Chinmoy Krishna Das: చిన్మోయ్ దాస్,అయన అనుచరులపై బంగ్లాదేశ్‌లో మరో కేసు నమోదు
ఇస్కాన్‌ ప్రచారకర్త,ప్రముఖ హిందూ నాయకుడు చిన్మయ్‌ కృష్ణదాస్‌పై బంగ్లాదేశ్‌లో మరో కేసు నమోదైంది. కృష్ణదాస్‌తో పాటు వందలాది మంది అనుచరులపై పోలీసులు కేసులు నమోదు చేశారు. ఇప్పటికే దేశద్రోహం ఆరోపణలపై ఆయనను అరెస్టు చేసిన విషయం తెలిసిందే. తాజాగా,హెఫాజాత్-ఎ-ఇస్లాం కార్యకర్త ఇనాముల్ హక్ ఫిర్యాదు మేరకు ఈ కొత్త కేసు నమోదైంది. బంగ్లా మీడియా వర్గాల సమాచారం ప్రకారం,గత నెల 26న చిట్టగాంగ్‌ కోర్టు ప్రాంగణంలో సంప్రదాయ దుస్తులు ధరించిన కృష్ణదాస్‌,అతని అనుచరులు తనపై దాడి చేశారని ఇనాముల్ హక్ ఫిర్యాదులో పేర్కొన్నారు. ఈదాడిలో తన కుడి చేయి విరిగిందని,తలకు తీవ్రమైన గాయాలయ్యాయని హక్ తెలిపారు. గాయాల కారణంగా ఆసుపత్రిలో చికిత్స పొందిన ఆయన,డిశ్చార్జ్‌ అయిన వెంటనే పోలీసులకు ఫిర్యాదు చేసినట్లు తెలుస్తోంది.
అరెస్టుకు నిరసనగా వేలాది మంది హిందువులు ఆందోళన
కృష్ణదాస్‌ను ప్రధాన నిందితుడిగా పేర్కొనడంతో పాటు, 164 మంది గుర్తింపు పొందిన వ్యక్తులు, మరో 500 మంది గుర్తుతెలియని వ్యక్తులు నిందితులుగా ఉన్నారని తెలిపారు. దేశద్రోహం ఆరోపణలపై చిన్మయ్‌ కృష్ణదాస్‌ను గత నెల 26న బంగ్లాదేశ్‌ పోలీసులు అరెస్టు చేసి జైలుకు పంపారు. ఈ అరెస్టుకు నిరసనగా వేలాది మంది హిందువులు ఆందోళన చేపట్టారు.నిరసనల సమయంలో పోలీసులు కాల్పులు జరపడం ఉద్రిక్తతలకు దారితీసింది. హిందూ సమాజ నాయకుడైన బ్రహ్మచారిని హజ్రత్‌ విమానాశ్రయ సమీపంలో అరెస్టు చేసి, చిట్టగాంగ్‌కు తరలించారు. అక్టోబర్‌ 25న జరిగిన ఒక ర్యాలీ సందర్భంగా జాతీయ జెండాను అవమానపరిచారనే ఆరోపణలపై బంగ్లాదేశ్‌ నేషనల్‌ పార్టీ నేత ఖలీదా జియా ఫిర్యాదు మేరకు ఆయనపై దేశద్రోహం కేసు నమోదు చేశారు.
