Air Pollution: కెనడా కార్చిచ్చు పొగతో ఉక్కిరిబిక్కిరైన న్యూయార్క్.. ప్రమాదకర స్థాయికి గాలి కాలుష్యం
ఈ వార్తాకథనం ఏంటి
కెనడాలో చెలరేగిన భారీ అడవి మంటల ప్రభావం అమెరికాలోని న్యూయార్క్ నగరాన్ని తీవ్రంగా తాకింది. కెనడా నుంచి దక్షిణ దిశగా వీచిన గాలులతో భారీ మొత్తంలో పొగ న్యూయార్క్కు చేరడంతో నగరమంతా దట్టమైన పొగమంచుతో కప్పుకుపోయింది. సాధారణంగా సందడిగా కనిపించే న్యూయార్క్ స్కైలైన్ నారింజ రంగు పొగమంచులో కనిపించకుండా పోయింది. దీంతో గాలి నాణ్యత ఒక్కసారిగా పడిపోయి,లక్షలాది మంది ప్రజల ఆరోగ్యంపై ఆందోళనలు నెలకొన్నాయి. న్యూయార్క్లో గాలి నాణ్యత సూచిక (AQI) 200 దాటడంతో నగరంలోని ఐదు ప్రాంతాలు"వెరీ అన్హెల్తీ" (చాలా ప్రమాదకర) విభాగంలోకి చేరాయి. నగరంలో దృశ్యమానత ఒక మైలు కంటే తక్కువకు పడిపోయింది. కాలిన చెక్కల వాసన నగరమంతా వ్యాపించింది. పరిస్థితి తీవ్రంగా మారడంతో అధికారులు అత్యవసర చర్యలు చేపట్టారు.
వివరాలు
రంగంలోకి నేషనల్ గార్డ్,స్టేట్ ఆఫీస్ ఆఫ్ ఎమర్జెన్సీ మేనేజ్మెంట్ సిబ్బంది
గవర్నర్ కాథీ హోచుల్ ఆదేశాల మేరకు నేషనల్ గార్డ్, స్టేట్ ఆఫీస్ ఆఫ్ ఎమర్జెన్సీ మేనేజ్మెంట్ సిబ్బందిని రంగంలోకి దించారు.
ప్రధాన రవాణా కేంద్రాల వద్ద 40 వేలకుపైగా N95 తరహా మాస్కులను పంపిణీ చేశారు.
అలాగే నగరంలోని అన్ని పబ్లిక్ లైబ్రరీల్లో ప్రజలకు ఉచితంగా KN95 మాస్కులు అందుబాటులో ఉంచారు.
ట్విట్టర్ పోస్ట్ చేయండి
మాస్కులను పంపిణీ చేస్తున్న నేషనల్ గార్డ్,స్టేట్ ఆఫీస్ ఆఫ్ ఎమర్జెన్సీ మేనేజ్మెంట్ సిబ్బంది
WATCH: National Guard members handed out masks across New York City as smoke from Canadian wildfires blanketed the region. pic.twitter.com/AjoJvIeNnQ
— Breaking911 (@Breaking911) July 16, 2026
వివరాలు
ప్రజలను అప్రమత్తంగా ఉండాలన్న మేయర్ జోహ్రాన్ మమ్దాని
మేయర్ జోహ్రాన్ మమ్దాని ప్రజలను అప్రమత్తంగా ఉండాలని సూచించారు.
ఇప్పటికే తీవ్ర వేడి కొనసాగుతుండగా, కెనడా నుంచి వచ్చిన పొగతో పరిస్థితి మరింత ప్రమాదకరంగా మారిందని తెలిపారు.
సాధ్యమైనంత వరకు ఇంట్లోనే ఉండాలని, ఎయిర్ కండిషనింగ్ ఉన్న ప్రదేశాల్లో గడపాలని, అత్యవసరం అయితే తప్ప బయటకు వెళ్లొద్దని ఆయన సూచించారు.
ఆరోగ్య శాఖ అధికారులు వృద్ధులు, చిన్నారులు మాత్రమే కాకుండా ప్రతి ఒక్కరూ ఎక్కువ శారీరక శ్రమ అవసరమయ్యే బహిరంగ కార్యకలాపాలకు దూరంగా ఉండాలని హెచ్చరించారు.
పాఠశాలల్లో బహిరంగ ఆటలు, విద్యా విహారయాత్రలను రద్దు చేశారు.
దట్టమైన పొగ కారణంగా లాగార్డియా, నెవార్క్ లిబర్టీ అంతర్జాతీయ విమానాశ్రయాల్లో అనేక విమానాల రాకపోకలు ఆలస్యమయ్యాయి.
వివరాలు
పడమటి దేశాల 'న్యూఢిల్లీ'గా న్యూయార్క్?
తీవ్రమైన గాలి కాలుష్యం గురించి మాట్లాడినప్పుడు ఇప్పటివరకు ప్రపంచవ్యాప్తంగా న్యూఢిల్లీ పేరు ఎక్కువగా వినిపించేది.
అయితే ఈసారి అదే తరహా పరిస్థితిని న్యూయార్క్ కూడా ఎదుర్కొంది.
ప్రపంచ గాలి నాణ్యతను పర్యవేక్షించే IQAir సంస్థ విడుదల చేసిన గణాంకాల ప్రకారం కొంతసేపు న్యూయార్క్ గాలి కాలుష్య స్థాయి న్యూఢిల్లీ, బాగ్దాద్ నగరాల కంటే ఎక్కువగా నమోదైంది.
దీంతో ప్రపంచంలోనే అత్యధిక కాలుష్యంతో ఉన్న ప్రధాన నగరంగా న్యూయార్క్ నిలిచింది.
జూలై 17 నాటికి IQAir గణాంకాల ప్రకారం న్యూయార్క్ AQI 185గా ఉండగా,న్యూఢిల్లీ AQI 111గా నమోదైంది.
అయితే రెండు నగరాల్లో కాలుష్యానికి కారణాలు మాత్రం పూర్తిగా భిన్నమని నిపుణులు చెబుతున్నారు.
వివరాలు
ఈ కాలుష్యం వల్ల శ్వాసకోశ,గుండె సంబంధిత వ్యాధులు
న్యూఢిల్లీలో వాహనాల కాలుష్యం, పరిశ్రమల నుంచి వెలువడే కాలుష్య వాయువులు, పంట అవశేషాల దహనం ప్రధాన కారణాలుగా ఉంటే, న్యూయార్క్లో మాత్రం కెనడాలోని భారీ అడవి మంటల నుంచి వందల కిలోమీటర్ల దూరం ప్రయాణించిన పొగే కారణమైంది.
కారణాలు వేర్వేరు అయినప్పటికీ రెండు నగరాల్లోనూ PM2.5 అనే అత్యంత సూక్ష్మ ధూళి కణాల మోతాదు ప్రమాదకర స్థాయిలో ఉందని నిపుణులు చెబుతున్నారు.
ఈ కణాలు నేరుగా ఊపిరితిత్తుల్లోకి చేరి, రక్తప్రసరణలో కలిసే అవకాశం ఉండటంతో శ్వాసకోశ, గుండె సంబంధిత వ్యాధుల ప్రమాదం పెరుగుతుందని హెచ్చరిస్తున్నారు.
ట్విట్టర్ పోస్ట్ చేయండి
న్యూయార్క్లో గాలి నాణ్యతపై అడ్వైజరీ జారీ
🗽New York City is under an Air Quality Advisory due to the smoke from more than 100 wildfires burning in Canada. pic.twitter.com/bAdkRBEeBt
— Sarah Yáñez-Richards (@SarahYanezR) July 15, 2026
వివరాలు
న్యూయార్క్ను కమ్మేసిన పొగకు కారణమేంటి?
న్యూయార్క్ను కమ్మేసిన ఈ పొగ కెనడాలోని వాయవ్య అంటారియో ప్రాంతం నుంచి వచ్చింది.
ప్రస్తుతం అక్కడ 180కు పైగా అడవి మంటలు కొనసాగుతున్నాయి.గత కొన్నేళ్లలో కెనడా ఎదుర్కొంటున్న అత్యంత తీవ్రమైన కార్చిచ్చులల్లో ఇది ఒకటిగా అధికారులు చెబుతున్నారు.
ఈ మంటలకు అనేక కారణాలు ఉన్నాయి. ఉరుములతో కూడిన వాతావరణంలో వర్షం లేకుండా పడిన మెరుపులు అడవుల్లో మంటలకు కారణమయ్యాయి.
మరోవైపు తీవ్ర ఉష్ణోగ్రతలతో కూడిన 'హీట్ డోమ్' ప్రభావం వల్ల అక్కడ ఉష్ణోగ్రతలు 38 డిగ్రీల సెల్సియస్ వరకు చేరుకున్నాయి.
నెలల తరబడి వర్షాలు లేకపోవడంతో అడవులు పూర్తిగా ఎండిపోయాయి. దీనికి తోడు బలమైన గాలులు వీయడంతో మంటలు వేగంగా వ్యాపించాయి.
వివరాలు
కెనడా నుంచి న్యూయార్క్కు పొగ ఎలా చేరింది?
అంటారియోలోని 'థండర్ బే 36' పేరిట నమోదైన కార్చిచ్చు ఒక్కటే ఇప్పటికే 3.5 లక్షల హెక్టార్లకు పైగా అటవీ ప్రాంతాన్ని దహనం చేసింది.
ప్రస్తుతం ఇది అంటారియోలో కొనసాగుతున్న అతిపెద్ద అడవి మంటగా నమోదైంది.
అంటారియో అడవుల్లో ప్రధానంగా పైన్, స్ప్రూస్ చెట్లు ఎక్కువగా ఉంటాయి.
ఇవి మంటల్లో చిక్కుకున్నప్పుడు భారీగా దట్టమైన పొగ విడుదలవుతుంది.
బలమైన గాలులు ఈ పొగను ఆగ్నేయ దిశగా గ్రేట్ లేక్స్ మీదుగా, దక్షిణ అంటారియో దాటి అమెరికా వైపు తీసుకెళ్లాయి.
ట్విట్టర్ పోస్ట్ చేయండి
ఉత్తర ఒంటారియోను నాశనం చేసిన భారీ కార్చిచ్చులు
Massive Wildfires Ravage Northern Ontario pic.twitter.com/3glnESK4h1
— TaraBull (@TaraBull) July 15, 2026
వివరాలు
కెనడా నుంచి న్యూయార్క్కు పొగ ఎలా చేరింది?
మొదట టొరంటో వంటి నగరాలను కమ్మేసిన ఈ పొగ అనంతరం అమెరికా సరిహద్దు దాటి మిడ్వెస్ట్, ఈశాన్య రాష్ట్రాలకు చేరుకుంది.
చివరకు న్యూయార్క్ నగరాన్ని పూర్తిగా కమ్మేసింది. ఈ పొగలో ఎక్కువ భాగం మొదట వాతావరణంలోని ఎత్తైన పొరల్లో ప్రయాణించి, తర్వాత క్రమంగా భూమికి సమీపానికి దిగివచ్చింది.
దీంతో అమెరికా ఈశాన్య ప్రాంతమంతా దట్టమైన పొగమంచుతో కప్పుకుపోయి, న్యూయార్క్లో గాలి కాలుష్యం ప్రమాదకర స్థాయికి చేరుకుంది.