Bhagavad Gita: భగవద్గీత సమకాలీన ప్రపంచానికి 'జ్ఞాన అమృతం': చైనా పండితులు
ఈ వార్తాకథనం ఏంటి
భగవద్గీతను జ్ఞానామృతంగా, భారత నాగరికతకు సూక్ష్మరూపంగా పరిగణించవచ్చని ప్రముఖ చైనా పండితులు అభిప్రాయపడ్డారు. ఆధునిక ప్రపంచంలో మనుషులు ఎదుర్కొంటున్న ఆధ్యాత్మిక, భౌతిక గందరగోళాలకు ఈ గ్రంథం సార్థకమైన మార్గదర్శకత్వం ఇస్తుందని వారు పేర్కొన్నారు. శనివారం బీజింగ్‌లోని భారత రాయబార కార్యాలయం నిర్వహించిన 'సంగమం - భారతీయ తాత్విక సంప్రదాయాల సమ్మేళనం' అనే చర్చా కార్యక్రమంలో చైనా పండితులు తమ అభిప్రాయాలు వ్యక్తం చేశారు. ఈ సందర్భంగా 88 ఏళ్ల ప్రొఫెసర్ ఝాంగ్ బయోషెంగ్ ప్రధాన వక్తగా పాల్గొన్నారు. ఆయన భగవద్గీతను చైనీస్ భాషలోకి అనువదించిన వ్యక్తి. గీతను ఆయన భారత తాత్విక సంపదకు అద్దం పట్టే ఆధ్యాత్మిక ఇతిహాసం, అలాగే తాత్విక విజ్ఞాన సర్వస్వం (ఎన్‌సైక్లోపీడియా)గా పేర్కొన్నారు.
వివరాలు
5,000ఏళ్ల క్రితం యుద్ధభూమిలో పుట్టిన భగవద్గీత
భగవద్గీత భారతదేశ ఆధ్యాత్మిక దృక్పథాన్ని ప్రతిబింబిస్తుందని,దానిలోని విలువలు,ఆలోచనలు ఇప్పటికీ భారత సమాజానికి దిశానిర్దేశం చేస్తున్నాయని ఆయన అన్నారు. 1984 నుంచి 1986 మధ్య కన్యాకుమారి నుంచి గోరఖ్‌పూర్‌ వరకు భారతదేశం అంతటా చేసిన తన ప్రయాణ అనుభవాలను వివరిస్తూ,ప్రతి చోటా శ్రీకృష్ణుని ఉనికి,ప్రభావం తాను అనుభవించానని ఝాంగ్ గుర్తుచేశారు. భగవద్గీత కేవలం భారతీయులకు మాత్రమే కాదు,చైనాతో సహా ప్రపంచంలోని అన్ని దేశాలకూ ఒక ఆత్మీయ అనుబంధాన్ని ఏర్పరిచిందని,అందుకే అది ప్రపంచంలోని ప్రధాన భాషల్లోకి అనువదించబడిందని ఆయన వివరించారు. జెజియాంగ్‌ విశ్వవిద్యాలయంలోని'సెంటర్‌ ఫర్‌ ఓరియంటల్‌ ఫిలాసఫీ రీసెర్చ్‌'డైరెక్టర్‌ ప్రొఫెసర్ వాంగ్ ఝీ-చెంగ్ మాట్లాడుతూ.. సుమారు 5,000ఏళ్ల క్రితం యుద్ధభూమిలో పుట్టిన భగవద్గీత,నేటి కాలంలోనూ ప్రజలు ఎదుర్కొంటున్న సమస్యలకు సమాధానాలు అందించగలిగే శాశ్వత గ్రంథమని పేర్కొన్నారు.