Bangladesh: బాంగ్లాదేశ్'లో హింసాత్మక ఘర్షణలు.. ఛటోగ్రామ్‌లో మూడు హిందూ దేవాలయాలపై దాడి
బంగ్లాదేశ్‌లో హిందూ మైనారిటీలపై దాడుల నేపథ్యంలో చిట్టగాంగ్‌లో హింసాత్మక ఘటనలు చోటుచేసుకున్నాయి. ఈ సంఘటనలలో హిందూ దేవాలయాలు ప్రధాన లక్ష్యంగా మారాయి. మంగళవారం చిట్టగాంగ్‌లో దుండగులు లోక్‌నాథ్ ఆలయం, ఫిరంగి బజార్‌లోని మానస మాత ఆలయం, హజారీ లేన్‌లోని కాళీ మాత ఆలయాలను ధ్వంసం చేశారు. ఇస్కాన్ సభ్యుడు, హిందూ నాయకుడు చిన్మోయ్ కృష్ణ దాస్ అరెస్టుకు వ్యతిరేకంగా దేశవ్యాప్తంగా నిరసనలు జరుగుతున్నాయి. ఆయన బెయిల్‌ను కోర్టు రద్దు చేయడంతో పరిస్థితి మరింత దిగజారింది. దేవాలయాలపై జరుగుతున్న దాడులు, ఇస్లామిక్ ఛాందసవాదుల పెరుగుదల, హిందూ మైనారిటీలపై దాడులు ఒక వ్యూహాత్మక ప్రయత్నంగా భావించబడుతున్నాయి.
హిందువులు పెద్ద సంఖ్యలో శాంతియుత నిరసనలు
ఆగస్టు 5న షేక్ హసీనా ప్రభుత్వం పడిపోయిన తరువాత దేశంలో హిందూ మైనారిటీలపై దాడులు మరింత తీవ్రమయ్యాయి. ఈ పరిస్థితిని "మారణహోమం"గా హిందూ నాయకులు పేర్కొన్నారు. ఇస్లామిక్ ఛాందసవాదుల ప్రేరేపిత దాడులకు ప్రతిస్పందనగా, హిందువులు పెద్ద సంఖ్యలో శాంతియుత నిరసనలు చేపట్టారు. ఈ నిరసనలు ముఖ్యంగా ఇస్కాన్ ద్వారా నిర్వహించబడ్డాయి. ప్రపంచవ్యాప్తంగా అనేక అనుచరులు ఉన్న ఇస్కాన్ సంస్థ, చిన్మోయ్ కృష్ణ దాస్ విడుదల కోసం తమ పర్యటనలను చేపట్టింది. ఇదే సమయంలో, చిన్మోయ్ కృష్ణ దాస్‌ను ఢాకా విమానాశ్రయంలో అరెస్టు చేసి జ్యుడీషియల్ కస్టడీకి పంపించారు. ఈ చర్యలతో నిరసనలు మరింత ఉధృతమయ్యాయి. ఠాకూర్‌గావ్‌లో శాంతియుత నిరసన తెలుపుతున్న హిందూ మైనారిటీలపై బంగ్లాదేశ్ సైన్యం దాడి జరపడం తీవ్ర విమర్శలకు దారితీసింది.
