంగా గుర్తింపు పొందింది. అంతేకాకుండా, ఇది ప్రపంచంలోనే తొలి 'ఆప్టోసార్' సాంకేతికతను కలిగి ఉండటం విశేషం.
వివరాలు
ఆనందం వ్యక్తం చేసిన ప్రధానమంత్రి
ఈ సాంకేతికతతో ఉపగ్రహ పరిశీలన సామర్థ్యాలు మరింత మెరుగవుతాయని నిపుణులు చెబుతున్నారు. ఈ విజయంతో గెలాక్సీఐ స్పేస్ సంస్థ, అంతరిక్ష సాంకేతిక రంగంలో కొత్త మార్గాలను సృష్టిస్తున్న స్టార్టప్ల జాబితాలో స్థానం సంపాదించింది. ఈ విజయంపై ప్రధానమంత్రి నరేంద్ర మోదీ ఆనందం వ్యక్తం చేశారు. గెలాక్సీఐ సంస్థ వ్యవస్థాపకులు, మొత్తం బృందాన్ని ఆయన అభినందించారు.
వివరాలు
ఇది భారత యువత ఆవిష్కరణల పట్ల ఉన్న అభిరుచికి నిదర్శనమన్న ప్రధాని మోదీ
ఈ సందర్భంగా ప్రధాని 'ఎక్స్'లో స్పందిస్తూ, "మన దేశ అంతరిక్ష ప్రయాణంలో మిషన్ దృష్టి ఒక గొప్ప విజయాన్ని సూచిస్తుంది. ప్రపంచంలోనే తొలి ఆప్టోసార్ సాంకేతికతతో కూడిన ఉపగ్రహాన్ని, అలాగే దేశంలో ప్రైవేటుగా నిర్మించిన అతిపెద్ద ఉపగ్రహాన్ని విజయవంతంగా ప్రయోగించడం, మన యువతలోని సృజనాత్మకతకు, దేశాభివృద్ధి పట్ల ఉన్న అంకితభావానికి నిదర్శనం. గెలాక్సీఐ వ్యవస్థాపకులు, బృందానికి నా హృదయపూర్వక అభినందనలు, శుభాకాంక్షలు" అని పేర్కొన్నారు.