క్వార్టర్స్‌కు చేరుకున్న వింబుల్డన్ ఛాంపియన్ రిబాకినా
ప్రస్తుత వింబుల్డన్ ఛాంపియన్ ఎలెనా రిబాకినా మరోసారి చెలరేగింది. 2023 అబుదాబి ఓపెన్ క్వార్టర్ ఫైనల్స్‌కు చేరుకొని సత్తా చాటింది. రౌండ్ ఆఫ్-16 క్లాష్‌లో కరోలియా ప్లిస్కోవాపై విజయం సాధించింది. ఆస్ట్రేలియా ఓపెన్ 2023 ఫైనల్‌కు చేరిన రెబాకినా వరుస సెట్లలో ప్లిస్కోవాను మట్టి కరిపించింది. కేవలం 69 నిమిషాల్లో జరిగిన ఈ పోటీలో రైబాకినా 6-4, 6-2 తేడాతో ప్లిస్కోవాను చిత్తు చేసింది. అదే సమయంలో బార్బోరా క్రెజ్‌సికోవాపై లియుడ్మిలా సామ్సోనోవా విజయం సాధించడంతో పాటు డారియా కసత్కినా 1-6, 6-0, 6-2తో జిల్ టీచ్‌మన్‌పై గెలుపొందింది. రైబాకినా చేసిన మూడు ఏస్‌లతో పోలిస్తే ప్లిస్కోవా ఏడు ఏస్‌లు సాధించింది. రైబాకినా మొదటి సర్వ్‌లో 74శాతం, రెండో‌సర్వ్‌లో 83శాతం విజయాన్ని సాధించింది.
క్వార్టర్ ఫైనల్లోకుడెర్మెటోవాతో తలపడనున్న శాంసోనోవా
ప్లిస్కోవాపై రైబాకినా తన హెచ్2హెచ్ సంఖ్యను 3-0కి మెరుగుపరుచుకోవడం విశేషం. రైబాకినా గతంలో 2022 గ్వాడలజారా, 2020 దుబాయ్‌లో మాజీ ప్రపంచ నంబర్ వన్ ప్లిస్కోవాను ఓడించిన విషయం తెలిసిందే. 2023లో రైబాకినా 8-3తో గెలుపు-ఓటమి రికార్డును కలిగి ఉంది. అనంతరం రెండు సెట్లలో క్రెజ్‌సికోవాను ఓడించినశాంసోనోవా తన మొదటి క్వార్టర్-ఫైనల్‌కు చేరుకుంది. శాంసోనోవా తొలి సెట్‌లో 4-1, రెండో సెట్‌లో 5-2తో ఆధిక్యంలోకి వెళ్లినప్పటికీ క్రెజ్‌సికోవా సత్తా చాటింది. చివరికి 2 గంటల 24 నిమిషాల్లో శాంసోనోవా విజయం సాధించడం గమనార్హం. శాంసోనోవా ప్రస్తుతం క్వార్టర్ ఫైనల్‌లో వెరోనికా కుడెర్మెటోవాతో తలపడనుంది.
