Ross Taylor: రిటైర్మెంట్‌పై రాస్ టేలర్ యూటర్న్.. ఈసారి ఆ జట్టు తరఫున!
ఈ వార్తాకథనం ఏంటి
న్యూజిలాండ్ తరఫున అత్యధిక అంతర్జాతీయ మ్యాచ్‌లు ఆడిన రాస్ టేలర్ మళ్లీ బ్యాట్ పట్టబోతున్నారు. అయితే ఈసారి ఆయన బ్లాక్ క్యాప్స్ కోసం కాకుండా, తన మూలాలు ఉన్న స్వదేశం సమోవా జట్టు తరఫున మైదానంలోకి దిగబోతున్నారు. నాలుగేళ్ల క్రితం అంతర్జాతీయ క్రికెట్‌కు వీడ్కోలు పలికిన ఈ 41 ఏళ్ల దిగ్గజం, వచ్చే ఏడాది జరిగే T20 ప్రపంచకప్‌కి సమోవా అర్హత సాధించేందుకు తన అనుభవంతో సహాయం చేయనున్నాడు. టేలర్ తన కెరీర్‌లో న్యూజిలాండ్ కోసం 112 టెస్టులు, 236 వన్డేలు, 102 టి20లు ఆడి ప్రత్యేక రికార్డులు నెలకొల్పాడు.
వివరాలు
మళ్లీ ఆటగాడిగా జట్టులో భాగమవుతానని ఊహించలేదు: టేలర్
తాను న్యూజిలాండ్ తరఫున ఆడుతున్నప్పటికీ, ఎప్పటినుంచో సమోవా క్రికెట్ అభివృద్ధికి ఏదో ఒక రూపంలో తోడ్పాటు అందించాలని తన కోరిక అని టేలర్ వెల్లడించాడు. మొదట్లో కోచ్‌గా లేదా చిన్నపిల్లలకు శిక్షణ ఇచ్చే విధంగా సహాయం చేస్తాననుకున్నానని, కానీ మళ్లీ ఆటగాడిగా జట్టులో భాగమవుతానని ఊహించలేదని ఆయన వివరించాడు. ప్రస్తుతం సమోవా జట్టుకు కోచ్‌గా ఉన్న మాజీ బ్లాక్ క్యాప్స్ ఆటగాడు టారుణ్ నేతులా, టేలర్‌ను జట్టులో చేర్చేందుకు విపరీతంగా కృషి చేశారు. ఇక ఆక్‌లాండ్ ఏసెస్ ఆల్‌రౌండర్ షాన్ సోలియా కూడా జట్టులో భాగమయ్యాడు. సమోవా జట్టు తొలి వరల్డ్ కప్ అర్హత సాధించే కలను నిజం చేయడంలో టేలర్ అనుభవం కీలకమని భావిస్తున్నారు.
వివరాలు
ఒమాన్‌లో జరిగే ఆసియా-పసిఫిక్ క్వాలిఫైయర్స్‌లో పోటీ
ఈ జట్టు అక్టోబర్‌లో ఒమాన్‌లో జరిగే ఆసియా-పసిఫిక్ క్వాలిఫైయర్స్‌లో పోటీ పడనుంది. ఒమాన్, పాపువా న్యూ గినియాతో ఒకే గ్రూప్‌లో ఉండటం సవాలుగా కనిపిస్తున్నప్పటికీ, రెండో రౌండ్‌కి చేరుకుని భారత్‌లో జరగబోయే వరల్డ్ కప్‌కి అర్హత సాధించడం ప్రధాన లక్ష్యమని టేలర్ స్పష్టం చేశాడు. రగ్బీ, రగ్బీ లీగ్‌లలో ప్రపంచవ్యాప్తంగా పేరు తెచ్చుకున్న సమోవా, ఇప్పుడు క్రికెట్‌లో కూడా తనకంటూ గుర్తింపు పొందేందుకు ముందుకు సాగుతోందని ఆయన అన్నారు. పసిఫిక్ దీవులలో క్రికెట్ ప్రాచుర్యం పొందేందుకు ఇది మంచి ఆరంభమని, యువతకు కొత్త దారులు చూపుతుందని టేలర్ విశ్వాసం వ్యక్తం చేశాడు.