Bill Gates: ఎప్స్టీన్ ఫైల్స్ కలకలం.. విడాకుల పత్రాల్లో బిల్ గేట్స్పై 20కిపైగా సంబంధాల ఆరోపణలు.. కొత్త నివేదికలో వెల్లడి
ఈ వార్తాకథనం ఏంటి
మైక్రోసాఫ్ట్ వ్యవస్థాపకుడు బిల్ గేట్స్ తన ప్రజా ప్రతిష్ఠను మెరుగుపర్చుకునేందుకు ప్రత్యేక చర్యలు తీసుకుంటున్నారని తాజాగా ఓ నివేదిక వెల్లడించింది. ఆయన దుస్తుల ఎంపిక నుంచి ప్రజల ముందుకు వచ్చే విధానం వరకు ప్రత్యేక స్టైలిస్టుల బృందం పర్యవేక్షిస్తున్నట్లు తెలుస్తోంది. ప్రముఖ ఆర్థిక పత్రిక వాల్ స్ట్రీట్ జర్నల్ (WSJ) కథనం ప్రకారం, చిన్నారుల కార్యక్రమాల ద్వారా ప్రసిద్ధి చెందిన మిస్టర్ రోజర్స్ మాదిరిగా గేట్స్ కనిపించేలా ప్రయత్నాలు జరుగుతున్నాయి. ఇందుకోసం ప్రత్యేకంగా రూపొందించిన మానిక్విన్పై ఆయన దుస్తులను ముందుగానే పరీక్షిస్తున్నట్లు సమాచారం.
వివరాలు
బీజీ అన్ప్లగ్డ్
ఇదిలా ఉండగా, ఈ ఏడాది జనవరిలో వెలుగులోకి వచ్చిన ఎప్స్టీన్ ఫైల్స్లో బిల్ గేట్స్ పేరు ప్రస్తావనకు రావడం మరోసారి చర్చనీయాంశమైంది. అమెరికా న్యాయ శాఖ విడుదల చేసిన పత్రాల్లో జెఫ్రీ ఎప్స్టీన్ తనకు తాను రాసుకున్నట్లు చెప్పబడిన ఓ ఈమెయిల్లో గేట్స్ గురించి కొన్ని ఆరోపణలు చేసినట్లు నివేదికలు పేర్కొన్నాయి. అయితే వాటన్నింటినీ బిల్ గేట్స్ ఖండించారు. అయితే WSJ కథనం ప్రకారం, గేట్స్ ఫౌండేషన్ ఉద్యోగులతో నిర్వహించిన అంతర్గత సమావేశంలో ఎప్స్టీన్ ఫైల్స్లో ప్రస్తావించిన ఇద్దరు రష్యన్ మహిళలతో తనకు సంబంధాలు ఉన్నాయని బిల్ గేట్స్ అంగీకరించినట్లు పేర్కొంది. "బీజీ అన్ప్లగ్డ్" పేరుతో జరిగే ఈ సమావేశంలో ఆయన చేసిన వ్యాఖ్యలు అక్కడున్న వారిని ఆశ్చర్యానికి గురిచేశాయని నివేదిక వెల్లడించింది.
వివరాలు
20కిపైగా వివాహేతర సంబంధాలు
అదే నివేదికలో, బిల్ గేట్స్ విడాకుల పత్రాల్లో ఆయనకు కనీసం 20కిపైగా వివాహేతర సంబంధాలు ఉన్నాయని ఆరోపణలు నమోదైనట్లు పేర్కొంది. ఎప్స్టీన్తో తన అనుబంధం పెద్ద తప్పిదమని, ఆ వ్యవహారం వెలుగులోకి వచ్చిన తర్వాత జరిగిన పరిణామాలు ఫౌండేషన్ విలువలకు పూర్తిగా విరుద్ధమని గేట్స్ ఉద్యోగులతో చెప్పినట్లు సమాచారం. మరోవైపు, గేట్స్ ఫౌండేషన్ సీఈవో మార్క్ సుజ్మన్తో జరిగిన మరో సమావేశంలో కూడా ఈ అంశంపై చర్చ జరిగినట్లు WSJ తెలిపింది. బిల్ గేట్స్ హాజరు కాకపోయినా, ఎప్స్టీన్ వ్యవహారంతో ఫౌండేషన్ పేరు ముడిపడటం వల్ల తాను అసౌకర్యంగా భావించానని సుజ్మన్ పేర్కొన్నట్లు సమావేశానికి హాజరైనవారు వెల్లడించారు. ఈ వివాదం ఫౌండేషన్ ఉద్యోగుల్లోనూ తీవ్ర చర్చకు దారితీసినట్లు నివేదిక పేర్కొంది.