IND vs NZ 4th T20I Result: భారీ లక్ష్యం ముందు చేతులెత్తేసిన భారత బ్యాటర్లు.. కివీస్ ఘన విజయం!
ఈ వార్తాకథనం ఏంటి
న్యూజిలాండ్‌తో జరిగిన నాలుగో టీ20లో టీమిండియా బ్యాటర్లు తడబడటంతో భారత జట్టు ఘోర పరాజయాన్ని చవిచూసింది. కివీస్ నిర్దేశించిన 260 పరుగుల భారీ లక్ష్యాన్ని ఛేదించడంలో భారత జట్టు పూర్తిగా విఫలమైంది. వరుసగా వికెట్లు కోల్పోతూ ఓటమి దిశగా సాగింది. టాస్ ఓడి తొలుత బ్యాటింగ్ చేసిన న్యూజిలాండ్ నిర్ణీత 20 ఓవర్లలో ఏడు వికెట్ల నష్టానికి 259 పరుగుల భారీ స్కోరు సాధించింది. భారీ లక్ష్యంతో బరిలోకి దిగిన భారత్.. 10 ఓవర్లు ముగిసేసరికి ఆరు వికెట్లు కోల్పోయి 107 పరుగులే చేసింది. నమన్ ధీర్, తిలక్ వర్మ క్రీజులో ఉన్నారు. భారత ఇన్నింగ్స్‌లో అభిషేక్ శర్మ 27 పరుగులు చేశాడు. శ్రేయస్ అయ్యర్ 22 పరుగుల వద్ద బౌల్డ్ అయ్యాడు.
వివరాలు
అత్యధిక స్కోరు నమోదు
మరోవైపు న్యూజిలాండ్ కెప్టెన్ మిచెల్ శాంట్నర్ ఒకే ఓవర్‌లో నితీశ్ కుమార్ రెడ్డి, అక్షర్ పటేల్‌లను పెవిలియన్‌కు పంపించాడు.
దీంతో భారత జట్టు కష్టాల్లో పడింది. అంతకుముందు న్యూజిలాండ్ బ్యాటర్లు భారత బౌలర్లపై విరుచుకుపడ్డారు.
శుక్రవారం జరిగిన ఈ మ్యాచ్‌లో కివీస్ తమ టీ20 అంతర్జాతీయ క్రికెట్‌లో అత్యధిక స్కోరును నమోదు చేసింది.
ఆ జట్టు బ్యాటర్ గ్లెన్ ఫిలిప్స్ కేవలం 49 బంతుల్లోనే 107 పరుగులతో అజేయంగా నిలిచాడు. మైఖేల్ బ్రేస్‌వెల్ కూడా ధాటిగా ఆడి 25 బంతుల్లో 65 పరుగులు సాధించాడు.
వీరిద్దరి విధ్వంసకర బ్యాటింగ్‌తో న్యూజిలాండ్ 259 పరుగుల భారీ స్కోరు సాధించింది. ఆ లక్ష్యాన్ని ఛేదించడంలో భారత బ్యాటర్లు విఫలమవడంతో టీమిండియా ఓటమి పాలైంది.