SRH vs CSK: ఉత్కంఠ పోరులో చెన్నైపై సన్రైజర్స్ గెలుపు
ఈ వార్తాకథనం ఏంటి
ఐపీఎల్ 2026 సీజన్లో భాగంగా రాజీవ్ గాంధీ అంతర్జాతీయ స్టేడియం (ఉప్పల్)లో జరిగిన ఉత్కంఠభరిత మ్యాచ్లో సన్రైజర్స్ హైదరాబాద్ (SRH) జట్టు చెన్నై సూపర్ కింగ్స్ (CSK) పై 10 పరుగుల తేడాతో ఘన విజయం సాధించింది. మొదట టాస్ ఓడి బ్యాటింగ్కు దిగిన హైదరాబాద్ జట్టుకు ఓపెనర్ అభిషేక్ శర్మ అద్భుతమైన ఆరంభాన్ని అందించాడు. కేవలం 15 బంతుల్లోనే అర్ధశతకం పూర్తి చేసి ఈ సీజన్లో అత్యంత వేగవంతమైన ఫిఫ్టీ నమోదు చేసిన ఆటగాడిగా రికార్డు సృష్టించాడు. అతను మొత్తం 59 పరుగులు చేసి ఇన్నింగ్స్లో సిక్సర్ల వర్షం కురిపించాడు. అనంతరం హెన్రిచ్ క్లాసెన్ కూడా అదే స్థాయిలో 59 పరుగులతో మెరిసి జట్టు స్కోరును 194/9 వరకు తీసుకెళ్లాడు.
వివరాలు
వికెట్లు పడ్డాయిలా..
195 పరుగుల లక్ష్యాన్ని ఛేదించేందుకు బరిలోకి దిగిన చెన్నై సూపర్ కింగ్స్ బ్యాటింగ్ లైనప్ హైదరాబాద్ బౌలర్ల దెబ్బకు నిలదొక్కుకోలేకపోయింది. సంజూ శాంసన్ (7), రుతురాజ్ గైక్వాడ్ (19) త్వరగానే అవుట్ కావడంతో చెన్నై ఆరంభంలోనే ఒత్తిడిలో పడింది. ఆపై హైదరాబాద్ బౌలర్లు, స్పిన్నర్లు, పేసర్లు వరుసగా వికెట్లు తీస్తూ చెన్నైని మరింత ఇబ్బందుల్లోకి నెట్టేశారు. ఆయూష్ మాత్రే (30) కొంతసేపు ప్రతిఘటించినప్పటికీ నితీశ్ కుమార్ రెడ్డి బౌలింగ్లో క్లాసెన్కు క్యాచ్ ఇచ్చి అవుట్ అయ్యాడు. తరువాత వచ్చిన డేవాల్డ్ బ్రేవిస్ డకౌట్ కావడం, సర్ఫరాజ్ ఖాన్ (25) దూకుడుగా ఆడుతూ అవుట్ కావడంతో చెన్నై 113 పరుగుల వద్దనే 5 కీలక వికెట్లు కోల్పోయింది.
వివరాలు
పోరాడి ఓడారిలా..
తరువాత శివమ్ దూబేతో కలిసి మాథ్యూ షార్ట్ ఇన్నింగ్స్ను ముందుకు నడిపించే ప్రయత్నం చేశాడు. కానీ ఎషాన్ మలింగ బౌలింగ్లో అతను ఆడిన భారీ షాట్ నేరుగా బౌండరీ వద్ద ఉన్న అనికేత్ వర్మ చేతికి చిక్కడంతో షార్ట్ (34) అవుట్ అయ్యాడు. ఆ తర్వాత శివమ్ దూబే నెమ్మదిగా ఆడుతూ పరుగులు చేయడంలో ఇబ్బంది పడ్డాడు. చివర్లో జేమీ ఓవర్టన్ (16), అన్షుల్ కాంబోజ్ కొంత పోరాడినప్పటికీ జట్టును గెలిపించలేకపోయారు. హైదరాబాద్ బౌలింగ్లో ఎషాన్ మలింగ అద్భుతంగా బౌలింగ్ చేసి 3 కీలక వికెట్లు తీసుకున్నాడు. నితీశ్ కుమార్ రెడ్డి 2 వికెట్లు సాధించగా, సాకిబ్ హుస్సేన్, శివాంగ్ కుమార్, ప్రపుల్ హింగే తలో వికెట్ తీసి జట్టు విజయానికి సహకరించారు.