Ashwani Kumar : 385 రోజుల గ్యాప్… కానీ ఫలితం అదే! అశ్విని కుమార్ సూపర్ షో
ఈ వార్తాకథనం ఏంటి
ఐపీఎల్ 2026 సీజన్లో ముంబయి ఇండియన్స్కు చెందిన యువ బౌలర్ అశ్విని కుమార్ ప్రదర్శన ప్రస్తుతం క్రికెట్ ప్రపంచంలో చర్చనీయాంశంగా మారింది. గుజరాత్ టైటాన్స్తో జరిగిన మ్యాచ్లో అతను చూపిన ఆటతీరు చూసి, గతాన్ని మళ్లీ గుర్తుచేసుకున్నట్టుగా అనిపిస్తోంది. సరిగ్గా 385 రోజుల క్రితం తన తొలి మ్యాచ్లో చేసిన అద్భుతాన్ని, ఇప్పుడు మళ్లీ అదే తరహాలో పునరావృతం చేయడం విశేషం. ఈ అరుదైన సంఘటన అభిమానులు మాత్రమే కాకుండా క్రికెట్ నిపుణులను కూడా ఆశ్చర్యపరుస్తోంది.
వివరాలు
2025లో ప్రయాణం ప్రారంభం..
అశ్విని కుమార్ ఐపీఎల్లో తన ప్రయాణాన్ని 2025లో ప్రారంభించాడు. 2025 మార్చి 31న కోల్కతా నైట్ రైడర్స్పై జరిగిన తన డెబ్యూ మ్యాచ్లో అతను 4 ఓవర్లు బౌలింగ్ చేసి 24 పరుగులు ఇచ్చి 4 వికెట్లు సాధించాడు. ఆ తర్వాత సరిగ్గా 385 రోజుల అనంతరం, 2026 ఏప్రిల్ 20న ఐపీఎల్ 2026లో తన మొదటి మ్యాచ్ ఆడాడు. ఈసారి ప్రత్యర్థి గుజరాత్ టైటాన్స్. ఆశ్చర్యకరంగా, ఈ మ్యాచ్లో కూడా అతను 4 ఓవర్లు వేసి, 24 పరుగులు ఇచ్చి, 4 వికెట్లు పడగొట్టాడు. ఇలాంటి సమాన గణాంకాలు ఐపీఎల్ చరిత్రలో చాలా అరుదుగా కనిపిస్తాయి.
వివరాలు
ప్రధాన పోలికలు ఇవే..
రెండు సందర్భాల్లోనూ అతను 4 వికెట్లు సాధించాడు. రెండూ ఆయా సీజన్లలో అతనికి తొలి మ్యాచ్లే కావడం గమనార్హం. రెండు మ్యాచ్ల్లోనూ అతను 24 పరుగులే ఇవ్వడం ప్రత్యేకం. మరింత ఆసక్తికరమైన అంశం ఏమిటంటే, రెండు మ్యాచ్ల్లోనూ అతని తొలి వికెట్ ప్రత్యర్థి జట్టు కెప్టెన్దే. 2025లో కేకేఆర్ కెప్టెన్ అజింక్య రహానేను ఔట్ చేయగా, 2026లో గుజరాత్ టైటాన్స్ కెప్టెన్ శుభ్మన్ గిల్ను అవుట్ చేశాడు. ముంబై ఇండియన్స్ వరుస పరాజయాలతో ఇబ్బందులు ఎదుర్కొంటున్న సమయంలో, అశ్విని కుమార్ రూపంలో జట్టుకు ఒక కీలక ఆయుధం లభించింది. ఎడమచేతి వేగ బౌలర్గా అతను బ్యాటర్లను గందరగోళానికి గురిచేస్తూ, తన వేగంలో మార్పులు చేస్తూ వికెట్లు సాధిస్తున్నాడు.
వివరాలు
ముంబైకి కొత్త ఉత్సాహం..
గుజరాత్ జట్టుకు చెందిన రాహుల్ తెవాటియా, షారుక్ ఖాన్ వంటి దూకుడు బ్యాటర్లను అతను ఔట్ చేసిన తీరు జట్టు విజయానికి ముఖ్య కారణంగా నిలిచింది. ఇప్పటివరకు జస్ప్రీత్ బుమ్రాకు సరైన భాగస్వామి కోసం ఎదురుచూస్తున్న ముంబైకి, అశ్విని రూపంలో సముచితమైన తోడు దొరికినట్లైంది. అశ్విని ప్రదర్శనపై ముంబై ఇండియన్స్ కెప్టెన్ హార్దిక్ పాండ్యా ప్రశంసలు కురిపించాడు. గత ఏడాది తన తొలి మ్యాచ్లో ఎలా ఆడాడో, ఈ ఏడాది కూడా అదే స్థాయిలో ప్రదర్శన ఇవ్వడం ఎంతో ఆనందాన్ని కలిగించిందని తెలిపాడు. వరుస ఓటముల తర్వాత ఈ మ్యాచ్లో ముంబై ఇండియన్స్ 99 పరుగుల తేడాతో గెలవడం జట్టుకు కొత్త ఉత్సాహాన్ని ఇచ్చింది.