Loading...
MS Dhoni IPL Career: ఐపీఎల్‌కు ధోనీ వీడ్కోలు.. సీఎస్‌కే మెంటార్‌గా కొత్త బాధ్యత.. ఆ ఐదు ఇన్నింగ్స్ ప్రత్యేకమే!
ఐపీఎల్‌కు ధోనీ వీడ్కోలు.. సీఎస్‌కే మెంటార్‌గా కొత్త బాధ్యత.. ఆ ఐదు ఇన్నింగ్స్ ప్రత్యేకమే!

MS Dhoni IPL Career: ఐపీఎల్‌కు ధోనీ వీడ్కోలు.. సీఎస్‌కే మెంటార్‌గా కొత్త బాధ్యత.. ఆ ఐదు ఇన్నింగ్స్ ప్రత్యేకమే!

వ్రాసిన వారు Jayachandra Akuri
Nov 17, 2026
05:10 pm

ఈ వార్తాకథనం ఏంటి

ఐపీఎల్ చరిత్రలో ఎంతోమంది ఆటగాళ్లు తమదైన ముద్ర వేశారు. కానీ, ఈ టోర్నీపై చెరగని ప్రభావం చూపిన ఆటగాళ్లలో మహేంద్ర సింగ్ ధోనీది ప్రత్యేక స్థానం. కెప్టెన్‌గా ఐదు ట్రోఫీలు అందించిన ధోనీ.. ఫినిషర్‌గా ఎన్నో ఉత్కంఠభరిత క్షణాలను అభిమానులకు అందించాడు. 19 ఏళ్ల ఐపీఎల్ ప్రస్థానానికి వీడ్కోలు పలికి, చెన్నై సూపర్ కింగ్స్ మెంటార్‌గా కొత్త పాత్రలోకి అడుగుపెడుతున్న వేళ.. పసుపు జెర్సీలో అతడు ఆడిన కొన్ని అద్భుతమైన ఇన్నింగ్స్‌లను మరోసారి గుర్తుచేసుకుందాం. నాణ్యత, సందర్భం, మ్యాచ్‌పై ప్రభావం అనే మూడు ప్రమాణాల ఆధారంగా నిలిచిన ఐదు ఇన్నింగ్స్ ఇవి.

వివరాలు

1. 84 నాటౌట్ (48 బంతుల్లో) vs ఆర్సీబీ - 2019

ఈ మ్యాచ్‌లో చెన్నై ఓడిపోయినా.. ధోనీ ఆడిన ఇన్నింగ్స్ మాత్రం ఐపీఎల్ చరిత్రలో ప్రత్యేకంగా నిలిచిపోయింది.

162 పరుగుల లక్ష్య ఛేదనలో చెన్నై 83/5తో కష్టాల్లో ఉన్నప్పుడు ధోనీ క్రీజులోకి వచ్చాడు. ఆ తర్వాత తనదైన శైలిలో ప్రత్యర్థి బౌలర్లపై విరుచుకుపడ్డాడు.

చివరి ఓవర్‌లో చెన్నై విజయానికి 26 పరుగులు అవసరం. బౌలర్ ఉమేశ్ యాదవ్. సాధారణంగా చూస్తే ఇది అసాధ్యమైన లక్ష్యమే.

కానీ ధోనీ మాత్రం తొలి ఐదు బంతుల్లోనే 24 పరుగులు బాదాడు. సిక్స్‌లు, ఫోర్లతో చిన్నస్వామి స్టేడియాన్ని హోరెత్తించాడు.

చివరి బంతికి రెండు పరుగులు చేయాల్సి ఉండగా, ధోనీ బ్యాట్‌కు బంతి తగల్లేదు. దీంతో చెన్నై ఒక్క పరుగు తేడాతో ఓటమి పాలైంది.

వివరాలు

2. 54 నాటౌట్ (29 బంతుల్లో) vs కింగ్స్ ఎలెవన్ పంజాబ్ - 2010

ప్లేఆఫ్‌కు చేరుకోవాలంటే 193 పరుగులు చేయాల్సిన కీలకమైన మ్యాచ్ ఇది. సురేశ్ రైనా, బద్రీనాథ్ ఔటవడంతో చెన్నై జట్టు కష్టాల్లో పడింది.

ఈ సమయంలో కెప్టెన్ ధోనీ బాధ్యత తీసుకున్నాడు. కేవలం 29 బంతుల్లో అజేయంగా 54 పరుగులు చేసి జట్టును విజయతీరాలకు చేర్చాడు.

చివరి ఓవర్‌లో ఇర్ఫాన్ పఠాన్ బౌలింగ్‌లో లాంగ్ ఆన్ మీదుగా బాదిన విన్నింగ్ సిక్స్ ఇప్పటికీ సీఎస్‌కే అభిమానులకు గుర్తుండిపోయే షాట్.

ఈ విజయంతో చెన్నై ప్లేఆఫ్‌కు అర్హత సాధించింది. ఆ తర్వాత తొలి ఐపీఎల్ టైటిల్ దిశగా సాగిన ప్రయాణంలో ఈ ఇన్నింగ్స్ కీలకంగా నిలిచింది. ధోనీ కెప్టెన్సీ, ఫినిషింగ్ నైపుణ్యానికి ఇది ఓ మైలురాయి.

ADVERTISEMENT

వివరాలు

3. 70 నాటౌట్ (34 బంతుల్లో) vs ఆర్సీబీ - 2018

రెండేళ్ల నిషేధం తర్వాత చెన్నై సూపర్ కింగ్స్ ఐపీఎల్‌లోకి తిరిగి వచ్చిన సీజన్ ఇది. ఆర్సీబీ నిర్దేశించిన 206 పరుగుల భారీ లక్ష్యాన్ని ఛేదించే క్రమంలో చెన్నై నాలుగు వికెట్లు కోల్పోయి కష్టాల్లో పడింది.

ఈ దశలో క్రీజులోకి వచ్చిన ధోనీ.. అంబటి రాయుడుతో కలిసి ఐదో వికెట్‌కు 101 పరుగుల భాగస్వామ్యాన్ని నెలకొల్పాడు. కేవలం 34 బంతుల్లో ఒక ఫోర్, 7 భారీ సిక్స్‌లతో 70 పరుగులు చేసి నాటౌట్‌గా నిలిచాడు.

చివరి బంతిని సిక్స్‌గా మలిచి, రెండు బంతులు మిగిలుండగానే జట్టుకు విజయాన్ని అందించాడు. వయసు పెరిగినా, బ్యాటింగ్‌లో పదును తగ్గలేదని విమర్శలకు తన ఆటతోనే సమాధానమిచ్చాడు.

చిన్నస్వామి స్టేడియంలో ధోనీ ఆధిపత్యానికి ఈ ఇన్నింగ్స్ మరో ఉదాహరణగా నిలిచింది.

ADVERTISEMENT

వివరాలు

4. 79 నాటౌట్ (44 బంతుల్లో) vs కింగ్స్ ఎలెవన్ పంజాబ్ - 2018

ఆర్సీబీపై అద్భుత ఇన్నింగ్స్ ఆడిన మరుసటి రోజే ధోనీ మరోసారి తన బ్యాటింగ్ సత్తా చాటాడు. 198 పరుగుల లక్ష్య ఛేదనలో చెన్నై టాప్ ఆర్డర్ కుప్పకూలడంతో జట్టును గెలిపించే బాధ్యత అతడిపై పడింది.

ధోనీ 44 బంతుల్లో 6 ఫోర్లు, 5 సిక్స్‌లతో అజేయంగా 79 పరుగులు చేశాడు. చివరి ఓవర్ వరకు పోరాడి మ్యాచ్‌ను ఉత్కంఠభరితంగా మార్చాడు. అయితే పంజాబ్ నాలుగు పరుగుల తేడాతో విజయం సాధించింది.

ఫలితం చెన్నైకి అనుకూలంగా లేకపోయినా.. వరుసగా రెండు రోజుల్లో ధోనీ చూపించిన ఫిట్‌నెస్, పవర్ హిట్టింగ్ అభిమానులను ఆశ్చర్యపరిచాయి.

ఓడినా, గెలిచినా మ్యాచ్‌పై తనదైన ముద్ర వేయగలడనే విషయాన్ని ఈ ఇన్నింగ్స్ మరోసారి నిరూపించింది.

వివరాలు

5. 75 నాటౌట్ (46 బంతుల్లో) vs రాజస్థాన్ రాయల్స్ - 2019

చెపాక్ స్పిన్‌కు అనుకూలమైన పిచ్‌పై చెన్నై 88/4తో కష్టాల్లో ఉన్నప్పుడు కెప్టెన్ ధోనీ ఇన్నింగ్స్‌ను చక్కదిద్దే బాధ్యత తీసుకున్నాడు.

టాస్ ఓడి తొలుత బ్యాటింగ్‌కు దిగిన చెన్నై జట్టును ఆదుకుంటూ ముందుగా స్కోరు బోర్డును ముందుకు నడిపించాడు.

ఆ తర్వాత తనదైన శైలిలో దూకుడు పెంచాడు. 46బంతుల్లో 4 ఫోర్లు, 4 సిక్స్‌లతో అజేయంగా 75 పరుగులు చేశాడు. దీంతో చెన్నై 175/5స్కోరు సాధించింది.

లక్ష్య ఛేదనలో రాజస్థాన్ జట్టు 167పరుగులకే పరిమితమైంది. ఎనిమిది పరుగులతో సీఎస్‌కే విజయం సాధించింది.

ఈమ్యాచ్‌లో ప్లేయర్ ఆఫ్ ది మ్యాచ్ అవార్డు ధోనీనే వరించింది. నెమ్మదైన చెపాక్ పిచ్‌పై పరిస్థితులను అంచనా వేసి, చివరి ఓవర్లలో ఎలా చెలరేగాలో యువ క్రికెటర్లకు నేర్పిన ఇన్నింగ్స్ ఇది.

వివరాలు

రికార్డులకు అతీతంగా ధోనీ ప్రభావం

ధోనీ ఐపీఎల్ గణాంకాలు కూడా అతడి ప్రస్థానాన్ని చెబుతాయి. 264 మ్యాచ్‌లు, 5 వేలకు పైగా పరుగులు, 24 అర్ధ సెంచరీలు.. ఇవన్నీ రికార్డు పుస్తకాల్లో నిలిచిపోతాయి.

అయితే చివరి ఓవర్లో ఎన్ని పరుగులు అవసరమో ప్రశాంతంగా లెక్కించే తీరు, ఎంతటి ఒత్తిడిలోనైనా చెరగని చిరునవ్వు.. ఇవే కోట్లాది మంది అభిమానుల గుండెల్లో అతడిని 'తలా'గా నిలిపాయి.

వచ్చే సీజన్‌లో మైదానంలో ఆటగాడిగా కాకుండా సీఎస్‌కే డగౌట్ నుంచి తన అనుభవాన్ని, ప్రశాంతతను జట్టుకు పంచనున్నాడు.

ఫినిషర్‌గా ధోనీ ప్రస్థానం ముగిసిందనే కథనాల నేపథ్యంలో.. మెంటార్‌గా అతడి కొత్త అధ్యాయం ఎలా సాగుతుందో చూడాలి.

ADVERTISEMENT