Checkmate: హికరు నకముర అసహనం.. గుకేశ్ రాజును ప్రేక్షకుల వైపు విసిరేసి
ఈ వార్తాకథనం ఏంటి
అమెరికా ప్రముఖ గ్రాండ్‌మాస్టర్‌ హికరు నకముర ఓ వివాదంలో చిక్కుకున్నాడు. చెక్‌మేట్‌ చెస్‌ టోర్నమెంట్‌లో భారత స్టార్‌ ఆటగాడు దొమ్మరాజు గుకేశ్‌‌తో తలపడిన సందర్భంగా అతను అనుచితంగా ప్రవర్తించాడని ఆరోపణలు వెల్లువెత్తుతున్నాయి. ఈ మ్యాచ్‌లో నకముర విజయం సాధించిన వెంటనే, తన ఆనందాన్ని వ్యక్తం చేసే క్రమంలో గుకేశ్ రాజు పావును (కింగ్‌) తీసి ప్రేక్షకుల వైపు విసరడంతో అక్కడున్నవారు ఆశ్చర్యపోయారు. ఈ చర్యతో గుకేశ్ కంగుతిన్నాడు; కొంతసేపు అక్కడే మౌనంగా నిలబడి చూశాడు. ఆ తరువాత నకముర తన ప్రవర్తనను సమర్థించుకుంటూ, "గుకేశ్‌పై నేను గెలిచాను, అభిమానులు ఆ విషయం తెలుసుకోవాలని అనిపించింది. వాళ్ల నుంచి గట్టిగా చప్పట్లు వినాలని అనిపించి ఆలా చేశాను" అని వివరణ ఇచ్చాడు.
వివరాలు
ఇలాంటి ప్రవర్తన ఒక గ్రాండ్‌మాస్టర్‌కు తగదు
ఈ సంఘటనకు సంబంధించిన వీడియో సోషల్‌ మీడియాలో వైరల్‌గా మారింది. దీనిపై చెస్‌ అభిమానులు, క్రీడాభిమానులు నకముర ప్రవర్తనను తీవ్రంగా విమర్శిస్తున్నారు. "ఇలాంటి ప్రవర్తన ఒక గ్రాండ్‌మాస్టర్‌కు తగదు. ఇది క్రీడాస్ఫూర్తికి విరుద్ధం" అని పలువురు కామెంట్లు చేస్తున్నారు. గతంలోనూ గుకేశ్‌కు ఇలాంటి పరిస్థితి ఎదురైంది. నార్వే చెస్‌ టోర్నీలో మాజీ ప్రపంచ ఛాంపియన్‌ మాగ్నస్‌ కార్ల్సన్, గుకేశ్ చేతిలో ఓడిపోయిన అనంతరం బల్లపై ఉన్న పావులను గట్టిగా చరుస్తూ అసహనం వ్యక్తం చేశాడు. ఆ తరువాత కార్ల్సన్ తన ప్రవర్తనపై పశ్చాత్తాపం వ్యక్తం చేసిన విషయం అప్పట్లో వార్తల్లో నిలిచింది.
వివరాలు
భారత్‌ 0-5తో ఓటమి
ఈ చెక్‌మేట్‌ చెస్‌ ఈవెంట్‌లో భారత జట్టు అమెరికా చేతిలో 0-5తో ఓటమి చవిచూసింది. తొలి గేమ్‌లో ఫాబియానో కరువానాకు అర్జున్‌ ఇరిగేశి తలవంచాడు. తదుపరి మ్యాచ్‌లో టానిటోలువా, భారత ఆటగాడు ఇథాన్‌ వాజ్‌పై విజయం సాధించడంతో, అమెరికా ఆధిక్యాన్ని రెట్టింపు చేసింది. ఆ తరువాత ప్రపంచకప్‌ విజేత దివ్య దేశ్‌ముఖ్, అంచనాలకు తగ్గ ప్రదర్శన ఇవ్వలేకపోయింది. ఆమె అమెరికా ఇంటర్నేషనల్‌ మాస్టర్‌ కారిస్‌ యిప్‌ చేతిలో ఓడిపోవడంతో అమెరికా 3-0 ఆధిక్యంలోకి వెళ్లింది.
వివరాలు
భారత్‌ 0-5తో ఓటమి
నాలుగో గేమ్‌లో లెవీ రోజ్‌మన్‌, భారత ఆటగాడు సాగర్‌ షాపై గెలుపొందడంతో భారత్‌ పరాజయం ఖరారైంది. చివరగా ఐదో గేమ్‌లో ప్రపంచ ఛాంపియన్‌ దొమ్మరాజు గుకేశ్, అమెరికా స్టార్‌ హికరు నకమురను ఓడిస్తాడేమో అని అభిమానులు ఆశించినా, అలా జరగలేదు. నకముర గుకేశ్‌పై విజయంతో అమెరికా జట్టుకు 5-0 తేడాతో ఘన విజయం అందించాడు.