చరిత్ర సృష్టించిన పృథ్వీ షా.. వన్డే మ్యాచులో భారీ డబుల్ సెంచరీ
ఈ వార్తాకథనం ఏంటి
టీమిండియా క్రికెటర్ పృథ్వీ షా కొత్త చరిత్రను సృష్టించారు. ఫామ్ కోల్పోయి జట్టుకు దూరమైన ఈ ముంబై ఆటగాడు కౌంటీల్లో చెలరేగుతున్నాడు. ఇంగ్లీష్ టోర్నమెంట్ రాయల్ లండన్ వన్డే కప్ 2023లో షా డబుల్ సెంచరీ చేసి అనేక రికార్డులను బద్దలు కొట్టాడు. పృథ్వీ షా 153 బంతుల్లో ( 28 ఫోర్లు, 11 సిక్సర్లు) 244 పరుగులు చేసి చెలరేగిపోయాడు. లిస్ట్ ఎ క్రికెట్లో నార్తాంప్టన్ షైర్ తరుపున అత్యధిక స్కోరు చేసిన ఆటగాడిగా రికార్డుకెక్కాడు. లిస్ట్ ఏ క్రికెట్లో పృథ్వీకిది ఇది రెండో ద్విశతకం కావడం గమనార్హం.
Details
లిస్ట్ ఏ క్రికెట్లో రెండు డబుల్ సాధించిన పృథ్వీ షా
ఇంగ్లండ్ లిస్ట్-ఎ క్రికెట్లో ఇది రెండో అత్యధిక స్కోరు కాగా.. ప్రపంచవ్యాప్తంగా ఆరో అత్యధిక స్కోరు సాధించిన ఆటగాడిగా షా నిలిచాడు. అదే విధంగా లిస్ట్ ఏ క్రికెట్ లో రెండు వేర్వేరు దేశాల్లో (ఇండియా, ఇంగ్లండ్) డబుల్ సెంచరీ సాధించిన ఏకైకా ఆటగాడిగా పృథ్వీ షా చరిత్రకెక్కాడు. 2020-21 లో విజయ్ హజరే ట్రోఫీలో భాగంగా ముంబై తరుపున 227 పరుగులు చేసిన విషయం తెలిసిందే. మ్యాచ్ విషయానికొస్తే, పృథ్వీ సూపర్‌ ఇన్నింగ్స్‌తో నార్తాంప్టన్‌షైర్‌ 50 ఓవర్లలో 415/8తో భారీస్కోరు సాధించింది. లక్ష్య ఛేదనలో సోమర్‌సెట్‌ 41.4 ఓవర్లలో 328 పరుగులకు ఆలౌటై ఓటమి పాలైంది.