Discord App: నేపాల్ యువత నిర్ణయాలన్నీ ఇప్పుడు ఈ యాప్‌లోనే.. ఏమిటి దాని ప్రత్యేకత?
ఈ వార్తాకథనం ఏంటి
నేపాల్‌లో ఇటీవల కాలంలో అవినీతి వ్యతిరేక నిరసనలు వేగం పుంజుకున్నాయి. ప్రభుత్వంపై ఉన్న అసంతృప్తి కారణంగా ప్రారంభమైన ఈ ఉద్యమాలు, తాజాగా 26 సోషల్ మీడియా యాప్‌లపై విధించిన నిషేధంతో మరింత ఉధృతమయ్యాయి. ఫలితంగా ప్రభుత్వ స్థిరత్వంపై ప్రశ్నలు తలెత్తగా, యువత Discord వంటి చాట్ యాప్‌ల ద్వారా కొత్త ప్రధానమంత్రిని ఎన్నుకోవాలని చర్చలు జరిపారని వార్తలు వినిపిస్తున్నాయి.
Details
Discord అంటే ఏమిటి?
Discord సాధారణ సోషల్ మీడియా ప్లాట్‌ఫారమ్ కాదు. ఇది మొదట 2015లో గేమర్‌ల కోసం ప్రత్యేకంగా రూపుదిద్దుకుంది. ఆట ఆడుతూనే సులభంగా వాయిస్, టెక్స్ట్ చాట్ చేయడానికి ఇది సాయపడుతుంది. స్టానిస్లావ్ విష్నెవ్స్కీ, జాసన్ సిట్రాన్ ఈ ప్లాట్‌ఫారమ్‌ను అభివృద్ధి చేశారు. ప్రారంభించిన ఏడాదిలోపే 2.5 కోట్లకు పైగా యూజర్లు దీనిలో చేరడం దీని పాపులారిటీని చూపిస్తుంది. కరోనా సమయంలో పెరిగిన వినియోగం కరోనా మహమ్మారి సమయంలో ముఖ్యంగా Gen Zలో ఈ యాప్ విపరీతమైన ఆదరణ పొందింది. మొదట గేమింగ్ చాట్ ప్లాట్‌ఫారమ్‌గా మాత్రమే వాడినప్పటికీ, తరువాత ఇది సాధారణ సంభాషణలకు, ఆసక్తుల ఆధారంగా ఏర్పడిన సర్వర్లలో చర్చించడానికి కూడా వినియోగదారులు ఉపయోగించడం మొదలుపెట్టారు.
Details
Discordని ఎలా ఉపయోగిస్తారు?
Discordలో సర్వర్ భావన కీలకం. యాప్‌ను ఉపయోగించాలంటే ముందుగా Google Play Store లేదా Apple App Store నుంచి డౌన్‌లోడ్ చేసి ఖాతా సృష్టించాలి. తరువాత మన సొంత సర్వర్ తయారు చేసుకోవచ్చు లేదా ఇతరుల సర్వర్లలో చేరవచ్చు. సర్వర్‌ను ఒక పెద్ద ఆన్‌లైన్ కమ్యూనిటీగా ఊహించవచ్చు. ఇందులో అనేక ఛానెల్‌లు సృష్టించి టెక్స్ట్, ఫోటోలు, వీడియోలు షేర్ చేయవచ్చు. ఒక్క సర్వర్‌లో గరిష్టంగా 5 లక్షల మంది సభ్యులు ఉండగలరు. అయితే ఒకేసారి యాక్టివ్‌గా ఉండగల వినియోగదారులు 2.5 లక్షల వరకు మాత్రమే పరిమితం.
Details
నేపాల్ వివాదంలో Discord పాత్ర
ప్రస్తుతం నేపాల్‌లో Discordపై చర్చలు వేడెక్కుతున్నాయి. యువతకు ఇది ప్రభుత్వంపై బహిరంగ చర్చలకు ఒక సురక్షిత వేదికగా మారింది. కొత్త ప్రధానమంత్రిని ఎంచుకోవడంపై కూడా చర్చలు జరిగాయని పుకార్లు వెలువడుతున్నాయి. ఇది నిజమో కాదో పక్కన పెడితే, Discord ఇక గేమింగ్ చాట్ యాప్‌కే పరిమితం కాకుండా రాజకీయ, సామాజిక చర్చలకు కూడా ఒక కీలక వేదికగా మారిందని మాత్రం స్పష్టంగా కనిపిస్తోంది.