Rishabh Pant: రిషభ్ పంత్ మరో టీ20 లీగ్ వేలంలో... డీపీఎల్ బరిలో ఐపీఎల్ స్టార్‌లు!
ఈ వార్తాకథనం ఏంటి
గత ఏడాది జరిగిన ఐపీఎల్ మెగా వేలంలో వికెట్‌కీపర్-బ్యాట్స్‌మన్ రిషబ్ పంత్‌ను లఖ్‌నవూ సూపర్ జెయింట్స్ భారీ ధరకు కొనుగోలు చేసిన విషయం తెలిసిందే. అతడిని రూ.27 కోట్లతో తమ జట్టులోకి తీసుకుంది. ఇది ఐపీఎల్ చరిత్రలోనే అత్యధిక ధరగా నమోదైంది. తాజాగా రిషభ్ పంత్ మరో టీ20 లీగ్ అయిన దిల్లీ ప్రీమియర్ లీగ్ (Delhi Premier League - DPL) వేలంలో కూడా తనను నమోదు చేసుకున్నాడు. జూలై 6, 7 తేదీల్లో డీపీఎల్ రెండో ఎడిషన్ కోసం ఈ వేలం నిర్వహించనున్నారు.
వివరాలు
'న్యూ ఔటర్ దిల్లీ','న్యూ దిల్లీ' రెండు కొత్త జట్లు
ఈసారి డీపీఎల్‌లో 'న్యూ ఔటర్ దిల్లీ','న్యూ దిల్లీ' అనే రెండు కొత్త జట్లు చేరడంతో మొత్తం ఫ్రాంచైజీల సంఖ్య ఎనిమిదికి పెరిగింది. గత ఏడాది 2024లో నిర్వహించిన తొలి డీపీఎల్ టోర్నీలో దిగ్వేశ్ రాఠీ, ప్రియాంశ్ ఆర్య వంటి యువ ప్రతిభావంతులు వెలుగులోకి వచ్చారు. వారు అద్భుత ప్రదర్శనతో ఐపీఎల్ ఫ్రాంచైజీల దృష్టిని ఆకర్షించి, 2025 ఐపీఎల్ సీజన్‌లో అవకాశాలను అందిపుచ్చుకున్నారు. ఈసారి వేలంలో ఆ ఇద్దరు యువకులతో పాటు పలు ఐపీఎల్ స్టార్ క్రికెటర్లు కూడా బరిలో నిలిచారు. వారి మధ్యలో ఇషాంత్ శర్మ, ఆయుష్ బదోని, హర్షిత్ రాణా, హిమ్మత్ సింగ్, సుయాష్ శర్మ, మయాంక్ యాదవ్, అనుజ్ రావత్ పేర్లు ఉన్నాయి.
వివరాలు
సెహ్వాగ్ తనయులు కూడా!
ఈ డీపీఎల్ వేలంలో మరింత ఆసక్తిని కలిగించే విషయం ఏమిటంటే, భారత మాజీ క్రికెటర్ వీరేంద్ర సెహ్వాగ్ ఇద్దరు కుమారులు - ఆర్యవీర్ సెహ్వాగ్, వేదాంత్ సెహ్వాగ్ - కూడా వేలంలో పాల్గొనబోతున్నారు. వారు ఇద్దరూ 'బి' కేటగిరీలో ఉండనున్నట్లు సమాచారం. ఇంతటితో ఆగకుండా, భారత స్టార్ బ్యాట్స్‌మన్ విరాట్ కోహ్లీ అన్న కుమారుడు ఆర్యవీర్ కోహ్లీ కూడా ఈ లీగ్ వేలంలో పేరు నమోదు చేసినట్టు తెలిసింది. ప్రస్తుతం అతను విరాట్ చిన్ననాటి కోచ్ రాజ్‌కుమార్ శర్మ వద్ద క్రికెట్ పాఠాలు నేర్చుకుంటున్నాడు.