ICC Ban: 2025 ఆసియా కప్ వివాదం..హరిస్ రవూఫ్‌కు రెండు మ్యాచ్‌ల నిషేధం.. సూర్యకుమార్ యాదవ్‌కు జరిమానా
ఈ వార్తాకథనం ఏంటి
2025 ఆసియా కప్‌లో భారత్ - పాకిస్థాన్ జట్ల మధ్య జరిగిన మూడు కీలక మ్యాచ్‌లలో ఉద్రిక్తత వాతావరణం నెలకొన్న విషయం తెలిసిందే. ఆటగాళ్ల ప్రవర్తనపై పలు విమర్శలు రావడంతో, ఐసీసీ ఈ ఘటనలను ప్రవర్తనా నియమావళి ఉల్లంఘనలుగా గుర్తించింది. ఈ నేపధ్యంలో, మంగళవారం దుబాయ్‌లో జరిగిన అంతర్జాతీయ క్రికెట్ కౌన్సిల్ సమావేశంలో ఈ అంశంపై సమగ్ర చర్చ జరిగింది. ఈ సమావేశం అనంతరం, ఐసీసీ పాకిస్థాన్ వేగవంతమైన బౌలర్ హరిస్ రవూఫ్‌కు రెండు మ్యాచ్‌ల నిషేధం విధించగా, టీమిండియా కెప్టెన్ సూర్యకుమార్ యాదవ్‌పై మ్యాచ్ ఫీజులో 30 శాతం జరిమానా విధించింది.
వివరాలు
కేసును విచారించిన ఎమిరేట్స్‌కి చెందిన ఐసీసీ ఎలైట్ ప్యానెల్ మ్యాచ్ రిఫరీలు
దుబాయ్‌లో జరిగిన ఈ సమావేశంలో భారత్-పాకిస్థాన్ మ్యాచ్‌ల సమయంలో ఆటగాళ్ల ప్రవర్తనపై సమీక్ష జరిపిన ఐసీసీ, సూర్యకుమార్ యాదవ్, జస్‌ప్రీత్ బుమ్రా, అర్ష్‌దీప్ సింగ్, హరిస్ రవూఫ్, సాహిబ్‌జాదా ఫర్హాన్ లపై చర్యలు తీసుకున్నట్లు అధికారిక ప్రకటన విడుదల చేసింది. ఈ చర్యలు సెప్టెంబర్ 14, 21, 28 తేదీల్లో జరిగిన మూడు భారత్-పాకిస్థాన్ మ్యాచ్‌లకు సంబంధించినవని స్పష్టంచేసింది. ఈ కేసులను ఎమిరేట్స్‌కి చెందిన ఐసీసీ ఎలైట్ ప్యానెల్ మ్యాచ్ రిఫరీలు విచారించారు.
వివరాలు
అసలు ఏమైందంటే..
సెప్టెంబర్ 14న భారత్ - పాకిస్థాన్ మధ్య జరిగిన మొదటి మ్యాచ్‌లో ఆటగాళ్ల మధ్య ఉద్రిక్తత చోటుచేసుకుంది. మ్యాచ్ రిఫరీ రిచీ రిచర్డ్‌సన్ ఈ కేసును విచారించారు. ఐసీసీ ప్రవర్తనా నియమావళిలోని ఆర్టికల్ 2.21 ఉల్లంఘనకు సంబంధించి సూర్యకుమార్ యాదవ్ దోషిగా తేలారు. ఆయన ప్రవర్తన ఆట ప్రతిష్టను దెబ్బతీసేలా ఉందని తేలడంతో, ఐసీసీ ఆయనపై మ్యాచ్ ఫీజులో 30% జరిమానా విధించడంతో పాటు రెండు డీమెరిట్ పాయింట్లు ఇచ్చింది. అదే మ్యాచ్‌లో సాహిబ్‌జాదా ఫర్హాన్‌కు అధికారిక హెచ్చరికతో పాటు ఒక డీమెరిట్ పాయింట్ విధించబడింది. అలాగే హరిస్ రవూఫ్ కూడా అదే నియమావళిని ఉల్లంఘించినందుకు 30% జరిమానా మరియు రెండు డీమెరిట్ పాయింట్లు పొందారు.
వివరాలు
సెప్టెంబర్ 21, 2025
ఈ మ్యాచ్ విచారణను రిఫరీ ఆండీ పైక్రాఫ్ట్ నిర్వహించారు. ఈ సందర్భంగా అర్ష్‌దీప్ సింగ్పై ఆర్టికల్ 2.6 ప్రకారం అభియోగం నమోదయింది. ఇది అసభ్యకర లేదా అభ్యంతరకర హావభావాలకు సంబంధించినది. కానీ దర్యాప్తు అనంతరం ఆయన నిర్దోషిగా తేలడంతో ఎటువంటి శిక్ష విధించలేదు. అయితే ఫైనల్ మ్యాచ్‌లో ఇద్దరు ఆటగాళ్లపై చర్యలు తీసుకున్నారు. జస్‌ప్రీత్ బుమ్రాపై ఆర్టికల్ 2.21 ఉల్లంఘనకు సంబంధించిన అభియోగం రుజువవడంతో ఆయనకు ఒక డీమెరిట్ పాయింట్,అధికారిక హెచ్చరిక ఇచ్చారు. ఇదే మ్యాచ్‌లో హరిస్ రవూఫ్ మరోసారి అదే తప్పు చేసినట్లు తేలడంతో, రిచీ రిచర్డ్‌సన్ నేతృత్వంలోని కమిటీ ఆయనపై 30% జరిమానా, మరిన్ని రెండు డీమెరిట్ పాయింట్లు విధించింది.
వివరాలు
రవూఫ్‌పై రెండు మ్యాచ్‌ల నిషేధం
హరిస్ రవూఫ్ రెండు మ్యాచ్‌లలో దోషిగా తేలడంతో, ఆయనకు మొత్తం నాలుగు డీమెరిట్ పాయింట్లు నమోదయ్యాయి. దీని ఫలితంగా, ఐసీసీ క్రమశిక్షణా నిబంధనల ప్రకారం, ఇవి రెండు సస్పెన్షన్ పాయింట్లుగా మారాయి. అందువల్ల, రవూఫ్ నవంబర్ 4, 6 తేదీల్లో దక్షిణాఫ్రికాతో జరగనున్న రెండు వన్డేల్లో పాల్గొనకుండా నిషేధించబడ్డారు. ఐసీసీ ప్రకారం, ఒక ఆటగాడు 24 నెలల వ్యవధిలో నాలుగు లేదా అంతకంటే ఎక్కువ డీమెరిట్ పాయింట్లు పొందితే, అవి సస్పెన్షన్ పాయింట్లుగా మారుతాయి. రెండు సస్పెన్షన్ పాయింట్లు అంటే ఒక టెస్ట్ మ్యాచ్ లేదా రెండు వన్డే/టీ20ల నిషేధం. ఈ డీమెరిట్ పాయింట్లు 24 నెలల తర్వాత స్వయంగా రద్దు అవుతాయి.