IPL: ఐపీఎల్ పవర్ప్లేలో సిక్సర్ల వర్షం కురిపించిన ఆటగాళ్లు.. వీరే
ఈ వార్తాకథనం ఏంటి
ఐపీఎల్ 2026 ఎలిమినేటర్ మ్యాచ్లో రాజస్థాన్ రాయల్స్ యువ సంచలనం వైభవ్ సూర్యవంశీ సన్ రైజర్స్ హైదరాబాద్ బౌలర్లపై విరుచుకుపడ్డాడు. కేవలం 29 బంతుల్లోనే 97 పరుగులు చేసి అదిరిపోయే ఇన్నింగ్స్ ఆడాడు. అతని విధ్వంసకర బ్యాటింగ్తో రాజస్థాన్ రాయల్స్ 243/8 భారీ స్కోర్ నమోదు చేసింది. అనంతరం ఆ జట్టు 47 పరుగుల తేడాతో విజయం సాధించి క్వాలిఫయర్-2కు చేరుకుంది. ఈ మ్యాచ్లో పవర్ప్లేలోనే 8 సిక్సర్లు బాది వైభవ్ పలు రికార్డులు తన ఖాతాలో వేసుకున్నాడు.
వివరాలు
పవర్ప్లేలో అత్యధిక సిక్సర్లు కొట్టిన బ్యాటర్గా రికార్డు..
సన్రైజర్స్పై న్యూ చండీగఢ్ వేదికగా జరిగిన ఈ ఎలిమినేటర్ మ్యాచ్లో వైభవ్ సూర్యవంశీ ఆడిన ఇన్నింగ్స్ను ఐపీఎల్ ప్లేఆఫ్స్ చరిత్రలోనే అత్యుత్తమ ఇన్నింగ్స్లలో ఒకటిగా చెబుతున్నారు. అతను చేసిన 97 పరుగుల్లో 60 పరుగులు పవర్ప్లేలోనే వచ్చాయి. తొలి ఆరు ఓవర్లలోనే 8 సిక్సర్లు బాదిన వైభవ్.. ఐపీఎల్ ఇన్నింగ్స్లో పవర్ప్లేలో అత్యధిక సిక్సర్లు కొట్టిన బ్యాటర్గా రికార్డు సృష్టించాడు. ఇంతకుముందు ఈ సీజన్లో తానే నెలకొల్పిన రికార్డును వైభవ్ మళ్లీ బద్దలు కొట్టాడు. జైపూర్లో సన్రైజర్స్ హైదరాబాద్పై జరిగిన మ్యాచ్లో 37 బంతుల్లో 103 పరుగులు చేసిన అతను, అప్పట్లో పవర్ప్లేలో 7 సిక్సర్లు బాదాడు. ఆ ఇన్నింగ్స్లో 5 ఫోర్లు, 12 సిక్సర్లు ఉన్నాయి.
వివరాలు
ఐపీఎల్ రికార్డులు ఇవే..
ఇక ఐపీఎల్ ఇన్నింగ్స్లో పవర్ప్లేలో కనీసం 7 సిక్సర్లు కొట్టిన బ్యాటర్ల జాబితాలో సనత్ జయసూర్య (2008), జోస్ బట్లర్ (2018), జానీ బెయిర్స్టో (2022), అభిషేక్ శర్మ (2026) కూడా ఉన్నారు. అలాగే ఐపీఎల్ ప్లేఆఫ్ లేదా నాకౌట్ మ్యాచ్లో అత్యధిక సిక్సర్లు బాదిన బ్యాటర్గా కూడా వైభవ్ సూర్యవంశీ నిలిచాడు. ఈఎస్పీఎన్ క్రిక్ ఇన్ఫో గణాంకాల ప్రకారం, ఈ మ్యాచ్లో అతను కొట్టిన 12 సిక్సర్లు కొత్త రికార్డు. ఇంతకుముందు 2023 క్వాలిఫయర్-2లో ముంబై ఇండియన్స్పై శుభ్మన్ గిల్ కొట్టిన 10 సిక్సర్లే రికార్డుగా ఉండేవి.