Virat Kohli: విరాట్ కోహ్లీ మరో మైలురాయి.. కివీస్పై అరుదైన ఘనత నమోదు
ఈ వార్తాకథనం ఏంటి
టీమిండియా స్టార్ క్రికెటర్ 'విరాట్ కోహ్లీ' మరో అరుదైన రికార్డును తన ఖాతాలో వేసుకున్నాడు. న్యూజిలాండ్తో ఇండోర్ వేదికగా జరిగిన మూడో వన్డేలో అద్భుతమైన శతకంతో చెలరేగిన కోహ్లీ, వ్యక్తిగతంగా రికార్డులు సృష్టించినప్పటికీ జట్టుకు మాత్రం విజయం అందించలేకపోయాడు. ఈ మ్యాచ్లో భారత్ 41 పరుగుల తేడాతో ఓటమిపాలవగా, మూడు వన్డేల సిరీస్ను న్యూజిలాండ్ 2-1 తేడాతో కైవసం చేసుకుంది. ఈ కీలక మ్యాచ్లో కోహ్లీ 91 బంతుల్లో 8 ఫోర్లు, 2 సిక్సర్ల సాయంతో అద్భుతమైన సెంచరీ నమోదు చేశాడు. వన్డే ఫార్మాట్లో న్యూజిలాండ్పై ఇది కోహ్లీకి 7వ శతకం కావడం విశేషం. ఈ ఘనతతో కివీస్పై అత్యధిక వన్డే సెంచరీలు బాదిన ఆటగాడిగా కోహ్లీ సరికొత్త చరిత్ర సృష్టించాడు.
Details
న్యూజిలాండ్పై అత్యధిక సెంచరీలు సాధించిన ఆటగాడిగా రికార్డు
ఇప్పటివరకు ఈ రికార్డు ఆస్ట్రేలియా దిగ్గజం రికీ పాంటింగ్, భారత మాజీ ఓపెనర్ వీరేంద్ర సెహ్వాగ్ (చెరో 6 సెంచరీలు) పేరిట ఉండగా, కోహ్లీ వాటిని అధిగమించాడు. ఈ జాబితాలో సచిన్ టెండూల్కర్, సనత్ జయసూర్య (చెరో 5 సెంచరీలు) తర్వాతి స్థానాల్లో ఉన్నారు. అంతేకాదు అన్ని ఫార్మాట్లను కలిపి కూడా న్యూజిలాండ్పై అత్యధిక సెంచరీలు సాధించిన ఆటగాడిగా కోహ్లీ అగ్రస్థానంలో నిలవడం మరో విశేషం. కివీస్పై అన్ని ఫార్మాట్లలో కలిపి కోహ్లీ ఇప్పటివరకు 10 సెంచరీలు సాధించాడు. ఈ జాబితాలో జాక్వెస్ కలిస్, జో రూట్, సచిన్ టెండూల్కర్ చెరో 9 శతకాలతో తర్వాతి స్థానాల్లో కొనసాగుతున్నారు.
Details
న్యూజిలాండ్పై అత్యధిక వన్డే సెంచరీలు
7 - విరాట్ కోహ్లీ (36 ఇన్నింగ్సులు) 6 - రికీ పాంటింగ్ (50 ఇన్నింగ్సులు) 6 - వీరేంద్ర సెహ్వాగ్ (23 ఇన్నింగ్సులు) 5 - సచిన్ టెండూల్కర్ (41 ఇన్నింగ్సులు) 5 - సనత్ జయసూర్య (45 ఇన్నింగ్సులు) కివీస్పై అత్యధిక సెంచరీలు (అన్ని ఫార్మాట్లలో) 10 - విరాట్ కోహ్లీ (73ఇన్నింగ్సులు) 9 - జాక్వెస్ కలిస్ (76ఇన్నింగ్సులు) 9 - జో రూట్ (71ఇన్నింగ్సులు) 9 - సచిన్ టెండూల్కర్ (80 ఇన్నింగ్సులు) రికార్డుల వర్షం కురిపించిన కోహ్లీ ఇన్నింగ్స్ అభిమానులను అలరించినప్పటికీ, జట్టు పరాజయం కావడం భారత శిబిరాన్ని నిరాశకు గురిచేసింది. అయినప్పటికీ, కోహ్లీ ఫామ్ తిరిగి పుంజుకోవడం రాబోయే సిరీస్లకు సానుకూల సంకేతంగా భావిస్తున్నారు.