Harmanpreet Kaur: అడ్డంకులను బద్దలు కొట్టాం.. ఇది ముగింపు కాదు, ఆరంభం మాత్రమే : హర్మన్‌ప్రీత్‌ కౌర్
ఈ వార్తాకథనం ఏంటి
భారత మహిళల క్రికెట్ జట్టు కెప్టెన్ హర్మన్‌ప్రీత్‌ కౌర్ చరిత్రాత్మక ప్రపంచకప్‌ విజయం అనంతరం తన భావోద్వేగాలను వ్యక్తం చేసింది. అర్ధరాత్రి సాధించిన ఆ అద్భుత విజయానంతరం ఆమె 'అడ్డంకులను బద్దలు కొట్టాం... ఇది ముగింపు కాదు, కేవలం ఆరంభం మాత్రమే' అంటూ తన హృదయాన్ని ఆవిష్కరించింది. ఎన్నాళ్లుగానో ఎదురుచూసిన ఐసీసీ మహిళల వన్డే ప్రపంచకప్‌(Women's World Cup) విజయం భారత జట్టును ఉప్పొంగే ఆనందంలో ముంచేసింది. ఫైనల్‌లో విజయాన్ని సాధించిన క్షణంలో హర్మన్‌ప్రీత్‌ భావోద్వేగాలతో ఉప్పొంగిపోయింది. కీలక క్యాచ్‌ పట్టిన వెంటనే ఆమె రేపంటూ లేనట్టుగా పిచ్చిగా పరిగెత్తింది. ఆ క్షణాన్ని ఆస్వాదిస్తున్న సహచర క్రీడాకారిణులు సంబరాల్లో తేలుతుండగా, హర్మన్‌ప్రీత్‌ మాత్రం కొద్దిగా దూరంగా నిలబడి ఆ ఘట్టాన్ని మౌనంగా ఆస్వాదించింది.
Details
తన వినయాన్ని ప్రదర్శించిన కెప్టెన్
తర్వాత తన 'గురువు' అమోల్‌ మజుందార్‌ వద్దకు వెళ్లి ఆయన పాదాలను తాకి ఆశీర్వాదం తీసుకుంది. వెంటనే ఆయనను కౌగిలించుకుని భావోద్వేగాలతో మునిగిపోయింది. విజయం తర్వాత హర్మన్‌ప్రీత్‌ తన వినయాన్ని మరోసారి చూపించింది. భారత మహిళల క్రికెట్ దిగ్గజాలు మిథాలీ రాజ్, ఝులన్‌ గోస్వామిలను వేదికపైకి పిలిచి ప్రపంచకప్‌ ట్రోఫీని కలిసి అందుకోవాలని కోరింది. ఈ ఆహ్వానం అందుకున్న ఇద్దరు లెజెండ్స్‌ కంటతడి పెట్టారు. ఆ సమయంలో కెప్టెన్ హర్మన్‌ప్రీత్‌, వైస్‌ కెప్టెన్ స్మృతి మంధాన ఇద్దరూ ఝులన్‌ను ఆలింగనం చేసుకుని దీదీ, ఇది మీ కోసమే అని చెప్పిన క్షణం ఆ స్టేడియంలో ఉన్న ప్రతి ఒక్కరి హృదయాన్ని కదిలించింది.
Details
ఇది ఆరంభం మాత్రమే
తర్వాత మీడియాతో మాట్లాడిన హర్మన్‌ప్రీత్‌ కౌర్ తన భావాలను ఇలా వ్యక్తపరిచింది— ఇది ఆరంభం మాత్రమే. మేము ఈ అడ్డంకిని బద్దలు కొట్టాలనుకున్నాం. ఇకపై ఈ విజయాన్ని ఒక అలవాటుగా మలుచుకోవడమే మా లక్ష్యం. చాలా కాలంగా ఎదురుచూస్తున్న ఆ క్షణం ఇప్పుడు వచ్చింది. ఇక్కడితో ఆగడం లేదు. ముందుకీ పెద్ద పెద్ద విజయాలు సాధించాలన్నది మా ఆశయం. మేము ఎప్పటికప్పుడు మెరుగుపరుచుకుంటూ పోతాము. ఇది ముగింపు కాదు, కేవలం ఆరంభం మాత్రమేనని వెల్లడించారు. ఆమె మాటలు కేవలం విజేత కెప్టెన్ గర్వాన్ని కాదు, భారత మహిళల క్రికెట్‌లో కొత్త యుగానికి సంకేతమయ్యాయి.