Ravichandran Ashwin: రిటైర్మెంట్‌పై మౌనం వీడిన అశ్విన్.. ఏమన్నాడంటే..?
ఆస్ట్రేలియాలో జరిగిన బోర్డర్-గవాస్కర్ సిరీస్ నుంచి రవిచంద్రన్ అశ్విన్ అనూహ్యంగా వైదొలగి, రిటైర్మెంట్ ప్రకటించడం క్రికెట్ అభిమానులను, విశ్లేషకులను ఆశ్చర్యపరిచింది. ఈ స్పిన్ మాంత్రికుడు ఇలా ఎందుకు నిర్ణయం తీసుకున్నాడనే సందేహాలు నెలకొన్నాయి. ఈ విషయంలో అశ్విన్ స్వయంగా స్పందిస్తూ, ఒక స్పోర్ట్స్ ఛానెల్‌కు ఇచ్చిన ఇంటర్వ్యూలో ఇలా పేర్కొన్నారు: "''నేను ఏ విషయాలను ఎక్కువగా పట్టుకొని సాగతీయను. జీవితంలో నేను ఎప్పుడూ అభద్రతా భావంతో జీవించలేదు. ఈ రోజు నాదే అయినా, రేపు కూడా అదే నా పట్ల ఉంటుందనుకోను. నా ఆలోచనా విధానమే నన్ను ఇంతవరకు ముందుకు తీసుకువచ్చింది. నేను నిర్మోహమాటంగా చాలా విషయాలను వదిలేయగలను. నా గురించి జనాలు సంబరాలు చేసుకుంటారని ఎప్పుడూ నమ్మలేదు.
నేను క్రికెట్‌ను వదలడంలో పశ్చాత్తాపం లేదు
దేశంలో నాపై వచ్చే అటెన్షన్‌ను కూడా ఎక్కువగా పట్టించుకోను.నాకంటే ఆట ముఖ్యమైంది. రిటైర్మెంట్‌పై చాలాసార్లు ఆలోచించాను.ఒక రోజు నేను నిద్రలేచినప్పుడు సృజనాత్మకతకు భవిష్యత్తు లేదనిపిస్తే, అదే రోజు ఆటను వదిలేస్తాను.హఠాత్తుగా ఎందుకో నాకు అలాగే అనిపించింది. అందుకే వదిలేశాను. అది పాపులర్ అవుతుందనో, సరైనది కాదనో నాకు తెలుసు.కానీ,నా పూర్తిస్థాయి ప్రయత్నాన్ని ఆటకు అంకితం చేశాను"అని పేర్కొన్నాడు. అశ్విన్ తన ఆటజీవితంలో రకరకాల స్కిల్స్, టాలెంట్‌తో క్రికెట్ ఆడినట్లు చెప్పి,అవి తనకు అన్వేషణ చేయడానికి, ఆట గురించి విస్తృతమైన అవగాహనను ఇవ్వడానికి ఉపయోగపడ్డాయని వివరించారు. "నేను క్రికెట్‌ను వదలడంలో పశ్చాత్తాపం లేదు, ఎందుకంటే ఇది పూర్తిగా నా నిర్ణయం. క్రికెట్ నాకు చాలా ఇచ్చింది,దానికి నేను ఎల్లప్పుడూ కృతజ్ఞుడిని," అని ఆయన అన్నారు.
ధోనీతో తన అనుబంధంపై..
ఇక ధోనీతో తన అనుబంధంపై అశ్విన్ మాట్లాడుతూ,ధోనీ ఇతర కెప్టెన్లతో పోలిస్తే పూర్తిగా విభిన్నమైన వ్యక్తి అని చెప్పారు. "ధోనీ ప్రాథమిక విషయాలను బాగా అర్థం చేసుకుంటాడు,కానీ చాలామంది కెప్టెన్లు వాటిని విస్మరిస్తారు.బౌలర్‌కు బంతి ఇస్తూ అవసరమైన ఫీల్డింగ్ ఏర్పాటు చేసుకోమని చెప్పడం అతని ప్రత్యేకత.కొన్ని సార్లు మా లూజ్ డెలివరీలకు బ్యాటర్లు పరుగులు సాధించినా, అతను మమ్మల్ని ప్రోత్సహిస్తాడు.కానీ,కట్ లేదా డ్రైవ్ ద్వారా కొత్త బ్యాటర్ పరుగులు చేస్తే మాత్రం వెంటనే నన్ను బౌలింగ్ నుంచి తప్పిస్తాడు.ఈ ప్రాథమికమైన అంశాలను చాలా మంది మిస్ అవుతారు,"అని అశ్విన్ తెలిపారు. ధోనీ IPLలో తుషార్ దేశ్‌పాండే వంటి ఆటగాళ్లకు అవకాశాలు ఇచ్చి,వారి ప్రతిభను వెలికి తీయడం తన ప్రత్యేకత అని ఆయన కొనియాడారు.
