టర్కీలో 4.7 తీవ్రతతో మరో భూకంపం, 34,000 దాటిన మృతుల సంఖ్య
ఈ వార్తాకథనం ఏంటి
టర్కీలో ఆదివారం మరో భూకంపం సంభవించింది. టర్కీ, సిరియాలో సరిహద్దులో రిక్టర్ స్కేలుపై 7.8 తీవ్రతతో భయంకరమైన భూకంపం వచ్చిన వారం తర్వాత ఇది సంభవించింది.
టర్కీలో తాజాగా వచ్చిన భూకంప తీవ్రత రిక్టర్ స్కేలుపై 4.7 తీవ్రతగా నమోదైంది. భూకంప కేంద్రం దక్షిణ నగరమైన కహ్రామన్మరాస్ సమీపంలో కేంద్రీకృతమైంది. ఇటీవల సంభవించిన భూకంపాల ధాటికి అత్యంత దెబ్బతిన్న నగరాల్లో ఇది ఒకటి.
టర్కీ, సిరియాలో కలిసి ఇప్పటి వరకు 34,000మందికి పైగా మృతి చెందినట్లు అధికారులు చెప్పారు. మరో 10వేల మందికి పైగా గాయపడినట్లు వెల్లడించారు.
భూకంపం
రెచ్చిపోతున్న దొంగలు, 57మంది అరెస్టు
భూకంప ప్రభావిత ప్రాంతాల్లో దొంగలు రెచ్చిపోతున్నారు. ఇళ్లు కూలిపోయి, టెంట్ల కింద, కార్లలో నిరాశ్రయులు నివసిస్తున్నారు. ఇదే అదునుగా భావించిన దొంగలు తమ చేతివాటాన్ని ప్రదర్శిస్తున్నారు. బంగారంతో పాటు విలువైన వస్తువులను దొంగిలిస్తున్నారు.
దోపిడీదారుల పట్ల ప్రభుత్వం కఠినంగా వ్యవహరిస్తుందని అధ్యక్షుడు రెసెప్ తయ్యిప్ ఎర్డోగాన్ పేర్కొన్నారు. ఈ సందర్భంగా అత్యవసర పరిస్థితిని ప్రకటించారు. లూటీకి పాల్పడిన 57మందిని అరెస్టు చేసినట్లు న్యాయ శాఖ మంత్రి బెకిర్ బోజ్‌డాగ్ తెలిపారు.
భూకంపం కారణంగా కుదైలైన టర్కీ, సిరియాకు సాయం చేసేందుకు ఖతార్ ముందుకొచ్చింది. ఫిఫా ప్రపంచ కప్ సందర్భంగా ఉపయోగించిన 10,000 క్యాబిన్లు, కారవాన్లను టర్కీ, సిరియాకు పంపనున్నట్లు ఖతార్ అధికారులు తెలిపారు.