Loading...
US B-2 Pilots: ఇరాన్‌ ఫోర్డో అణు కేంద్రంపై అమెరికా దాడి.. బీ-2 పైలట్లు వెల్లడించిన కీలక విషయాలు
బీ-2 పైలట్లు వెల్లడించిన కీలక విషయాలు

US B-2 Pilots: ఇరాన్‌ ఫోర్డో అణు కేంద్రంపై అమెరికా దాడి.. బీ-2 పైలట్లు వెల్లడించిన కీలక విషయాలు

వ్రాసిన వారు Sirish Praharaju
Nov 20, 2026
02:10 pm

ఈ వార్తాకథనం ఏంటి

అమెరికా అధ్యక్షుడు డొనాల్డ్‌ ట్రంప్‌ మరోసారి వార్తల్లో నిలిచారు. ఇరాన్‌లోని అణు కేంద్రాలపై దాడి చేసిన అమెరికా బాంబర్‌ విమానాల పైలట్లు సురక్షితంగా స్వదేశానికి తిరిగి రాకముందే.. ఆపరేషన్‌ విజయవంతమైనట్లు ట్రంప్‌ ప్రపంచానికి ప్రకటించినట్లు తెలుస్తోంది. ఈ విషయాన్ని స్వయంగా బీ-2 స్పిరిట్‌ బాంబర్‌ విమానాలను నడిపిన పైలట్లు వెల్లడించారు. అమెరికా మిలిటరీకి చెందిన 'ఎయిర్‌ అండ్‌ స్పేస్‌ ఫోర్సెస్‌' మ్యాగజైన్‌ నిర్వహించిన ఇంటర్వ్యూలో వారు దాడికి సంబంధించిన ఆసక్తికర విషయాలను పంచుకున్నారు.

వివరాలు 

30వేల పౌండ్ల బరువున్న రెండు బంకర్‌ బస్టర్‌ బాంబుల ప్రయోగం 

జూన్‌ 25న అమెరికా తూర్పు ప్రాంతం నుంచి బయలుదేరిన బీ-2 బాంబర్‌ విమానాలు సుమారు 18 గంటల పాటు ప్రయాణించి ఇరాన్‌ సమీపానికి చేరుకున్నాయి.

లక్ష్యానికి దగ్గరవుతున్న సమయంలో పైలట్లు తమ మ్యాప్‌లు,స్విచ్‌లు,వాచ్‌లను పరిశీలించుకుంటున్నారు.

అదే సమయంలో వారికి కాంతులతో వెలిగిపోతున్న ఓ నగరం కనిపించింది.

దీంతో తాము టెహ్రాన్‌కు సమీపంలోకి చేరుకున్నట్లు గుర్తించారు. ఆ తర్వాత కొద్ది నిమిషాలకే ఒక్కొక్కటి 30వేల పౌండ్ల బరువున్న రెండు బంకర్‌ బస్టర్‌ బాంబులను ప్రయోగించారు.

బాంబులు పడిన 15 సెకన్ల తర్వాత భారీ అగ్నిగోళం ఆకాశంలోకి ఎగసిపడింది.

అది దాదాపు పది అంతస్తుల భవనం ఎత్తులో ఉన్నట్లు కనిపించిందని పైలట్లు తెలిపారు.

ఆ పేలుడు వెలుగులో చుట్టుపక్కల పర్వతాలు సైతం స్పష్టంగా కనిపించాయని వివరించారు.

వివరాలు 

చివరి నిమిషంలో బాంబుల వ్యూహంలో మార్పులు

ఇరాన్‌లోని ఫోర్డో అణు కేంద్రాన్ని 2009లోనే అమెరికా గుర్తించింది. ఆ కేంద్రాన్ని ధ్వంసం చేసేందుకు అప్పటి నుంచే వ్యూహరచన ప్రారంభించింది.

అణు కేంద్రం నిర్మాణం,వెంటిలేషన్‌ వ్యవస్థలు, విద్యుత్తు సరఫరా మార్గాలు, నిర్మాణంలోని బలహీన ప్రాంతాలపై నిపుణులు అధ్యయనం చేశారు.

తొలుత వెంటిలేషన్‌ షాఫ్ట్‌లను లక్ష్యంగా చేసుకుని దాడి చేయాలని నిర్ణయించారు.

అయితే ఆపరేషన్‌కు కొన్ని రోజుల ముందు ఇరాన్‌ కీలకమైన వెంటిలేషన్‌ మార్గాలపై కాంక్రీట్‌ పొరను ఏర్పాటు చేసినట్లు అమెరికా గుర్తించింది.

దీంతో దాడి వ్యూహాన్ని మార్చాల్సిన పరిస్థితి ఏర్పడింది. తొలుత ఆ కాంక్రీట్‌ పొరను తొలగించిన తర్వాతే ప్రధాన దాడి చేయాలని నిర్ణయించారు.

ADVERTISEMENT

వివరాలు 

చివరి నిమిషంలో బాంబుల వ్యూహంలో మార్పులు

ఈ మార్పులపై చివరి నిమిషం వరకు కసరత్తు జరిగింది. దాడికి కొన్ని గంటల ముందు కూడా ప్రణాళికలో మార్పులు చేశారు.

చివరకు ఆపరేషన్‌ ప్రారంభానికి కేవలం 16 గంటల ముందు తుది ప్రణాళిక సిద్ధమైంది.

ఈ ఆపరేషన్‌ కోసం అమెరికాలోని వైట్‌మన్‌ ఎయిర్‌ బేస్‌ నుంచి ఏడు బీ-2 బాంబర్‌ విమానాలు ఇరాన్‌ వైపు బయలుదేరాయి.

అవి అమెరికా తూర్పు ప్రాంతం మీదుగా ప్రయాణించాయి.

అయితే అసలు దాడి ఎక్కడి నుంచి జరగనుందో ప్రపంచానికి తెలియకుండా ఉండేందుకు మరికొన్ని బీ-2 విమానాలను పశ్చిమ దిశలోని డియాగో గార్సియా వైపు పంపించారు.

తద్వారా ప్రత్యర్థులను తప్పుదోవ పట్టించే ప్రయత్నం చేశారు.

ADVERTISEMENT

వివరాలు 

ముందుగానే ఇరాన్‌ గగనతల రక్షణ వ్యవస్థల ధ్వంసం

అమెరికా బీ-2 బాంబర్లు ఇరాన్‌ సమీపానికి చేరుకునే సమయానికి వాటికి ఎలాంటి అడ్డంకులు ఎదురుకాకుండా ముందస్తు చర్యలు చేపట్టారు.

ఇందుకోసం ఇజ్రాయెల్‌, అమెరికా యుద్ధ విమానాలు కొంతకాలం ముందే రంగంలోకి దిగాయి.

'ఆపరేషన్‌ రైజింగ్‌ లయన్‌' పేరుతో ఇరాన్‌ గగనతల రక్షణ వ్యవస్థలపై దాడులు నిర్వహించాయి.

దీంతో బీ-2 బాంబర్లు తమ లక్ష్యాలపై దాడి చేసేందుకు మార్గం సుగమమైంది. మొత్తం ఏడు బీ-2 విమానాల్లో ఆరింటిని ఫోర్డో అణు కేంద్రంపై దాడికి కేటాయించారు.

మరో విమానాన్ని నతాంజ్‌ అణు కేంద్రం వైపు పంపించారు. అర్ధరాత్రి 2.10 గంటలకు తొలి బాంబు ఇరాన్‌ భూభాగాన్ని తాకింది.

ఈ మొదటి దాడి ఫోర్డో కేంద్రంపై ఏర్పాటు చేసిన కాంక్రీట్‌ పొరను తొలగించేందుకు ఉపయోగపడింది.

వివరాలు 

ముందుగానే ఇరాన్‌ గగనతల రక్షణ వ్యవస్థల ధ్వంసం

ఆ తర్వాత మిగిలిన ఐదు బాంబర్‌ విమానాల నుంచి ప్రయోగించిన బంకర్‌ బస్టర్‌ బాంబులు అణు కేంద్రాన్ని లక్ష్యంగా చేసుకున్నాయి.

ప్రతి విమానానికి తమ లక్ష్యంపై దాడి చేసేందుకు కేవలం 15 సెకన్ల సమయం మాత్రమే అందుబాటులో ఉంది.

నిర్దేశించిన లక్ష్యాలపై బాంబులు ప్రయోగించిన తర్వాత ఆపరేషన్‌ పూర్తయినట్లు పైలట్లు ఉన్నతాధికారులకు సమాచారం అందించారు.

వివరాలు 

తిరుగు ప్రయాణంలో ట్రంప్‌ ప్రకటన

దాడి ముగిసిన తర్వాత బీ-2 బాంబర్‌ విమానాలు తిరుగు ప్రయాణం ప్రారంభించాయి. మార్గమధ్యంలో ఇంధనం నింపుకునేందుకు రీఫ్యూయలింగ్‌ ప్రక్రియ చేపట్టాయి.

అదే సమయంలో అమెరికా అధ్యక్షుడు డొనాల్డ్‌ ట్రంప్‌ ఇరాన్‌ అణు కేంద్రాలపై దాడి చేసిన విషయాన్ని బహిరంగంగా ప్రకటించినట్లు పైలట్లు తెలిపారు.

తాము ఇంకా స్వదేశానికి చేరుకోకముందే అధ్యక్షుడు ఈ విషయాన్ని వెల్లడించడంతో ఆపరేషన్‌ సమాచారం ప్రపంచానికి తెలిసిపోయిందని వివరించారు.

వివరాలు 

తిరుగు ప్రయాణంలో ట్రంప్‌ ప్రకటన

ఈ దాడిలో మొత్తం 14 బంకర్‌ బస్టర్‌ బాంబులను ఉపయోగించారు.

వీటి మొత్తం బరువు సుమారు 190 మెట్రిక్‌ టన్నులు. ఆపరేషన్‌ పూర్తయిన తర్వాత నిర్వహించిన ప్రాథమిక విశ్లేషణలో ఇరాన్‌ అణు పదార్థాన్ని శుద్ధి చేసే సామర్థ్యం తీవ్రంగా దెబ్బతిన్నట్లు గుర్తించినట్లు సమాచారం.

అత్యంత రహస్యంగా ప్రణాళిక రూపొందించి, చివరి నిమిషంలో మార్పులు చేస్తూ నిర్వహించిన ఈ ఆపరేషన్‌ వివరాలను ఇప్పుడు స్వయంగా పైలట్లు వెల్లడించడం ప్రాధాన్యం సంతరించుకుంది.

ADVERTISEMENT