Parthiv Patel-BCCI: ఏడాదికి రూ.3 కోట్లు.. అయినా చీఫ్ సెలెక్టర్ పదవికి పార్థివ్ పటేల్ నో!
ఈ వార్తాకథనం ఏంటి
టీమిండియా మాజీ వికెట్ కీపర్ బ్యాటర్ పార్థివ్ పటేల్ భారత క్రికెట్ జట్టు చీఫ్ సెలెక్టర్ పదవికి దరఖాస్తు చేయకపోవడం ఇప్పుడు క్రికెట్ వర్గాల్లో చర్చనీయాంశంగా మారింది. చీఫ్ సెలెక్టర్‌గా ఉన్న అజిత్ అగార్కర్ బాధ్యతల నుంచి తప్పుకుంటే.. ఆయన స్థానంలో పార్థివ్ పటేల్ నియమితులయ్యే అవకాశం ఉందని గతంలో ప్రచారం జరిగింది. ఈ పదవిపై పార్థివ్ కూడా ఆసక్తి చూపినట్లు వార్తలు వచ్చాయి. అయితే వెస్ట్ జోన్ సెలెక్టర్ పదవికి దరఖాస్తు చేసుకునే గడువు ముగిసినా ఆయన అప్లికేషన్ సమర్పించలేదు. దీంతో ఇంతటి కీలకమైన బాధ్యతలను పార్థివ్ ఎందుకు వదులుకున్నారనే ప్రశ్నలు అభిమానుల్లో మొదలయ్యాయి.
వివరాలు
రూ.3 కోట్ల ఆఫర్.. అయినా ఎందుకు వెనక్కి తగ్గారు?
పార్థివ్ పటేల్ సెలెక్టర్ పదవికి దరఖాస్తు చేయకపోవడం వెనుక కొన్ని ఆర్థికపరమైన అంశాలు ఉన్నట్లు తెలుస్తోంది.
బీసీసీఐ చీఫ్ సెలెక్టర్‌గా ఎంపికైతే ఏడాదికి సుమారు రూ.3 కోట్ల పారితోషికం లభిస్తుంది. అయితే ఈ పదవిని చేపడితే ప్రస్తుతం ఆయన నిర్వహిస్తున్న ఇతర బాధ్యతలను వదులుకోవాల్సి ఉంటుంది.
ప్రస్తుతం పార్థివ్ పటేల్ ఐపీఎల్ ఫ్రాంచైజీ గుజరాత్ టైటాన్స్‌కు అసిస్టెంట్ కోచ్‌గా, బ్యాటింగ్ కోచ్‌గా వ్యవహరిస్తున్నారు. వీటితో పాటు క్రికెట్ కామెంటరీ కూడా చేస్తున్నారు.
అయితే బీసీసీఐ నిబంధనల ప్రకారం.. చీఫ్ సెలెక్టర్‌గా బాధ్యతలు స్వీకరించిన తర్వాత కోచింగ్, కామెంటరీ వంటి ఇతర వృత్తిపరమైన కార్యకలాపాలను కొనసాగించడానికి వీలుండదు.
దీంతో ఈ పదవిని చేపడితే తన ప్రస్తుత బాధ్యతలను వదులుకోవాల్సిన పరిస్థితి ఏర్పడుతుంది.
వివరాలు
ఏడాదికి రూ.7-9 కోట్ల వరకు ఆదాయం?
గుజరాత్ టైటాన్స్ కోచింగ్ బాధ్యతలు, క్రికెట్ కామెంటరీ ద్వారా పార్థివ్ పటేల్ ఏడాదికి సుమారు రూ.7 కోట్ల నుంచి రూ.9 కోట్ల వరకు సంపాదిస్తున్నట్లు సదరు నివేదిక పేర్కొంది.
ఈ నేపథ్యంలో చీఫ్ సెలెక్టర్ పదవిని స్వీకరిస్తే ఆయన ప్రస్తుత ఆదాయం గణనీయంగా తగ్గే అవకాశం ఉంది.
ప్రస్తుతం వివిధ బాధ్యతల ద్వారా ఎక్కువ ఆదాయం పొందుతున్న నేపథ్యంలో.. ఏడాదికి రూ.3 కోట్ల పారితోషికం లభించే సెలెక్టర్ పదవికి దరఖాస్తు చేయకూడదని పార్థివ్ నిర్ణయించుకున్నట్లు సమాచారం.
ప్రస్తుతం సెలెక్షన్ కమిటీలో దక్షిణ మండలం నుంచి ఎంపికైన ప్రజ్ఞాన్ ఓజా కొనసాగుతున్నారు. మరోవైపు వెస్ట్ జోన్ నుంచి కొత్త సెలెక్టర్‌ను నియమించే అవకాశం ఉన్నట్లు తెలుస్తోంది.
వివరాలు
సెలెక్టర్ల జీతంపై రవిచంద్రన్ అశ్విన్ ప్రశ్నలు
ఈ పదవికి మాజీ క్రికెటర్లు వసీం జాఫర్, రమేశ్ పవార్ పేర్లు ప్రముఖంగా వినిపిస్తున్నాయి.
పార్థివ్ పటేల్ చీఫ్ సెలెక్టర్ పదవికి దరఖాస్తు చేయలేదన్న వార్తల నేపథ్యంలో భారత మాజీ స్పిన్నర్ రవిచంద్రన్ అశ్విన్.. బీసీసీఐ సెలెక్టర్లకు అందించే పారితోషికంపై కీలక ప్రశ్నలు లేవనెత్తాడు.
భారత క్రికెట్ జట్టు ఎంపిక అత్యంత కీలకమైన బాధ్యత అని, ఈ పదవికి అనుభవం, ప్రతిభ ఉన్న మాజీ క్రికెటర్లను ఆకర్షించాలంటే మెరుగైన ఆర్థిక ప్రయోజనాలు కల్పించాల్సిన అవసరం ఉందని అభిప్రాయపడ్డాడు.
సెలెక్టర్లకు విధులు నిర్వహించే విషయంలో కొన్ని పరిమితులు ఉంటాయని అశ్విన్ గుర్తుచేశాడు.
వారు చీఫ్ సెలెక్టర్ లేదా సెలెక్టర్ బాధ్యతల్లో ఉన్నప్పుడు కోచింగ్ పనులు చేపట్టడం, మీడియా రంగంలో కొనసాగడం సాధ్యం కాదు
వివరాలు
వృత్తిపరమైన బాధ్యతలే కారణం
. అదే సమయంలో దేశవాళీ క్రికెట్‌తో పాటు ఐపీఎల్ మ్యాచ్‌లను కూడా నిరంతరం పరిశీలిస్తూ, ఏడాది పొడవునా ఆటకు సంబంధించిన వ్యవహారాల్లో చురుగ్గా పాల్గొనాల్సి ఉంటుంది.
ఇన్ని బాధ్యతలు నిర్వహించాల్సి రావడంతో పాటు ఇతర ఆదాయ మార్గాలపై పరిమితులు ఉన్నప్పుడు.. సెలెక్టర్లకు తగిన పారితోషికం అందించడం అవసరమని అశ్విన్ పేర్కొన్నాడు.
మాజీ భారత కెప్టెన్లు సౌరవ్ గంగూలీ, రాహుల్ ద్రవిడ్, అనిల్ కుంబ్లే వంటి అనుభవజ్ఞులు సెలెక్షన్ కమిటీలోకి రావాలంటే ఆకర్షణీయమైన పారితోషికం కల్పించాలని అభిప్రాయపడ్డాడు.
మొత్తంగా పార్థివ్ పటేల్ చీఫ్ సెలెక్టర్ పదవికి దరఖాస్తు చేయకపోవడం వెనుక ఆయన ప్రస్తుత వృత్తిపరమైన బాధ్యతలు, ఆదాయానికి సంబంధించిన అంశాలు ప్రధాన కారణాలుగా ప్రచారం జరుగుతోంది.