IND vs ENG: మాంచెస్టర్‌లో వాతావరణం మళ్లీ కలవరపెడుతుందా? భారత్-ఇంగ్లాండ్ టెస్ట్‌కు వర్షం అడ్డంకి కాబోతోందా?
ఈ వార్తాకథనం ఏంటి
లార్డ్స్ వేదికగా ఉత్కంఠభరితంగా ముగిసిన మూడో టెస్ట్ తర్వాత తొమ్మిది రోజుల విరామం అనంతరం భారత్, ఇంగ్లండ్ జట్లు మళ్లీ మైదానంలోకి దిగేందుకు సిద్ధమయ్యాయి. జూలై 23 బుధవారం నుంచి మాంచెస్టర్ ఓల్డ్ ట్రాఫర్డ్ వేదికగా నాలుగో టెస్ట్ ప్రారంభంకానుంది. ఈ టెస్ట్‌తో ఐదు మ్యాచ్‌ల అండర్సన్-తెండూల్కర్ ట్రోఫీ సిరీస్‌ కీలక దశలోకి ప్రవేశించబోతోంది. లార్డ్స్ వేదికగా జరిగిన మూడో టెస్ట్‌లో ఇంగ్లాండ్ 22 పరుగుల తేడాతో విజయం సాధించి సిరీస్‌ను 2-1తో ముందుండేలా చేసుకుంది. 193 పరుగుల విజయలక్ష్యాన్ని చేధించడంలో భారత్ విఫలమైంది. అద్భుతంగా బౌలింగ్‌ చేసిన జస్ప్రీత్ బుమ్రా (5/74) వికెట్లను తీసినా, తొలి ఇన్నింగ్స్‌లో జోరుగా ఆడిన జో రూట్ (100) సహా ఇంగ్లాండ్ 387 పరుగులు చేసింది.
Details
22 పరుగుల తేడాతో ఓటమి
భారత్ బ్యాటింగ్‌లో మంచి ప్రారంభాలు వచ్చినప్పటికీ, కీలక సమయంలో రిషబ్ పంత్ (74) రనౌట్ కావడం, కేఎల్ రాహుల్ సెంచరీ వద్ద ఆగిపోవడం తీవ్ర విమర్శలకు దారి తీసింది. భారత్ కూడా ఇంగ్లాండ్ తరహాలోనే 387 పరుగులకు ఆలౌట్ అయింది. అనంతరం నాలుగో రోజు వాషింగ్టన్ సుందర్ 4/22తో అద్భుత స్పెల్ వేసి ఇంగ్లాండ్‌ను కేవలం 192 పరుగులకే కట్టడి చేశాడు. కానీ చివరికి భారత్ బ్యాటింగ్ మరోసారి కుప్పకూలింది. 170 పరుగులకే ఆలౌట్ అవడంతో 22 పరుగుల తేడాతో ఓటమి చవిచూసింది. మొదటి ఇన్నింగ్స్‌లో 72 పరుగులు చేసిన జడేజా, రెండో ఇన్నింగ్స్‌లోనూ 61 నాటౌట్‌గా నిలిచినా విజయం దక్కలేదు.
Details
మాంచెస్టర్ పిచ్ రిపోర్ట్‌
చివరిలో సిరాజ్ బ్యాట్‌ను డిఫెండింగ్‌గా ఉంచగా, షోయబ్ బషీర్ వేసిన బంతి స్టంప్స్‌కు తాకి బేల్స్ పడగొట్టడంతో భారత్ ఆశలు ఆవిరయ్యాయి. మాంచెస్టర్‌లోని ఓల్డ్ ట్రాఫర్డ్ మైదానంలో మ్యాచ్ ఆరంభానికి ముందు 'గ్రీన్ టాప్' కనిపిస్తోంది. అయితే మ్యాచ్ సమీపిస్తున్న కొద్దీ పిచ్ రూపురేఖలు మారే అవకాశముంది. భారత్ మరోసారి రెండు స్పిన్‌ ఆల్‌రౌండర్లు, ముగ్గురు సీమర్లతో కూడిన తమ విజయవంతమైన కాంబినేషన్‌తోనే బరిలోకి దిగే అవకాశముంది.