T20 World Cup 2026 schedule: ప్రపంచకప్ జట్టులో తెలుగు ప్రతిభ.. తిలక్ రన్స్, సిరాజ్ కట్టుదిట్టమైన బౌలింగ్
ఈ వార్తాకథనం ఏంటి
భారత జట్టు ప్రపంచకప్ గెలిస్తే ఆనందమే వేరు. ఆ విజయంలో మన తెలుగు ఆటగాళ్లు కూడా భాగస్వాములైతే ఆ సంతోషం మరింత పెరుగుతుంది. ఈసారి అలాంటి ఆనందాన్ని మహ్మద్ సిరాజ్, తిలక్ వర్మ అభిమానులకు అందించారు. 2024 టీ20 ప్రపంచకప్ విజేత జట్టులో సిరాజ్ సభ్యుడిగా ఉన్నాడు. ఈసారి అతనితో పాటు తిలక్ వర్మ కూడా జట్టులో చోటు దక్కించుకుని తన ముద్ర వేశాడు. ఒకప్పుడు భారత జట్టుకు మిడిల్ ఆర్డర్లో నమ్మదగిన ఎడమచేతి వాటం బ్యాటర్ కొరత స్పష్టంగా కనిపించేది. ఆ లోటును భర్తీ చేస్తూ యువ ఆటగాడు తిలక్ వర్మ తన స్థానాన్ని జట్టులో బలంగా స్థిరపరుచుకున్నాడు.
వివరాలు
తిలక్ బ్యాటింగ్ జోరు..
కేవలం 23 ఏళ్ల వయసులోనే అతను ఈ పొట్టి కప్పులో అద్భుతంగా రాణించాడు. మిడిల్ ఆర్డర్లో జట్టుకు ఆధారంగా నిలుస్తూ కీలక ఇన్నింగ్స్లతో ఆకట్టుకున్నాడు. ప్రత్యర్థి బౌలర్లపై ధైర్యంగా ఎదురుదాడి చేయడం, అవసరమైన సమయంలో ఇన్నింగ్స్ను నిలబెట్టడం ఈ టోర్నీలో తిలక్ ఆటలో కనిపించిన ముఖ్య లక్షణాలు. సూపర్-8 దశలో దక్షిణాఫ్రికాతో జరిగిన మ్యాచ్లో భారత్కు ఎదురైన ఏకైక ఓటమిలో తిలక్ (1) పరుగుకే అవుట్ అయ్యాడు. అయితే మిగతా మ్యాచ్లలో అతను స్థిరంగా రాణించాడు. మొత్తం 9 మ్యాచ్లలో 154.47 స్ట్రైక్రేట్తో విలువైన 207 పరుగులు సాధించి జట్టుకు కీలకంగా నిలిచాడు.
వివరాలు
సిరాజ్ అంకితభావం
మరోవైపు సిరాజ్కు ఈ టోర్నీలో ఎక్కువ అవకాశాలు దక్కలేదు. అయినప్పటికీ తాను జట్టు కోసం ఎప్పుడైనా సిద్ధమేనని నిరూపించాడు. అమెరికాతో జరిగిన తొలి మ్యాచ్లో అతనికి అవకాశం లభించగా, సిరాజ్ 3/29 గణాంకాలతో బౌలింగ్లో మెరిశాడు. టోర్నీ ప్రారంభానికి ముందు హర్షిత్ రాణా గాయపడడంతో సిరాజ్ను అత్యవసరంగా పిలిచారు. హైదరాబాద్లో ఉన్న అతను వెంటనే ముంబయికి చేరుకున్నాడు. ఇదే సమయంలో బుమ్రా అనారోగ్యానికి గురవడంతో అమెరికాతో జరిగిన మొదటి మ్యాచ్లో సిరాజ్కు తుది జట్టులో చోటు లభించింది. పిలుపు వచ్చిన 24 గంటల లోపే జట్టును చేరుకుని మ్యాచ్ ఆడటమే కాకుండా మెరుగైన ప్రదర్శన ఇవ్వడం అతడి అంకితభావానికి నిదర్శనంగా నిలిచింది.