IPL 2026: ఆ బ్యాటింగ్ ఏంటయ్యా సామీ… పాతిక కోట్ల ఆటగాడిపై విమర్శల వెల్లువ
ఈ వార్తాకథనం ఏంటి
మినీ వేలంలో భారీ ఆశలు పెట్టుకున్న కోల్కతా నైట్ రైడర్స్ జట్టు, కామెరూన్ గ్రీన్ను రూ.25.20 కోట్లకు తమ దళంలో చేర్చుకుంది. అయితే ఇప్పటి వరకు అంచనాలకు సరిపడే ప్రదర్శన ఇవ్వలేకపోయాడు. నాలుగు మ్యాచ్లలో ఒకటి వర్షం కారణంగా రద్దు కాగా, మిగిలిన మూడు మ్యాచ్లలో కూడా అతని ఆట స్థాయి ఆశించినంతగా లేదు. ఇటీవల లక్నోతో జరిగిన మ్యాచ్లో గ్రీన్ రెండు ఓవర్లు వేసి ఒక వికెట్ మాత్రమే తీసి 28 పరుగులు ఇవ్వడం అభిమానుల్లో అసంతృప్తిని పెంచింది. దీనిపై కేకేఆర్ అభిమానులు తీవ్రంగా స్పందించారు. అదే సమయంలో కేవలం రూ.2.60 కోట్లకు కొనుగోలు చేసిన ముకుల్ చౌదరి లక్నో జట్టుకు విజయాన్ని అందించడం గ్రీన్పై మరింత విమర్శలకు దారితీసింది.
వివరాలు
గ్రీన్ పై పెరిగిన ట్రోలింగ్స్..
దీంతో సోషల్ మీడియాలో గ్రీన్పై ట్రోలింగ్ మొదలైంది. తక్కువ ధరకు తీసుకున్న ఆటగాడి ఆటను చూసి నేర్చుకోవాలని కొందరు వ్యాఖ్యానించారు. ఇదే విధంగా కొనసాగితే కేకేఆర్ జట్టులో అతని స్థానం ఎక్కువ కాలం ఉండదని ఎద్దేవా చేశారు. "కామెరూన్ గ్రీన్ విలువ రూ.25.20 కోట్లు. ఈ సీజన్లో రెండు ఓవర్లు వేసి 28 పరుగులు ఇచ్చాడు. అంటే అతని ఎకానమీ రేటు 14." "ఇంత భారీ ధర చెల్లించి తీసుకున్న ఆటగాడిని ఇలా ఉపయోగించడం ఆశ్చర్యకరం. అలాంటి స్టార్ ఆల్రౌండర్కు కెప్టెన్ అజింక్య రహానె 19వ ఓవర్ ఇవ్వడం మరింత విచిత్రంగా ఉంది." అంటూ కామెంట్లు వినిపించాయి.
వివరాలు
స్టేడియంలో తగ్గుతున్న ప్రేక్షకులు..
ఐపీఎల్ మ్యాచ్లంటే సాధారణంగా అభిమానుల్లో భారీ ఉత్సాహం కనిపిస్తుంది. టికెట్ల కోసం పెద్ద ఎత్తున పోటీ ఉంటుంది. అయితే కోల్కతాలోని ఈడెన్ గార్డెన్స్ మైదానంలో పరిస్థితి పూర్తిగా భిన్నంగా కనిపిస్తోంది. ఈడెన్ గార్డెన్స్లో సన్రైజర్స్ హైదరాబాద్, లక్నో సూపర్ జెయింట్స్ చేతిలో కేకేఆర్ ఓటమి చెందగా, మరో మ్యాచ్ వర్షం కారణంగా రద్దయింది. ఈ మైదానంలో సుమారు 70 వేల మంది ప్రేక్షకులు కూర్చునే సామర్థ్యం ఉన్నప్పటికీ సగం స్టేడియం కూడా నిండకపోవడం ఆశ్చర్యాన్ని కలిగించింది. ఈ విషయాన్ని ఒక అభిమాని సోషల్ మీడియాలో ప్రస్తావిస్తూ, మూడు సార్లు ఐపీఎల్ టైటిల్ గెలిచిన జట్టు సొంత మైదానంలో ఆడుతున్న మ్యాచ్కే ప్రేక్షకులు రాకపోవడం జట్టు ప్రదర్శన స్థాయిని ప్రతిబింబిస్తోందని వ్యాఖ్యానించాడు.