Mohammed Shami: షమీకి హైకోర్టులో ఎదురుదెబ్బ.. నెలకు రూ.4 లక్షల భరణం చెల్లించాల్సిందే!
ఈ వార్తాకథనం ఏంటి
క్రికెటర్ మహ్మద్ షమీకి కలకత్తా హైకోర్టు భారీ షాక్ ఇచ్చింది. తన మాజీ భార్య హసిన్ జహాన్, కుమార్తెకు నెలవారీ భరణంగా మొత్తం రూ.4 లక్షలు చెల్లించాలని ఆదేశించింది. దీనిలో రూ.2.5 లక్షలు కుమార్తె కోసం కాగా, మిగిలిన రూ.1.5 లక్షలు హసిన్‌కు అందనున్నాయి. న్యాయమూర్తి అజయ్ ముఖర్జీ ఈ ఉత్తర్వులు జారీ చేశారు. 2018లో హసిన్ జహాన్ దాఖలు చేసిన కేసులో తనకు రూ.7 లక్షలు, కుమార్తెకు రూ.3 లక్షలు భరణం ఇవ్వాలని షమీని కోరారు. కానీ అప్పట్లో దిగువ కోర్టు మాత్రం హసిన్‌కు రూ.50,000, కుమార్తెకు రూ.80,000 మాత్రమే మంజూరు చేసింది. దీనిపై అసంతృప్తి వ్యక్తం చేసిన హసిన్, హైకోర్టులో అప్పీల్ దాఖలు చేశారు.
Details
దాఖలు చేసిన తేదీ నుంచి ఈ మొత్తాన్ని చెల్లించాల్సింది
దాఖలైన ఆధారాల ప్రకారం, 2020-21 ఆర్థిక సంవత్సరంలో షమీ రూ.7.19 కోట్లు ఆదాయపన్ను రిటర్న్‌గా చూపించారు. దీనిపై స్పందించిన హైకోర్టు, షమీ ఆదాయ స్థాయికి అనుగుణంగా భార్య, కుమార్తెకు గౌరవప్రదమైన జీవనం గడపాలనే ఉద్దేశంతో రూ.4 లక్షల మొత్తాన్ని భరణంగా ఇవ్వాలని ఆదేశించింది. అంతేగాక 2018లో కేసు దాఖలు చేసిన తేదీ నుంచి ఈ మొత్తం చెల్లించాల్సిందిగా స్పష్టం చేసింది. కుమార్తె విద్య కోసం అవసరమయ్యే ఖర్చును షమీ స్వచ్ఛందంగా భరిస్తాడన్న నమ్మకం కలవలసిన అవసరం ఉందని హైకోర్టు వ్యాఖ్యానించింది.
Details
60 రోజుల్లో కేసును పరిష్కరించాలి
ప్రస్తుతం హసిన్ జహాన్ బ్యాంక్ వడ్డీ ద్వారా నెలకు కేవలం రూ.16,000 మాత్రమే ఆదాయం పొందుతున్నారని, షమీతో విడిపోయిన తర్వాత ఆమె రెండోసారి పెళ్లి కూడా చేసుకోలేదని హైకోర్టు పేర్కొంది. ఇకపై ఈ కేసును 60 రోజుల్లోపు పరిష్కరించాలంటూ, సంబంధిత దిగువ కోర్టుకు కలకత్తా హైకోర్టు స్పష్టమైన ఆదేశాలు జారీ చేసింది. మొత్తానికి, షమీ ఆదాయం దృష్ట్యా హసిన్ జహాన్, కుమార్తెకు నెలకు రూ.4 లక్షల భరణం ఇవ్వాల్సిందేనన్న తీర్పు వెలువడింది.