ముంబై ఇండియన్స్ కు గట్టి షాక్.. ఐపీఎల్ నుంచి జోఫ్రా ఆర్చర్ ఔట్
ఇండియన్ ప్రీమియర్ లీగ్ లో భాగంగా 54వ మ్యాచ్ లో ముంబై ఇండియన్స్, రాయల్ ఛాలెంజర్స్ బెంగళూరు తలపడనున్నాయి. ఈ మ్యాచ్ కు ముందే ముంబై ఇండియన్స్ కి గట్టి ఎదురుదెబ్బ తగిలింది. ఆ జట్టు స్టార్ పేసర్ జోఫ్రా ఆర్చర్ ఐపీఎల్ నుంచి తప్పుకున్నట్లు ప్రకటించాడు. గాయంతో పాటు ఫిటెనెస్ సమస్యలతో ఐపీఎల్ మిగిలిన మ్యాచ్ లకు అతను దూరమయ్యాడు. జోఫ్రా అర్చర్ స్థానంలో మరో ఇంగ్లాండ్ పేసర్ క్రిస్ జోర్డాన్ ను తీసుకున్నట్లు ముంబై ఇండియన్స్ ప్రకటించింది. గాయం కారణంగా రెండేళ్ల తర్వాత ఆర్చర్ ఐపీఎల్ లో రీఎంట్రీ ఇచ్చాడు. తొలి మ్యాచ్లో బరిలో దిగిన ఆర్చర్ మోచేతికి గాయమైంది. దీంతో తర్వాత జరిగిన నాలుగు మ్యాచ్ లకు దూరమయ్యాడు.
ఆర్చర్ స్థానంలో క్రిజ్ జోర్డాన్
ఆర్చర్ ఆడిన ఐదు మ్యాచ్ ల్లో కేవలం రెండు వికెట్లు తీశాడు. ఐపీఎల్ లో వేలంలో అతన్ని ఎనిమిది కోట్లకు ముంబై ఇండియన్స్ కొనుగోలు చేసింది. బుమ్రా లోటును ఆర్చర్ తీరుస్తాడని ముంబై ఆభిమానులు ఆశించారు. కానీ వారి ఆశలను ఆర్చర్ వమ్ము చేశాడు. ఆర్చర్ స్థానంలో క్రిజ్ జోర్డాన్ జట్టులో చేరాడు. ఇప్పటికే ముంబై ఆటగాళ్లతో కలిసి సాధన చేస్తున్నట్లు సమాచారం. నేటి మ్యాచ్ లో జోర్డాన్ బరిలో దిగే అవకాశాలు కనిపిస్తున్నాయి. 2016 సీజన్‌లో జోర్డాన్ ఐపీఎల్లో ఎంట్రీ ఇచ్చాడు. ఇప్పటివరకూ 28 ఐపీఎల్ మ్యాచ్ లు ఆడి 27 వికెట్లు తీశాడు.
