హిల్లరీ తుఫాను బీభత్సం; బాజా వద్ద తీరం దాటిన సైక్లోన్.. కాలిఫోర్నియా వైపు పయనం
ఈ వార్తాకథనం ఏంటి
హిల్లరీ తుపాను మెక్సికోలోని బాజా కాలిఫోర్నియా ద్వీపకల్పం వద్ద తీరం దాటింది. ఆ తర్వాత అమెరికా రాష్ట్రమైన కాలిఫోర్నియాకు చేరుకుంది.
తుపాను తీరం దాటి సమయంలో బీభత్సం సృష్టించింది. దక్షిణ కాలిఫోర్నియాను తీవ్రమైన వరదలతో ముంచెత్తింది.
రహదారులు దారుణంగా దెబ్బతిన్నాయి. బలమైన గాలుల ధాటికి వందలాది చెట్లు నేలకూలాయి.
తుపాను వల్ల ఇదాహోకు ఉత్తరాన ఉన్న ప్రదేశాల్లో ఆకస్మిక వరదలు సంభవించవచ్చని అధికారులు హెచ్చరించారు.
84సంవత్సరాల్లో దక్షిణ కాలిఫోర్నియాను తాకిన మొదటి ఉష్ణమండల తుఫాను 'హిల్లరీ' కావడం గమనార్హం.
బాజా కాలిఫోర్నియా, నైరుతి అమెరికా ప్రాంతాల్లో ప్రాణాంతక వరదలు ముంచెత్తుతాయని అమెరికా నేషనల్ హరికేన్ సెంటర్ హెచ్చరించింది.
వరదలు, ఈదురు గాలులు, టోర్నడోలు వచ్చే అవకాశం ఉందని నేషనల్ హరికేన్ సెంటర్ పేర్కొంది.
తుపాను
గంటకు 209 నుంచి 251 కి.మీ వేగంతో గాలులు
హిల్లరీ తుపాను తీరం దాటే సమయంలో గంటకు 209 నుంచి 251 కి.మీ వేగంతో గాలి వీచినట్లు అధికారులు చెప్పారు. తుపాను బలహీనపడినప్పటికీ ప్రజలు జాగ్రత్తలు తీసుకోవాలని హెచ్చరించారు.
హిల్లరీ తుపాను అమెరికా రాష్ట్రమైన కాలిఫోర్నియా వేపు వస్తున్నందున ప్రజలు అప్రమత్తంగా ఉండాలని హరికేన్ సెంటర్ డైరెక్టర్ మైఖేల్ బ్రెన్నాన్ పేర్కొన్నారు.
వరదలో మెక్సికన్‌లోని శాంటా రోసాలియా పట్టణంలో ఒక వాహనం కొట్టుకుపోయింది. ఆ వాహనంలో ఐదుగురు ఉండగా, ఒకరు చనిపోయారు. మరో నలుగురిని సహాయక సిబ్బంది కాపాడారు.
హిల్లరీ తుపాను కారణంగా లోతట్టు ప్రాంతాలు తీవ్రంగా ప్రభావితం అవుతాయని అందుకే మెక్సికో, కాలిఫోర్నియా, నెవాడాలోని కొన్ని ప్రాంతాల్లో భారీ వర్షాలు కురుస్తాయని హరికేన్ సెంటర్ తెలిపింది.
తుపాను
కాలిఫోర్నియాలో అత్యవసర పరిస్థితిని ప్రకటించిన గవర్నర్
హిల్లరీ తుఫాను కాలిఫోర్నియా వైపు దూసుకురావడంతో రాష్ట్రంలో గవర్నర్ గావిన్ న్యూసోమ్ అత్యవసర పరిస్థితిని ప్రకటించారు. ఆహారం, నీరు, ఇతర సహాయాలతో బృందాలు సిద్ధంగా ఉన్నాయని అధికారులు తెలిపారు.
పర్యాటక కేంద్రమైన శాంటా కాటాలినా ద్వీపం, శాన్ బెర్నార్డినో కౌంటీలోని అనేక పర్వత ప్రాంతాల ప్రజలకు అధికారులు హెచ్చరికలు జారీ చేశారు.
వారిని సురక్షిత ప్రాంతాలకు తరలించే ఏర్పాట్లు చేస్తున్నారు. తుపాను సన్నాహాలపై అమెరికా అధ్యక్షుడు జో బైడెన్‌కు సీనియర్ సిబ్బంది వివరించినట్లు వైట్‌హౌస్ తెలిపింది.
తుపాను ప్రభావిత ప్రాంతాల్లోని ప్రజలు జాగ్రత్తలు తీసుకోవాలని బైడెన్ సూచించారు. ప్రతి ఒక్కరూ రాష్ట్ర, స్థానిక అధికారుల సూచనలను పాటించాలని బైడెన్ విజ్ఞప్తి చేశారు.