Loading...
KL Rahul Century: కేఎల్‌ రాహుల్‌ సెంచరీ.. సయీద్‌ అన్వర్‌ అరుదైన రికార్డు సమం!
కేఎల్‌ రాహుల్‌ సెంచరీ.. సయీద్‌ అన్వర్‌ అరుదైన రికార్డు సమం!

KL Rahul Century: కేఎల్‌ రాహుల్‌ సెంచరీ.. సయీద్‌ అన్వర్‌ అరుదైన రికార్డు సమం!

వ్రాసిన వారు Jayachandra Akuri
Nov 21, 2026
08:59 am

ఈ వార్తాకథనం ఏంటి

టీమిండియా స్టార్ ఓపెనర్ కేఎల్‌ రాహుల్‌ తన అద్భుత ఫామ్‌ను కొనసాగిస్తున్నాడు. వెల్లింగ్టన్‌ వేదికగా న్యూజిలాండ్‌తో జరుగుతున్న తొలి టెస్టులో శతకంతో మెరిశాడు. ఆరంభంలో ఔటయ్యే ప్రమాదం నుంచి తప్పించుకున్న రాహుల్‌.. ఆ తర్వాత కివీస్‌ బౌలర్లకు ఎలాంటి అవకాశం ఇవ్వలేదు. మరో ఓపెనర్‌ యశస్వి జైశ్వాల్‌తో కలిసి భారత ఇన్నింగ్స్‌ను ముందుకు నడిపించాడు. ఈ క్రమంలో పలు అరుదైన రికార్డులను తన ఖాతాలో వేసుకున్నాడు.

వివరాలు

డబ్ల్యూటీసీలో అరుదైన ఘనత

కేఎల్‌ రాహుల్‌ తన సెంచరీతో ప్రపంచ టెస్టు ఛాంపియన్‌షిప్‌ (WTC) 2025-27 సైకిల్‌లో భారత్‌ తరఫున 1000కిపైగా పరుగులు చేసిన మూడో ఓపెనర్‌గా నిలిచాడు. రాహుల్‌ కంటే ముందు రోహిత్‌ శర్మ, యశస్వి జైశ్వాల్‌ ఈ ఘనత సాధించారు. ఓవరాల్‌గా భారత ఆటగాళ్ల జాబితాలో రాహుల్‌ ఐదో స్థానంలో నిలిచాడు. ఈ జాబితాలో అజింక్య రహానే (2019-21) తొలి స్థానంలో ఉండగా.. రోహిత్‌ శర్మ (2019-21), యశస్వి జైశ్వాల్‌ (2023-25), శుభ్‌మన్‌ గిల్‌ (2025-27), కేఎల్‌ రాహుల్‌ (2025-27) తర్వాతి స్థానాల్లో ఉన్నారు. అలాగే టెస్టు క్రికెట్‌లో సేనా (SENA) దేశాలైన దక్షిణాఫ్రికా, ఇంగ్లాండ్‌, న్యూజిలాండ్‌, ఆస్ట్రేలియాల్లోనూ అర్ధ సెంచరీలు సాధించిన తొలి భారత ఓపెనర్‌గా రాహుల్‌ చరిత్ర సృష్టించాడు.

వివరాలు

సయీద్‌ అన్వర్‌ రికార్డును సమం చేసిన రాహుల్

ప్రపంచ టెస్టు ఛాంపియన్‌షిప్‌ చరిత్రలో భారత్‌ తరఫున అత్యధిక ఫిఫ్టీ ప్లస్‌ స్కోర్లు సాధించిన ఆటగాళ్ల జాబితాలోనూ రాహుల్‌ ముందంజలో ఉన్నాడు. 17 ఫిఫ్టీ ప్లస్‌ స్కోర్లతో రోహిత్‌ శర్మతో కలిసి ఐదో స్థానాన్ని పంచుకున్నాడు.

తాజా సెంచరీతో కేఎల్‌ రాహుల్‌ మరో అరుదైన ఘనత సాధించాడు. సేనా దేశాల్లోనూ సెంచరీలు చేసిన ఆసియా బ్యాటర్ల జాబితాలో చోటు సంపాదించాడు.

అంతేకాకుండా ఓపెనర్‌గా ఈ ఘనత సాధించిన పాకిస్థాన్‌ దిగ్గజం సయీద్‌ అన్వర్‌ రికార్డును సమం చేశాడు.

సేనా దేశాల్లో సెంచరీలు సాధించిన ఆసియా బ్యాటర్ల జాబితాలో మహ్మద్‌ అజారుద్దీన్‌, సచిన్‌ టెండూల్కర్‌, సయీద్‌ అన్వర్‌, రాహుల్‌ ద్రవిడ్‌, యూనిస్‌ ఖాన్‌, కుమార సంగక్కర, విరాట్‌ కోహ్లీ, కేఎల్‌ రాహుల్‌ ఉన్నారు.

ADVERTISEMENT

వివరాలు

పటిష్ఠ స్థితిలో భారత్

ఇక వెల్లింగ్టన్‌ టెస్టులో భారత జట్టు పటిష్ఠ స్థితిలో కొనసాగుతోంది.

మూడో రోజు ఆట ముగిసే సమయానికి భారత్‌ తొలి ఇన్నింగ్స్‌లో 74 ఓవర్లకు ఒక వికెట్‌ మాత్రమే కోల్పోయి 265 పరుగులు చేసింది.

అయినప్పటికీ న్యూజిలాండ్‌ తొలి ఇన్నింగ్స్‌ స్కోరుకు భారత్‌ ఇంకా 103 పరుగులు వెనుకబడి ఉంది.

ప్రస్తుతం క్రీజులో కేఎల్‌ రాహుల్‌ (102), దేవదత్‌ పడిక్కల్‌ (66) పరుగులతో ఉన్నారు. అంతకుముందు న్యూజిలాండ్‌ తన తొలి ఇన్నింగ్స్‌లో 368 పరుగులు చేసి ఆలౌటైంది.

ADVERTISEMENT