Yash Dayal: లైంగిక వేధింపుల కేసు..యశ్ దయాల్ అరెస్టుపై నేడు హైకోర్టు తీర్పు
ఈ వార్తాకథనం ఏంటి
భారత క్రికెటర్ యశ్ దయాల్ ఇప్పుడు మైదానంలో కాకుండా న్యాయస్థానంలో పోరాడుతున్న పరిస్థితి ఏర్పడింది. ఘజియాబాద్‌కు చెందిన ఓ మహిళ ఆయనపై లైంగిక వేధింపుల ఆరోపణలు చేయడంతో కేసు నమోదైంది. ఈ కేసుకు సంబంధించిన ఎఫ్‌ఐఆర్‌పై నేడు అలహాబాద్ హైకోర్టులో కీలక విచారణ జరగనుంది. అరెస్టుపై ఉన్న స్టే కొనసాగుతుందా?లేక కేసు తదుపరి దశకు వెళ్తుందా?అన్నది ఈరోజు కోర్టు తీర్పుతో స్పష్టంకానుంది. ఇంతకుముందు జూలై 15న అలహాబాద్ హైకోర్టు యశ్ దయాల్‌కు తాత్కాలిక ఉపశమనం కల్పించింది. కేసు విచారణ పూర్తయ్యే వరకు ఆయనను అరెస్టు చేయరాదని ఆదేశించింది. అంతేకాకుండా,ఎఫ్‌ఐఆర్ ఆధారంగా మరే ఇతర చర్యలు కూడా తీసుకోవద్దని స్పష్టంగా తెలిపింది. దీనితో పాటు బాధితురాలు,ఉత్తర్‌ప్రదేశ్ ప్రభుత్వం,స్థానిక పోలీసులకు కోర్టు నోటీసులు జారీ చేసింది.
వివరాలు
ఎఫ్‌ఐఆర్‌ను రద్దు చేయాలని కోర్టుకు విజ్ఞప్తి చేసిన యశ్ దయాల్
యశ్ దయాల్‌పై జూలై 6న ఘజియాబాద్‌లోని ఇందిరాపురం పోలీస్ స్టేషన్‌లో ఎఫ్‌ఐఆర్ నమోదైంది. ఈ కేసు నమోదు అయిన తర్వాత ఆయన న్యాయపోరాటం ప్రారంభించారు.తనపై వచ్చిన ఆరోపణలు పూర్తిగా తప్పుడు వేనని,తన వ్యక్తిగత ప్రతిష్టను దెబ్బతీయాలనే ఉద్దేశంతోనే ఈ కేసు వేశారని హైకోర్టులో సమర్పించిన పిటిషన్‌లో పేర్కొన్నారు. అందువల్ల ఎఫ్‌ఐఆర్‌ను రద్దు చేయాలని కోర్టును ఆయన విజ్ఞప్తి చేశారు.ఈ కేసు విచారణను అలహాబాద్ హైకోర్టు డివిజన్ బెంచ్ నేడు చేపట్టనుంది. జస్టిస్ సిద్ధార్థ వర్మ,జస్టిస్ అబ్దుల్ షాహిద్‌లతో కూడిన ఈ బెంచ్ తీర్పు ఇవ్వనుంది. యశ్ దయాల్‌కు ఈ విచారణ అత్యంత కీలకంగా నిలవనుంది.ఎందుకంటే ఈ కేసు ఆయన ప్రతిష్టతో పాటు క్రికెట్ కెరీర్‌పై కూడా గంభీరమైన ప్రభావం చూపే అవకాశం ఉంది.